TOKONI KI HE FAʻAHINGA ʻOKU MAMAHÍ

Ko e Tokoni Lelei Taha ki he Faʻahinga ʻOku Mamahí

PLAY

KO E MAMAHI ʻI HE MOLE HA ʻOFAʻANGA ʻI HE MATÉ KUO HOKO IA KO E KAVEINGA ʻO E NGAAHI FAKATOTOLO LAHI ʻI ONOPOONI. Neongo ia, hangē ko ia naʻe fakatātaaʻi ki muʻá, ko e faleʻi lelei tahá ʻoku faʻa fehoanaki ia mo e poto fakakuongamuʻa ʻoku maʻu ʻi he Tohi Tapú. ʻOku lave eni ki he tataki tuʻuloa ʻi he Tohi Tapú. Kae kehe, ʻoku ʻi he Tohi Tapú, ʻa e faleʻi alafalalaʻanga lahi ange. ʻOku tokonaki mai ai ʻa e fakamatala ʻoku ʻikai toe maʻu ia ʻi ha feituʻu, ʻa ia ʻe lava ke ne ʻomai ʻa e fakanonga taʻealafakatataua ki he faʻahinga ʻoku mamahí.

Ko ha fakapapau ko hotau ngaahi ʻofaʻanga kuo maté ʻoku ʻikai te nau faingataʻaʻia

“Ko e kau maté ʻoku ʻikai te nau ʻiloʻi ha momoʻi meʻa,” ko e lau ia ʻa e Tohi Tapú ʻi he Tangata Malanga 9:5. ʻOku “mole ai [ʻenau] ngaahi fakakaukaú.” (Saame 146:4) ʻI he fehoanaki mo e meʻá ni, ʻoku fakahoa ʻe he Tohi Tapú ʻa e maté ki he mohe.—Sione 11:11.
Ko e tui mālohi ki ha ʻOtua ʻofá ʻokú ne ʻomai ʻa e fakafiemālie

ʻOku pehē ʻe he Tohi Tapú ʻi he Saame 34:15: “Ko e fofonga ʻo Sihová a ʻoku ʻi he kau māʻoniʻoní, pea ʻoku fanongo hono telingá ki heʻenau tangi ki ha tokoní.” Ko hono fakahaaʻi ʻetau ngaahi ongoʻí ʻi he lotu ki he ʻOtuá ʻoku ʻikai ko ha meʻa pē ia ke fakalelei ai ʻa e ʻatamaí pe ko ha founga ke mapuleʻi ai ʻetau fakakaukaú. Ko hono moʻoní, ʻokú ne tokoniʻi kitautolu ke fakatupulekina ha vahaʻangatae fakafoʻituitui mo hotau Tokotaha-Fakatupú, ʻa ia ʻe lava ke ne ngāueʻaki hono mālohí ke fakafiemālieʻi kitautolu.
Ko ha kahaʻu lelei ange ke hanga atu ki ai

Fakaʻuta atu ki he taimi ʻi he kahaʻú ʻa ia ko e faʻahinga ʻi he faʻitoká ʻe toe fakafoki mai ke moʻui ʻi heni ʻi he māmaní! ʻOku toutou lave ʻa e Tohi Tapú ki ha taimi pehē. ʻI hono fakamatalaʻi ʻa e ngaahi tuʻunga ʻe ʻi ai ʻa e māmaní, ʻoku pehē ʻe he Tohi Tapú ko e ʻOtuá “te ne holoholo ʻa e loʻimata kotoa pē mei [hotau] matá, pea ʻe ʻikai ke toe ʻi ai ha mate, pe ha mamahi pe ha tangi pe ha langa.”—Fakahā 21:3, 4.

Ko e tokolahi ʻoku nau tui kia Sihová, ʻa e ʻOtua ʻo e Tohi Tapú, ʻoku fakaivimālohiʻi moʻoni kinautolu ke fekuki mo e mamahí ʻaki hono maʻu ʻa e ʻamanaki ʻo e toe sio ki honau ngaahi ʻofaʻanga kuo maté. Ko e fakatātaá, ko Ann, ʻa ia naʻe mole hono husepānití hili ʻena mali ʻi he taʻu ʻe 65, ʻokú ne pehē: “ʻOku fakapapauʻi mai ʻe he Tohi Tapú ko hotau ngaahi ʻofaʻanga kuo maté ʻoku ʻikai ke nau faingataʻaʻia pea ʻe fokotuʻu hake ʻe he ʻOtuá ʻa e faʻahinga kotoa ʻoku ʻi heʻene manatú. Ko e ngaahi fakakaukau ko ení ʻoku faʻa malanga hake ʻi heʻeku fakakaukau ki he mole hoku ʻofaʻangá, pea ko hono olá, ʻoku malava moʻoni ai ke u fekuki mo e tuʻunga kovi taha kuo faifai ange peá u hokosiá!”

ʻOku pehē ʻe Tiina, ʻa ia naʻe lave ki ai ki muʻa ʻi he ngaahi kupu hokohoko ko ení: “Talu mei he ʻaho naʻe mate ai ʻa Timó, mo ʻeku ongoʻi ʻa e poupou ʻa e ʻOtuá. Naʻá ku ongoʻi moʻoni ʻa e tokoni mai ʻa e toʻukupu ʻo Sihová ʻi he taimi naʻá ku mamahi aí. Pea ko e talaʻofa ʻa e Tohi Tapú ki ha toetuʻú ʻoku moʻoni ʻaupito ia kiate au. ʻOku fakaivimālohiʻi ai au ke hokohoko atu kae ʻoua kuo aʻu ki he ʻaho te u toe sio ai kia Timo.”

ʻOku fakahaaʻi heni ʻa e anga ʻo e ongoʻi ʻa e laui miliona ʻoku nau tuipau ki he alafalalaʻanga ʻa e Tohi Tapú. Neongo kapau te ke ongoʻi ko e meʻa ʻoku taukaveʻi ʻe he Tohi Tapú ʻoku ʻikai moʻoni pe ko ha misi pē, ʻoku fakapotopoto ke ke sivisiviʻi ʻa e ngaahi fakamoʻoni ko ʻene faleʻí mo e talaʻofá ʻoku pau. Te ke ʻiloʻi nai ai ko e Tohi Tapú ʻa e tokoni lelei taha ki he faʻahinga ʻoku mamahí.