ʻI HE malumalu ʻo e Laó, ko e fanga kulukulú mo e fanga lupé naʻe fakatou tali ke feilaulauʻaki kia Sihova. Ko e ongo manupuna ko ení naʻe lave fakataha maʻu pē ki ai ʻi he lao fekauʻaki mo e feilaulaú pea naʻe lava ke na fefetongiʻaki. (Liv. 1:14; 12:8; 14:30) Ko e hā naʻe ʻaonga ai ení? Ko e ʻuhinga ʻe taha he naʻe ʻikai ke ala maʻu maʻu pē ʻa e fanga kulukulú. Ko e hā hono ʻuhingá?

Ko e fanga kulukulú ko e fanga manupuna ʻoku ʻikai ke nau nofo maʻu pē ʻi ha feituʻu pea naʻa nau ʻi ʻIsileli lolotonga ʻa e ngaahi māhina māfana angé. ʻI ʻOkatopa, ʻoku nau fononga fakatonga ki he ngaahi fonua māfana angé, ʻo toki foki ki ʻIsileli ʻi he faʻahitaʻu failaú. (Hiva. 2:11, 12; Sel. 8:7) ʻI ʻIsileli ʻo e kuonga muʻá, naʻe ʻuhinga ení naʻe faingataʻa ke nau feilaulauʻaki ha kulukulu lolotonga ʻa e faʻahitaʻu momokó.

ʻI he tafaʻaki ʻe tahá, ko e fanga lupé ʻoku ʻikai ke nau faʻa fepunaʻaki, ko ia naʻe ala maʻu kinautolu ʻi ʻIsileli ʻi he kotoa ʻo e taʻú. ʻIkai ngata aí, ko e fanga lupé naʻa nau lalata. (Fakafehoanaki mo e Sione 2:14, 16.) Fakatatau ki he tohi Bible Plants and Animals, “ko e ngaahi kolo kotoa ʻi Pālesitainé naʻe ʻi ai ʻenau fanga lupe lalata. ʻI he ʻapi taki taha naʻe ʻi ai ha kiʻi nofoʻanga ki he lupé pe ko ha foʻi ava ʻi he holisí, ʻa ia naʻe lava ke nau nofo ai.”​—Fakafehoanaki mo e ʻAisea 60:8.

Naʻe fakahaaʻi ai ʻe Sihova ʻokú ne fakatou anga-ʻofa mo fakaʻatuʻi ʻaki hono tali ke feilaulauʻaki ʻa e fanga manupuna naʻe ala maʻu ʻi ʻIsileli ʻi he kotoa ʻo e taʻú.