KO E hivá naʻe ʻi he uho ia ʻo e anga fakafonua ʻi ʻIsileli ʻo e kuonga muʻá. ʻOku faʻa lave ʻa e Tohi Tapú ki he ngaahi tā meʻalea mo e hiva leʻo. Ko hono moʻoní, ʻoku fakafuofua ki ha vahe hongofulu ʻe taha ʻo e Tohi Tapú ko e ngaahi hiva, ko e fakatātā lelei tahá ko e tohi ʻo e Ngaahi Sāmé, Hiva ʻa Solomone, mo e Tangilāulau. Ko ia ai, ʻoku pehē ʻi he tohi Music in Biblical Life ko e Tohi Tapú “ʻokú ne ʻomai ha foʻi fakatātā maeʻeeʻa ʻo ha sōsaieti ʻa ia ko e hivá naʻe huluni ia ʻi he ngaahi ngāue kehe naʻe ʻikai felāveʻi mo e hivá.”

Ko e hivá ʻi he moʻui fakaʻahó. Ko e kau ʻIsilelí naʻa nau tā ha ngaahi fasi ke fakahaaʻi ai ʻenau ngaahi ongoʻí. (ʻAi. 30:29) Ko e kakai fefiné naʻa nau tā ha ngaahi nafa, hiva fiefia pea tauʻolunga ʻi he ngaahi hilifaki kalauní, ngaahi kātoangá, mo e ngaahi ikuna fakakautaú. (Fkm. 11:34; 1 Sām. 18:​6, 7; 1 Tuʻi 1:​39, 40) Naʻe toe hiva ʻe he kau ʻIsilelí ʻa e ngaahi taʻanga tangi lolotonga ʻenau tengihiá. (2 Kal. 35:25) ʻOku ʻikai toe fehuʻia, “ko e kau Hepeluú ko e kakai hiva kinautolu,” ko e lau ia ʻa e McClintock and Strong’s Cyclopedia.

Ko e hivá ʻi he lotoʻā fakatuʻí. Ko e ngaahi tuʻi ʻo ʻIsilelí naʻa nau fiefia ʻi he fanongo ki he ngaahi hivá. Naʻe ui ʻe Tuʻi Saula ʻa Tēvita ki hono lotoʻā fakatuʻí ke ne ngāue ko ha tokotaha mūsika. (1 Sām. 16:​18, 23) Ki mui ai, ʻi he hoko ʻa Tēvita ko e tuʻí, naʻá ne ngaohi ʻa e ngaahi meʻalea, faʻu ʻa e ngaahi hiva fakaʻofoʻofa, pea fokotuʻutuʻu ʻa e kau tā meʻalea ke nau tā meʻa ʻi he temipale ʻo Sihová. (2 Kal. 7:6; ʻĒm. 6:5) Ko Tuʻi Solomone naʻe ʻi ai ʻene kau tangata hiva mo ʻene kau fefine hiva ʻi hono lotoʻaá.—Tml. 2:8.

Ko e hivá ʻi he lotú. Ko e meʻa mahuʻinga tahá, naʻe ngāueʻaki ʻe he kau ʻIsilelí ʻa e hivá ke lotu kia Sihova. Ko hono moʻoní, ko e kau hiva ʻe toko 4,000 naʻa nau tā meʻalea ʻi he temipalé ʻi Selusalema. (1 Kal. 23:5) Naʻa nau tā ʻa e ngaahi simipale, ngaahi meʻalea filo, ngaahi haʻape, mo e ngaahi talupite. (2 Kal. 5:12) Ka ko e kau pōtoʻi tā meʻalea ko ení naʻe ʻikai ko kinautolu pē naʻe lotu kia Sihova fakataha mo e hivá. ʻOku hā mahino ko e kau ʻIsileli tokolahi naʻa nau hiva ʻa e Ngaahi Hiva ʻo e ʻAlu Haké ʻi heʻenau fononga ki he ngaahi kātoanga fakataʻu ʻi Selusalemá. (Saame 120-134) Pea fakatatau ki he ngaahi tohi faka-Siú, ko e kau ʻIsilelí naʻa nau hiva ʻa e Ngaahi Saame Hālelí a lolotonga ʻa e kai ʻo e Pāsová.

ʻOku kei mahuʻinga pē ʻa e hivá ki he kakai ʻa e ʻOtuá. (Sēm. 5:13) Ko e hivá ko ha konga ia ʻo ʻetau lotú. (ʻEf. 5:19) Ko e hivá ʻokú ne fakafāʻūtahaʻi kitautolu mo hotau kaungā-Kalisitiané. (Kol. 3:16) Pea ʻokú ne fakaivimālohiʻi kitautolu ʻi heʻetau tofanga ʻi he ngaahi faingataʻá. (Ngā. 16:25) Ko e hivá ko ha founga fakaʻofoʻofa ia ki hono fakahāhā ʻetau tui kia Sihová mo ʻetau ʻofa kiate iá.