KO E ngaahi kupu ki muʻá ʻoku fakahaaʻi ai ʻa e ngaahi hokosia fakamamahi ʻokú ne ʻai ai ʻa e moʻuí ke honge ifo. ʻI he fuesia ho ngaahi mamahí, te ke fifili nai pe ʻoku tuha ke moʻui pe tokanga mai ha taha kiate koe. Fakapapauʻi ʻoku tokanga mai ʻa e ʻOtuá ʻo fekauʻaki mo hoʻo loto-mamahí. ʻOkú ke mahuʻinga kiate ia.

Ko e tokotaha-tohi ʻo e Saame 86 ʻokú ne fakahaaʻi ʻa e falala-pau ki he ʻOtuá: “ʻOku ou ui kiate koe ʻi he ʻaho ʻo ʻeku mamahí, he te ke fai mai ha tali kiate au.” (Saame 86:7) Te ke fifili nai, ‘ʻE fēfē ʻa e tali mai ʻa e ʻOtuá “ʻi he ʻaho ʻo ʻeku mamahí”?’

Neongo ʻe ʻikai ke toʻo vave nai ʻe he ʻOtuá ʻa hoʻo ngaahi palopalemá, ko ʻene Folofolá, ʻa e Tohi Tapú ʻokú ne fakapapauʻi atu ʻoku lava ke ne ʻoatu ha nonga ʻi loto ke ne tokoniʻi koe ke ke kātaki ai: “ʻOua ʻe hoko ʻo loto-moʻua ʻi ha faʻahinga meʻa, ka ʻi he meʻa kotoa pē mou ʻai ke ʻilo hoʻomou ngaahi kolé ʻe he ʻOtuá, fakafou ʻi he lotu mo e hū tōtōaki fakataha mo e fakafetaʻi; pea ko e nonga ʻa e ʻOtuá ʻa ia ʻoku fakalaka atu ʻi he mahino kotoa pē te ne maluʻi homou lotó pea mo homou fakakaukaú.” (Filipai 4:6, 7, fakamatala ʻi lalo) Kātaki ʻo fakatokangaʻi ange ʻa e anga hono fakapapauʻi mai ʻe he ngaahi veesi Tohi Tapu ʻi laló ʻa e tokanga moʻoni mai ʻa e ʻOtuá.

“ʻOku ʻikai ha [foʻi misi] ʻe taʻefakatokangaʻi ʻe he ʻOtuá. . . . ʻOku mou mahuʻinga ange kimoutolu ʻi ha fanga misi tokolahi.”​—Luke 12:6, 7, fakamatala ʻi lalo.

FAKAKAUKAU ATU: ʻOku mahuʻinga ki he ʻOtuá ʻa e fanga kiʻi manupuna ʻoku siʻi hono mahuʻingá. ʻOku fakatokangaʻi ʻe he ʻOtuá naʻa mo ha kiʻi foʻi misi valevale; ko kinautolu kotoa ʻoku mahuʻinga kiate ia. Ko e faʻahinga ʻo e tangatá ʻoku mahulu atu ʻene mahuʻinga ki he ʻOtuá ʻi ha ngaahi foʻi misi. Ko e tangatá ko e konga tefito ia ʻo e fakatupu ʻa e ʻOtuá ʻi he māmaní, ʻa ia naʻe ngaohi ʻi hono “ʻīmisí” pea ʻoku nau malava ʻo fakatupulekina mo fakahāhā ʻa e ngaahi ʻulungaanga fakaʻotuá.​—Sēnesi 1:26, 27.

“ʻE Sihova, kuó ke sivisiviʻi au, pea ʻokú ke ʻilo au. . . . ʻOkú ke ʻiloʻi ʻa ʻeku ngaahi fakakaukaú . . . Vakaiʻi au, pea ʻilo ʻa e hohaʻatuʻu ʻa ʻeku ngaahi fakakaukaú.”​—Saame 139:1, 2, 23.

FAKAKAUKAU ATU: ʻOku ʻiloʻi fakafoʻituitui koe ʻe he ʻOtuá. ʻOkú ne ʻiloʻi ʻa hoʻo ngaahi ongoʻi lolotó mo hoʻo ngaahi fiemaʻú. ʻE ʻikai nai mahinoʻi ʻe he niʻihi kehé ʻa hoʻo ngaahi palopalemá mo e ngaahi loto-mafasiá, ʻoku tokanga mai ʻa e ʻOtuá kiate koe pea ʻokú ne loto ke tokoniʻi koe. ʻIkai ʻoku fakahaaʻi heni ʻoku tuha ke kei moʻui?

“ʻE Sihova, fanongo mai muʻa ki heʻeku lotú; tuku ke aʻu atu kiate koe ʻa ʻeku tangi ki ha tokoní. . . . Fokotuʻu telinga mai muʻa kiate au; ke ke fai mai ha tali vave ʻi he taimi ʻoku ou ui atu aí. . . . Te ne tokanga ki he lotu ʻa e tuʻutāmakí.”​—Saame 102:1, 2, 17.

FAKAKAUKAU ATU: Talu mei he kamataʻanga ʻo e faingataʻaʻia ʻa e faʻahinga ʻo e tangatá, kuo tauhi ʻe Sihova ha lēkooti ʻo e loʻimata kotoa pē tupu mei he faingataʻaʻiá. (Saame 56:8) ʻOku kau heni mo ho loʻimatá. ʻOku manatua ʻe he ʻOtuá ʻa e kotoa ho ngaahi ʻahiʻahí mo hoʻo tō loʻimatá koeʻuhí ʻokú ke mahuʻinga kiate ia.

“ʻOua ʻe loto-moʻua, he ko au ʻa ho ʻOtuá. Te u fakaivimālohiʻi koe, ʻio, te u tokoniʻi koe . . . ko au Sihova ko ho ʻOtuá, . . . ʻa e Tokotaha ʻoku lea atu kiate koe, ‘ʻOua ʻe ilifia. Te u tokoniʻi koe.’”​—ʻAisea 41:10, 13.

FAKAKAUKAU ATU: ʻOku mateuteu ʻa e ʻOtuá ke ne tokoniʻi koe. Kapau te ke tō, te ne puke hake koe.

“Naʻe ʻofa lahi ʻaupito ʻa e ʻOtuá ki he māmaní ʻo ne foaki ai hono ʻAlo tofu-pē-taha-ne-fakatupú, koeʻuhi ko e tokotaha kotoa pē ʻokú ne ngāueʻi ʻa e tui kiate iá ke ʻoua naʻa ʻauha ka ne maʻu ʻa e moʻui taʻengatá.”​—Sione 3:16.

FAKAKAUKAU ATU: ʻOku ʻofeina koe ʻe he ʻOtuá pea ʻokú ne loto-lelei ke ne ʻoatu hono ʻAló, ʻa Sīsū, ko ha feilaulau maʻau. Ko e feilaulau ko ení ʻoku ʻoatu ai ha faingamālie ke ke maʻu ha moʻui fiefia mo ha moʻui mohu ʻuhinga ʻo taʻengata. *