Kuo foaki ‘e he ‘Otuá ki he fa‘ahinga ‘o e tangatá ha me‘a‘ofa makehe​—ko e malava ke fetu‘utaki mo ia pea fakahaa‘i ‘enau ongo‘í kiate ia fakafou ‘i he lotu. Na‘e lotu ‘a e palōfita ko Tēvitá: “‘A koe ko e Tokotaha-Fanongo ki he lotú, ‘e ‘alu atu kiate koe ‘a e ngaahi fa‘ahinga kakai kotoa.” (Saame 65:2) Ka ‘e lava fēfē ke tau lotu ‘i ha founga ‘e fanongo mai ai ‘a e ‘Otuá pea tāpuaki‘i kitautolu?

Ko ho‘o ngaahi lotu fakafo‘ituituí ‘oku faka‘atā ai ke ke hua‘i atu ho lotó ‘i he ‘ao ‘o e ‘Otuá​—ke fakahaa‘i kiate ia ho‘o ngaahi ongo‘í. (Saame 62:8) ‘Oku koloa‘aki ‘e he Māfimafi-Aoniú ‘a e ngaahi lotu loto-mo‘oni mei he lotó.

Neongo ‘oku lahi ‘a e ngaahi hingoa fakalakanga ‘o e ‘Otuá, ka ‘oku taha pē hono huafa fakafo‘ituituí. “Ko au Sihova. Ko hoku hingoá ia” (‘Aisea 42:8) Ko e huafa Sihová ‘oku hā tu‘o 7,000 nai ‘i he Folofola Mā‘oni‘oní. Na‘e ngāue‘aki ‘e he kau palōfita tokolahi ‘a e huafa fakafo‘ituitui ‘o e ‘Otuá ‘i he‘enau lotú. Na‘e pehē ‘e ‘Ēpalahame: “Kātaki mu‘a ‘e Sihova, . . . tuku mu‘a ke hoko atu ‘eku leá.” (Sēnesi 18:30) ‘Oku totonu foki ke tau ngāue‘aki ‘a e huafa ‘o e ‘Otuá, ‘a e Sihová, ‘i he‘etau lotú.

‘Oku mahino‘i ‘e he ‘Otuá ‘etau ngaahi fakakaukaú mo e ongo‘í neongo pe ko e hā ‘a e lea ‘oku tau lea aí. ‘Oku fakapapau‘i mai ‘i he‘ene Folofolá: “‘Oku ‘ikai ke filifilimānako ‘a e ‘Otuá, ka ‘i he pule‘anga kotoa pē, ko e tangata ko ia ‘oku manavahē kiate ia mo fai ‘a e me‘a ‘oku totonú, ‘okú ne tali ia.”​—Ngāue 10:34, 35.

Kae kehe, ke tau ma‘u ‘a e tāpuaki ‘a e ‘Otuá, ‘oku fiema‘u ke tau fai ‘a e me‘a lahi ange ‘i he lotú. ‘I he kupu hokó, te tau sivisivi‘i ai ‘a e me‘a ‘oku fiema‘u ke tau faí.