‘OKÚ KE lava ‘o lau ‘a e Tohi Tapu faka-Hepeluú? Ngalingali pē ‘oku ‘ikai. Mahalo pē kuo te‘eki ai ‘aupito ke ke sio ‘i ha Tohi Tapu faka-Hepelū. Kae kehe, te ke hounga‘ia lahi nai ‘i ho‘o tatau fakafo‘ituitui ‘o e Folofola Mā‘oni‘oní ‘i ho‘o ako ha me‘a fekau‘aki mo e mataotao ko Elias Hutter ‘i he senituli hono 16 pea mo e ongo pulusinga ‘o e Tohi Tapu faka-Hepelū na‘á ne pulusí.

Ko Elias Hutter na‘e fā‘ele‘i ia ‘i he 1553 ‘i Görlitz, ko ha ki‘i kolo ofi ki he kau‘āfonua ‘o Siamane mo Pōlani mo e Lepupilika Seki ‘i he ‘aho ní. Na‘e ako ‘e Hutter ‘a e ngaahi lea ‘o e Hahaké ‘i he ‘Univēsiti Lutheran ‘i Jena. ‘I he‘ene ta‘u 24 pē, na‘e fakanofo ia ko e palōfesa ‘i he lea faka-Hepeluú ‘i Leipzig. ‘I hono tu‘unga ko ha tokotaha fakalelei akó, na‘á ne fokotu‘u ki mui ha ‘apiako ‘i Nuremberg ‘a ia na‘e lava ke ako ai ‘e he kau akó ‘a e lea faka-Hepeluú, faka-Latiná, mo e faka-Siamané ‘i ha ta‘u ‘e fā. Na‘e faingata‘a ‘i he taimi ko iá ke fai ia ‘i ha ‘apiako pe toe ‘univēsiti kehe.

‘I he 1587, na‘e fa‘u ai ‘e Hutter ha pulusinga faka-Hepelū ‘o e tohi ‘oku anga-maheni‘aki hono ui ko e Fuakava Motu‘á. Ko e pulusinga ko ení na‘e fakakaveinga ko e Derekh ha-Kodesh, ko e to‘o mei he ‘Aisea 35:8 pea ‘oku ‘uhingá “Ko e Hala ‘o e Mā‘oni‘oní.” Ko e faka‘ofo‘ofa ‘o e mata‘i-taipé na‘e tupu mei ai ‘a e fakamatala ‘o pehē “‘oku tomu‘a tala ‘e he me‘a kotoa pē ‘a e faka‘ofo‘ofa ‘o e pulusinga ko ení.” Ka ko e me‘a na‘á ne ‘ai ‘a e Tohi Tapu ko ení ke tautefito ‘ene mahu‘ingá ko e lava ke ngāue‘aki ‘e he kau akó ko ha me‘angāue ‘aonga ki hono ako ‘a e lea faka-Hepeluú.

Ke mahino‘i ‘a e ‘uhinga na‘e mātu‘aki ‘aonga ai ‘a e Tohi Tapu faka-Hepelū ‘a Hutter, fakakaukau angé ki ha ongo palopalema na‘e fehangahangai mo ha tokotaha ako ‘i he‘ene feinga ke lau ‘a e Tohi Tapú ‘i he lea faka-Hepeluú. ‘Uluakí, ‘oku ‘i ha ‘alafapeti kehe mo ‘ikai anga-maheni ia, pea ko hono uá, ko e lea fakapipiki mei mu‘a mo fakapipiki mei mui na‘e pipiki ki aí ‘okú ne ‘ai ke faingata‘a hono ‘ilo‘i ‘a e tupu‘i leá. Ko e fakatātaá, vakai angé ki he fo‘i lea faka-Hepelū ko e נפשׁ (na‘e liliu ko e ne’phesh), ‘oku ‘uhinga ko e “laumālie.” ‘I he ‘Isikeli 18:4, ‘oku ‘i mu‘a ia ‘i he lea fakapipiki mei mu‘a ko e ה (ha), ‘oku ‘uhingá ko e “ko e,” ‘o fa‘u ai ‘a e fo‘i lea fakataha‘i ko e הנפשׁ (han·ne’phesh), pe “ko e laumālie.” Ki he mata ‘oku ‘ikai ke anga ki aí, ko e הנפשׁ (han·ne’phesh) ‘e lava ke hā ko ha fo‘i lea kehe ‘aupito ia mei he נפשׁ (ne’phesh).

Ke tokoni ki he‘ene kau akó, na‘e ngāue‘aki ‘e Hutter ha founga pulusi pōto‘i​—ko ha mata‘i-taipe ‘i he ngaahi mata‘itohi faka-Hepeluú na‘e fakatou ‘i ha fa‘unga matolu mo ‘ikai matolu. Na‘á ne pulusi ‘a e konga ki lalo ‘o e fo‘i lea taki taha ‘i he ngaahi mata‘itohi matolú. Na‘á ne ngāue‘aki ki he ngaahi fo‘i lea  fakapipiki mei mu‘a mo fakapipiki mei muí ‘a e ngaahi mata‘itohi ‘ikai matolú (fakaava.) Ko e me‘angāue faingofua ko ení na‘e ‘ai ai ke faingofua ange hono ‘ilo‘i ‘e he kau akó ‘a e fo‘i lea tefito ‘o ha fo‘i lea faka-Hepelū, ‘o tokoni‘i ai kinautolu ‘i he founga ‘o hono ako ‘a e leá. Ko e New World Translation of the Holy Scriptures​—With References ‘oku ngāue‘aki ai ha founga ‘aonga meimei tatau ‘i he fakamatala ‘i laló. * Ko e sipela ‘o e fo‘i lea tefitó ‘oku taipe‘i matolu, pea ko e ngaahi fo‘i lea fakapipiki mei mu‘a pea mei muí ‘oku ‘i he mata‘itohi anga-mahení. Ko e konga ‘oku faka‘ilonga‘i ‘i he fakatātaá ‘oku fakahaa‘i ai ‘a e mata‘i-taipe na‘e ngāue‘aki ‘i he Tohi Tapu Faka-Hepelū ‘a Hutter ‘i he ‘Isikeli 18:4 pea na‘e ngāue‘aki ‘e he Reference Bible ‘i he fakamatala ‘i lalo ‘i he fo‘i veesi tatau.

Na‘e toe pulusi ‘e Hutter ‘a e tohi ‘oku anga-maheni‘aki hono ui ko e Fuakava Fo‘oú, ‘a ia ko hono konga tohí na‘e ‘i he lea ‘e 12. Ko e pulusinga ko ení na‘e pulusi ia ‘i Nuremberg ‘i he 1599 pea ‘oku fa‘a lave ki ai ko e Polikoloti Nuremberg. Na‘e loto ‘a Hutter ke fakakau ha liliu ‘i he lea faka-Hepeluú ‘o e Ngaahi Konga Tohi Tapu Faka-Kalisi Kalisitiané. Ka na‘á ne pehē neongo kapau “na‘á ne loto-lelei ke totongi ha fu‘u pa‘anga lahi” ki ha liliu faka-Hepelū pehē, ‘e hoko ‘a e fekumí ko e koto kulanoa. * Ko ia na‘á ne fili ai ke ne liliu pē ‘e ia ‘a e Fuakava Fo‘oú mei he lea faka-Kalisí ki he lea faka-Hepeluú. ‘I hono tuku ki tafa‘aki ‘a e ngāue kehe kotoa pē, na‘e ‘osi ai ‘a e liliu fakakātoa na‘e fai ‘e Hutter ‘i he ta‘u pē ‘e taha!

Na‘e lelei fēfē ‘a e liliu faka-Hepelū ‘o e Ngaahi Konga Tohi Tapu Faka-Kalisi Kalisitiane ‘a Hutter? Na‘e tohi ‘e ha mataotao Hepelū ‘iloa ko Franz Delitzch ‘i he senituli hono 19: “Ko ‘ene liliu faka-Hepeluú ‘oku fakahaa‘i ai hano mahino‘i ‘o e lea ‘oku hāhāmolofia ‘i he lotolotonga ‘o e kau Kalisitiané pea ‘oku kei mahu‘inga ke vakai ki ai, he ‘i he taimi ki he taimi na‘á ne mātu‘aki lavame‘a ‘i hono fili tonu mātē ‘a e kupu‘i lea totonú.”

Na‘e ‘ikai ke hoko ‘a Hutter ‘o tu‘umālie ‘i he‘ene ngāue liliú; ‘oku hā mahino na‘e ‘ikai ola lelei hono fakatau atu ‘ene ngaahi pulusingá. Ka neongo ia, ko ‘ene ngāué kuo ‘i ai ‘ene tākiekina mahu‘inga mo tu‘uloa. Ko e fakatātaá, ko ‘ene Fuakava Fo‘ou faka-Hepeluú na‘e fakalelei‘i pea toe pulusi ‘i he 1661 ‘e William Robertson pea toe fakalelei‘i mo pulusi ‘i he 1798 ‘e Richard Caddick. ‘I hono liliu mei he mu‘aki lea faka-Kalisí, na‘e fakalea totonu ‘e Hutter ‘a e ongo hingoa fakalakanga ko e Kyʹri·os (‘Eiki) mo e The·osʹ(‘Otua) ko e “Jehovah” (יהוה, JHVH) ‘a ia ko e konga tohí ko ha to‘o lea mei he Ngaahi Konga Tohi Tapu Faka-Hepeluú pe ‘i he feitu‘u na‘á ne ongo‘i ‘oku ‘uhinga kia Sihová. ‘Oku mahu‘inga eni koe‘uhí neongo ko e ngaahi liliu lahi ‘o e Fuakava Fo‘oú ‘oku ‘ikai ke ngāue‘aki ai ‘a e hingoa fakafo‘ituitui ‘o e ‘Otuá, ko e liliu ‘a Hutter ‘okú ne ngāue‘aki ia pea toe ‘omai ai ‘a e fakamo‘oni ki he lelei ‘a hono toe fakafoki mai ‘a e huafa ‘o e ‘Otuá ‘i he Ngaahi Konga Tohi Tapu Faka-Kalisi Kalisitiané.

‘I he taimi hono hoko te ke sio ai ki he huafa ‘o e ‘Otuá, ‘a e Sihová, ‘i he Ngaahi Konga Tohi Tapu Faka-Kalisi Kalisitiané pe sio ki ha fakamatala ‘i lalo ‘i he Reference Bible, manatu‘i ‘a e ngāue ‘a Elias Hutter mo ‘ene Ngaahi Tohi Tapu faka-Hepelū makehé.