Kuo ‘i ai nai ha taimi na‘á ke fakakaukau ke lau e Tohi Tapú ka ‘okú ke tuku ia koe‘uhí ko e ngaahi ‘uhinga ‘i ‘olungá? Ki he tokolahi, ko hono lau ‘o e Tohi Tapú ‘oku hā ngali fakapipiko. Kae fēfē kapau ‘okú ke ‘ilo‘i ‘oku lava ‘e he Tohi Tapú ‘o tokoni‘i koe ke ke hoko ‘o fiefia ange mo ma‘u ha mo‘ui ‘oku fiemālie angé? Fēfē kapau te ke ma‘u ha founga ‘oku fakamānako ange ki hono laú? Te ke loto-lelei ke vakai‘i ‘a e me‘a ‘oku ‘oatu ‘e he Tohi Tapú?

Vakai angé ki he ngaahi fakamatala ‘a ha ni‘ihi na‘a nau ma‘u ‘aonga mei hono kamata lau ‘o e Tohi Tapú.

Na‘e pehē ‘e Ezekiel, ‘a ia ‘oku ‘i hono ta‘u 20 tupu: “‘I he kuohilí na‘á ku hangē ai ko ha tokotaha ‘oku faka‘uli ‘i ha kā kae ‘ikai ha feitu‘u pau ke hu‘u ki ai. Ka ‘i hono lau e Tohi Tapú na‘e tokoni‘i ai au ke ma‘u ha mo‘ui mohu ‘uhinga. ‘Oku ‘i ai ha ngaahi fale‘i ‘aonga ‘oku lava ke u ngāue‘aki ‘i he ‘aho kotoa pē.”

Ko Frieda, ‘oku ‘i hono ta‘u 20 tupú, ‘okú ne fakamatala: “Na‘á ku fa‘a ‘ita vave. Ka ko ‘eku lau ‘a e Tohi Tapú, na‘á ku ako ai ke mapule‘i au. Na‘á ku toe anga-fakakaume‘a ange ai pea ma‘u mo ha ngaahi kaungāme‘a lahi he taimí ni.”

Ko ha fefine ‘i hono ta‘u 50 tupú ko Eunice na‘á ne pehē ko e Tohi Tapú, “‘Okú ne tokoni‘i au ke hoko ko ha tokotaha lelei ange, ‘o liliu ‘eku ngaahi tō‘onga na‘e ‘ikai saí.”

Hangē ko e kau lautohi ko ení mo ha laui miliona tupu kuo nau fakamo‘oni‘i, ko hono lau ‘a e Tohi Tapú ‘oku lava ke ne tokoni‘i koe ke ke ma‘u ha mo‘ui fiefia ange. (‘Aisea 48:17, 18) Ko e ni‘ihi eni ‘o e ngaahi me‘a te ne tokoni‘i koe (1) fai ha ngaahi fili lelei, (2) fili ha ngaahi kaume‘a mo‘oni, (3) fekuki mo e loto-mo‘ua mo e (4) ko e mahu‘inga tahá, ko hono ako ‘a e mo‘oni fekau‘aki mo e ‘Otuá. Ko e ngaahi tataki ‘a e Tohi Tapú ko e ha‘u ia mei he ‘Otuá, pea ‘i ho‘o muimui aí te ke ma‘u ‘aonga mei ai. ‘Oku ‘ikai ‘aupito ke ‘omai ‘e he ‘Otuá ha fale‘i ‘oku kovi.

Ko e me‘a mahu‘ingá ko ho‘o kamata lau ia. Ko e hā ‘a e ngaahi fokotu‘u ‘aonga ‘e lava ke ne ‘ai ke faingofua mo fakafiefia ange ho‘o lau ‘a e Tohi Tapú?