Ko e anga ia ‘o e ongo‘i ‘a e ki‘i ta‘ahine ta‘u 13 ‘i he‘ene ma‘u ha ki‘i kulī pusiaki ko ha me‘a‘ofa. Na‘e pehē ‘e ha fefine pisinisi lavame‘a ko e komipiuta na‘e ‘oange ‘e he‘ene tamaí ‘i he‘ene kei ‘i he ako mā‘olungá ko ha me‘a‘ofa ia na‘á ne liliu ‘ene mo‘uí. Na‘e ongo‘i ‘e ha husepāniti toki mali fo‘ou ko e fuofua kaati fakamanatu ‘o ‘ena nofo malí na‘e ngaohi ‘e hono uaifí ‘a e me‘a‘ofa lelei taha kuo faifai ange peá ne ma‘ú.

‘I he ta‘u taki taha, ‘oku fakamoleki ‘e he kakai tokolahi ‘a e taimi mo e ivi ‘i he kumi ki he me‘a‘ofa “lelei taha” ko ia ki ha kaume‘a pe ki ha kāinga ‘i ha taimi makehe. Pea ‘oku sai‘ia ‘a e fa‘ahinga tokolahi taha ‘i he fanongo ki he tali hangē ko ia na‘e lave ki ai ‘i he kamata‘angá. Fēfē koe? Te ke sai‘ia ke ke malava ke foaki pe ma‘u ha ngaahi me‘a‘ofa ‘oku fakahounga‘i mo‘oni?

‘Oku lava ke mātu‘aki fakamānako ‘a e ‘amanaki ko iá, ‘o ‘ikai koe‘uhi pē ko e ola ‘oku hoko ki he tokotaha ‘okú ne ma‘u ‘a e me‘a‘ofá ka ‘oku toe pehē foki ki he ongo‘i ‘oku ma‘u ‘e he tokotaha foakí. He ‘oku pehē ‘e he Tohi Tapú: “‘Oku ‘i ai ‘a e fiefia lahi ange ‘i he foaki atú ‘i he ma‘u maí.” (Ngāue 20:35) Ko e mo‘oni, ko e fiefia ‘oku ma‘u ‘i he foaki atú ‘e lava ke tupulaki kapau ‘oku fakamahu‘inga‘i mo‘oni ‘a e me‘a‘ofá ‘e he tokotaha ‘oku ‘ave ki aí.

‘E lava fēfē leva ke ke ‘ai ho‘o me‘a‘ofá ko ha matavai ‘o e fiefia mo‘oni kiate koe mo e tokotaha ‘oku ‘ave ki aí? Pea kapau ‘oku ‘ikai lava ke foaki ‘a e me‘a‘ofa “lelei taha,” ko e hā ‘e lava ke ke fai ke fakahounga‘i mo‘oni ‘a ho‘o me‘a‘ofá?