Ko e Hā ke Fakahāhā Ai ʻa e Houngaʻiá?

“Siʻi Raquel,

ʻOku ou fakamālō lahi atu ʻi hoʻo hoko ko ha matavai ʻo e fakalototoʻa kiate aú. Neongo pē ʻoku ʻikai nai te ke ʻiloʻi, ko ho natula fakalototoʻá mo e ngaahi lea ʻofá kuó ne tokoniʻi lahi au.”—Jennifer.

KUÓ KE maʻu ʻi ha taimi ha tohi taʻeʻamanekina ʻo fakahaaʻi ai ʻa e houngaʻia? Kapau ko ia, ko ha fakamatala pehē ʻoku ʻikai ha veiveiua kuó ne ʻai ke māfana ho lotó. Ko hono moʻoní, ʻoku fakanatula pē ke te loto ke ongoʻi ʻoku fakamahuʻingaʻi mo fakahoungaʻi kita.—Mātiu 25:19-23.

Ko e fakahāhā ʻo e fakamāloó ʻoku faʻa fakatupunga ai ke ʻi ai ha haʻi vāofi ʻi he vahaʻa ʻo e tokotaha foakí mo e tokotaha talí. ʻIkai ko ia pē, ko ha tokotaha ʻokú ne fakahāhā ʻa e houngaʻiá ʻokú ne molomolo muivaʻe ʻia Sīsū Kalaisi, ʻa ia naʻe ʻikai ʻaupito te ne taʻefakatokangaʻi ʻa e ngaahi ngāue lelei ʻa e niʻihi kehé.—Maake 14:3-9; Luke 21:1-4.

Ko e meʻa pangó, ʻoku hā ngali fakautuutu e hāhāmolofia ʻa e fakahāhā ʻo e houngaʻia fakafoʻituituí, ʻi he leá pea mo e tohí. Naʻe fakatokanga ʻa e Tohi Tapú ʻi he lolotonga ʻa e “kuonga fakamui,” ʻe hoko ai ʻa e kau tangatá ʻo “taʻehounga.” (2 Timote 3:1, 2) Kapau ʻoku ʻikai ke tau tokanga, ko e mafolalahia ʻo e taʻehoungaʻia ʻa ia ʻoku hā mahino he ʻaho ní ʻe lava ke ne kāsia ha ongoʻi māfana pē ʻo e houngaʻiá ʻa ia ʻoku tau maʻu nai.

Ko e hā ʻa e ngaahi sitepu ʻaonga ʻe lava ke fou ai ʻa e ngaahi mātuʻá ke akoʻi ʻenau fānaú ki he founga ke fakahaaʻi ai ʻa e houngaʻiá? Ko hai ʻoku totonu ke tau fakahāhā ki ai ʻetau houngaʻiá? Pea ko e hā ʻoku totonu ai ke tau houngaʻia, ʻo tatau ai pē kapau ko e faʻahinga takatakai ʻiate kitautolú ko e kau taʻehounga?

ʻI he Lotoʻi Siakale Fakafāmilí

ʻOku ngāue mālohi ʻa e ngaahi mātuʻá ke tokonaki maʻa ʻenau fānaú. Neongo ia, ʻi he taimi ʻe niʻihi ʻoku ongoʻi nai ai ʻe he ngaahi mātuʻá ʻoku taʻefakahoungaʻi ʻenau ngaahi feingá. Ko e hā ʻe lava ke nau fai ke fakaleleiʻiʻaki ʻa e tuʻungá ni? ʻOku fiemaʻu ki ai ʻa e meʻa ʻe tolu.

(1) Faʻifaʻitakiʻanga. Hangē ko ia ʻi he tafaʻaki lahi taha ʻo hono akoʻi ʻo e fānaú, ko e faʻifaʻitakiʻangá ko ha founga ola lelei ia. ʻI he fekauʻaki mo ha faʻē ngāue mālohi ʻi ʻIsileli ʻo e kuonga muʻá, ʻoku pehē ʻe he Tohi Tapú: “ʻOku tuʻu hake ʻene fanau, ʻo nau tala monū ki ai.” Naʻe ako mei fē ʻe he fānaú ni ke fakahāhā ʻa e houngaʻiá? ʻOku ʻomai ʻe he toenga ʻo e vēsí ha tokoni. ʻOku pehē ai: “Ko hono husepaniti foki, [ʻokú ne] fakamalo kiate ia.” (Palovepi 31:28) Ko e ngaahi mātuʻa ʻoku nau fefakahāhāʻaki ʻa e houngaʻiá ʻoku nau fakahaaʻi ki heʻenau fānaú ko e ngaahi lea peheé ʻoku ʻoatu ai ʻa e fiefia ki he tokotaha ʻoku fai ki aí, fakaleleiʻi ai ʻa e ngaahi vahaʻangatae ʻi he fāmilí, pea ko ha fakaʻilonga ia ʻo e matuʻotuʻa.

Ko ha tamai ko hono hingoá ko Stephen ʻokú ne pehē, “Kuó u feinga ke fokotuʻu ʻa e faʻifaʻitakiʻanga ki heʻeku fānaú ʻaki ʻa e fakamālō ki hoku uaifí ʻi heʻene feimeʻatokoní.” Ko e hā ʻa e olá? “Kuo fakatokangaʻi eni ʻe hoku ongo ʻofefiné, pea kuo tokoniʻi ai kinaua ke na tokanga lahi ange ki hono fakahāhā ʻo e houngaʻiá,” ko e lau ia ʻa Stephen. Kapau ʻokú ke mali, ʻokú ke fakamālō maʻu pē ki ho hoá ʻi heʻene fai ʻa e ngaahi ngāue fakaʻahó ʻa ia ʻoku faingofua ke tukunoaʻí? ʻOkú ke fakamālō ki hoʻo fānaú, ʻo aʻu ki he taimi ʻoku nau fai ai ʻa e meʻa ʻoku ʻamanekina meia kinautolú?

(2) Akoʻi. Ko e ngaahi ongoʻi ʻo e fakamāloó ʻoku hangē ia ha ngaahi matalaʻiʻakaú. ʻOku fiemaʻu ke  tokangaʻi lelei ia ke ne ʻomai ʻa e matala lelei tahá. ʻE lava fēfē ke tokoniʻi ʻe he ngaahi mātuʻá ʻenau fānaú ke nau fakatupulekina pea fakahāhā ʻa e houngaʻiá? Naʻe fakamamafaʻi ʻe he tuʻi poto ko Solomoné ʻa e meʻa tefito ʻe taha ʻi heʻene tohi: “Ko e loto ʻo e faitotonu ʻoku ne fakakaukau ha tali lelei.”—Palovepi 15:28.

Ngaahi mātuʻa, ʻe lava ke mou akoʻi hoʻomou fānaú ke nau fakakaukau fekauʻaki mo e feinga pea mo e nima-homo ʻoku fakahāhā ʻi ha meʻaʻofa pē ʻoku nau maʻu? Ko e faʻahinga fakakaukauloto ko ení ʻokú ne ʻai ke tupulekina ʻa e houngaʻiá ʻo hangē ko e ʻai ʻe he kelekele leleí ke tupulekina ʻa e matalaʻiʻakaú. Ko Maria, ʻa ia kuó ne tauhi hake ʻa e fānau ʻe toko tolu, ʻokú ne pehē: “ʻOku fiemaʻu ʻa e taimi ke tangutu hifo ai mo hoʻo fānaú ʻo fakamatalaʻi kiate kinautolu ʻa e meʻa ʻoku hoko ʻi he taimi ʻoku foaki ai ʻe ha taha ha meʻaʻofá—ko e tokotaha ko iá naʻá ne fakakaukau fekauʻaki mo koe fakafoʻituitui peá ne loto ke fakahaaʻi ʻa e lahi ʻo ʻene tokanga kiate koé. Ka ʻoku ou ongoʻi ʻoku tuha ia mo e feinga.” Ko e ngaahi talanoa peheé ʻoku tokoniʻi ai ʻa e fānaú ke nau ako ʻo ʻikai ki he meʻa pē ʻoku totonu ke nau leaʻaki ʻi hono fakahāhā ʻa e houngaʻiá kae toe pehē foki ki he ʻuhinga ʻoku totonu ai ke nau leaʻaki iá.

Ko e ngaahi mātuʻa potó ʻoku nau tokoniʻi ʻenau fānaú ke nau fakaʻehiʻehi mei he ongoʻi ko e ngaahi meʻa lelei kotoa pē ʻoku nau maʻú ʻoku tuha pē ia mo kinautolu. a Ko e fakatokanga ʻoku maʻu ʻi he Palovepi 29:21 (NW) fekauʻaki mo e feangainga mo e kau sevānití ʻoku ngāueʻaki tatau pē ia ki he fānaú: “Kapau ʻoku fakapelepeleʻi ʻe ha taha ʻa ʻene sevānití mei heʻene kei siʻí, ʻi heʻene moʻui ʻamuí ʻe aʻu ʻo ne hoko ai ko ha tokotaha taʻehoungaʻia.”

ʻE lava fēfē ke tokoniʻi ʻa e fānau iiki ʻaupitó ke nau fakahaaʻi ʻa e houngaʻiá? ʻOku pehē ʻe Linda, ko ha faʻē ʻa e toko tolu, “Ko hoku malí mo au naʻá ma fakalototoʻaʻi ʻema fānaú ke nau tokoni ki he ngaahi tohi fakamālō naʻá ma faí ʻaki hono fakakau ki ai ha tā fakatātā pe ʻi heʻenau fakamoʻoni hingoa ʻi he kātí.” Ko e moʻoni, ʻoku faingofua nai ʻa e fakatātaá pea ʻikai sai ʻa e mataʻitohí, ka ko e lēsoni ʻoku ako ʻe he fānaú mei he meʻa ko ení ʻoku ʻaonga tuʻuloa.

(3) Kītaki. Ko kitautolu kotoa ʻoku tau maʻu ʻa e hehema mei hotau fanauʻí ke siokita, pea ko e hehema ko ení ʻe lava ke ne lōmekina ʻa e fakahāhā ʻo e fakamāloó. (Senesi 8:21; Mātiu 15:19) Neongo ia, ʻoku ekinaki ʻa e Tohi Tapú ki he kau sevāniti ʻa e ʻOtuá: “Ke mou tuku ke fai ai pe homou fakafoʻou ʻe he Laumalie ʻo homou ʻatamai; pea ke mou kofuʻaki ʻa e tangata foʻou, ʻa ia naʻe ngaohi ke hoko ki he ʻOtua.”—Efeso 4:23, 24.

Kae kehe, ko e ngaahi mātuʻa taukeí, ʻoku nau ʻiloʻi ko hono tokoniʻi ʻa e fānaú ke nau “kofuʻaki ʻa e tangata foʻou” ʻoku faingofua ange hono leaʻakí ʻi hono faí. Ko Stephen, naʻe lave ki ai ki muʻá, ʻokú ne pehē, “Ko hono akoʻi homa ongo ʻofefiné ke na fakamālō ʻiate kinaua pē ʻo ʻikai fakaʻaiʻaí, naʻe hā ngali ke ʻi ha taimi lōloa.” Ka naʻe ʻikai ke foʻi ʻa Stephen mo hono malí. “ʻI he kītaki lahi,” ko e hoko atu ia e lau ʻa Stephen, “naʻe ako ʻe heʻema ongo tamaikí ʻa e lēsoní. ʻOkú ma laukau he taimí ni ʻi he anga ʻo ʻena fakahāhā ʻa e houngaʻia ki he niʻihi kehé.”

Fēfē ʻa e Ngaahi Kaumeʻá mo e Kaungāʻapí?

ʻI he taimi ʻoku ʻikai ke tau fakamālō aí, ʻoku ʻikai nai ke tau taʻehoungaʻia, ka ko e ngalo pē. ʻOku mahuʻinga moʻoni ke ʻikai ngata pē ʻi heʻetau ongoʻi houngaʻiá kae toe fakahāhā ia? Ke tali ʻa e fehuʻi ko iá, fakakaukau angé ki ha meʻa naʻe hoko fekauʻaki mo Sīsū pea mo ha kau kilia.

Lolotonga ʻene fononga ki Selusalemá, naʻe fetaulaki ai ʻa Sīsū mo e kau tangata kilia ʻe toko hongofulu. ʻOku fakamatala ʻi he Tohi Tapú: “Pea kalanga ʻa e kau tangata ko ia, ʻo nau pehē, ʻEī Sīsū, ʻaloʻofa mai. Pea ʻi heʻene vakai ki ai naʻa ne pehe kiate kinautolu, Mou ō pe, ʻo fakaha kimoutolu ki he kau taulaʻeiki. Pea ʻiloange, ʻi heʻenau mole atu, naʻe fakamaʻa kinautolu. Pea ko e toko taha ʻiate kinautolu, ʻi heʻene vakai leva kuo ne moʻui, naʻa ne tafoki, ʻo kalanga leʻo-lahi heʻene fakamālōʻia ʻa e ʻOtua; ʻo ne foʻohifo ʻi he vaʻe ʻo Sīsū, ʻo ne fakafetaʻi kiate ia: pea ko e toko taha ko ia ko e Samēlia.”—Luke 17:11-16.

Naʻe tukunoaʻi ʻe Sīsū ʻa e taʻemalava ʻe he niʻihi kehé ke fakahaaʻi ʻa e houngaʻiá? ʻOku hoko atu ʻa e fakamatalá: “Bea lea a Jisu, o beheage, Ikai nae fakamaa ae toko hogofulu? ka kofaa ae toko hiva? Oku ikai iloa ke foki mai ha taha ke fakamalo ki he Otua, ka koe muli ni be.”—Luke 17:17, 18, PM.

Ko e kau kilia kehe ʻe toko hivá naʻe ʻikai ko e kau tangata fulikivanu. Ki muʻá, naʻa nau fakahaaʻi fakahāhā ʻenau tui kia Sīsū mo e loto-lelei ke talangofua  ki heʻene ngaahi fakahinohinó, ʻa ia naʻe kau ki ai ʻa e fononga ki Selusalema ke fakahā kinautolu ki he kau taulaʻeikí. Kae kehe, neongo ʻoku ʻikai ha veiveiua naʻa nau ongoʻi houngaʻia lahi ki he ngāue ʻofa ʻa Sīsuú, naʻe ʻikai te nau lava ʻo fakahāhā kiate ia ʻa e houngaʻia ko iá. Naʻe mamahi ʻa Kalaisi ʻi heʻenau tōʻongá. Fēfē kitautolu? ʻI he failelei mai ʻa ha taha kiate kitautolú, ʻoku tau vave ke fakamālō pea ke fakahaaʻi ʻi heʻene feʻungamālié ʻa e houngaʻia ʻi hono ʻave kiate ia ha kiʻi tohi fakamālō?

ʻOku pehē ʻe he Tohi Tapú ko e ʻofá “ʻoku ʻikai te ne fai taʻetāu, ʻoku ʻikai te ne kumi ʻene lelei aʻana.” (1 Kolinito 13:5) Ko ia ai, ko e fakahāhā loto-moʻoni ʻo e houngaʻiá ʻoku ʻikai ngata pē ko ha fakaʻilonga ia ʻo e anga taau kae toe pehē foki ko ha fakahāhā ia ʻo e ʻofá. Hangē ko hono akoʻi mai ʻe he meʻa naʻe hoko fekauʻaki mo e kau kiliá, ko e faʻahinga ʻoku nau fakaʻamu ke fakahōifuaʻi ʻa Kalaisí ʻoku nau moʻuaʻaki ʻa e ʻofa mo e houngaʻia pehē ki he tokotaha kotoa, ʻo tatau ai pē pe ko e hā honau tupuʻangá, matakalí pe ko e lotú.

ʻEke hifo kiate koe, ‘ko fē ʻa e taimi fakamuimui naʻá ku fakamālō ai ki ha kaungāʻapi, ko ha kaungāngāue, kaungāako, mēmipa ʻo e kau ngāue he falemahakí, ko ha tokotaha faifakatau, pe ko ha taha kehe pē naʻá ne tokoniʻi au?’ Fēfē ke tauhi ha lēkooti ʻi ha ʻaho ʻe taha pe ua, ʻo fakaʻilongaʻi ai ʻa e lahi ʻo e taimi ʻokú ke lea fakamālō moʻoni ai pe fai ha tohi fakamālō? Ko ha lēkooti pehē ʻe tokoniʻi nai ai koe ke ke sio ki he meʻa ʻe lava ke ke fakaleleiʻi ʻi hono fakahāhā ʻa e houngaʻiá.

Ko e moʻoni, ko e tokotaha ʻoku tuha lahi taha mo ʻetau fakamāloó ko e ʻOtua ko Sihová. Ko e Tokotaha-Foaki ia ʻo e ‘foaki lelei, mo e meʻaʻofa haohaoa’ kotoa pē. (Semisi 1:17) Ko fē ʻa e taimi fakamuimui naʻá ke fakahāhā ai ʻa e houngaʻia loto-moʻoni ki he ʻOtuá ʻi he ngaahi meʻa pau kuó ne fai maʻau?—1 Tesalonaika 5:17, 18.

Ko e Hā ke Fakahaaʻi Ai ʻa e Houngaʻiá Neongo ʻOku ʻIkai ke Fai Pehē ʻa e Niʻihi Kehé?

ʻOku ʻikai nai ke fakahaaʻi ʻe he niʻihi kehé ʻa e houngaʻiá ʻi he taimi ʻoku tau fai ai ha meʻa maʻanautolu. Ko e hā leva ʻoku totonu ai ke tau fakahāhā ʻa e houngaʻiá neongo ʻoku ʻikai ke fai pehē ʻa e niʻihi kehé? Fakakaukau angé ki ha ʻuhinga pē ʻe taha.

ʻI he failelei ki he faʻahinga ʻoku taʻehoungaʻiá, te tau faʻifaʻitaki ai ki hotau Tokotaha-Fakatupu anga-ʻofa ko Sihova ko e ʻOtuá. Ko e moʻoniʻi meʻa ko ia ʻo e ʻikai ke houngaʻia ʻa e tokolahi ʻi he ʻofa ʻoku fakahāhā ʻe Sihová ʻoku ʻikai ke taʻofi ai ia mei he failelei kia kinautolú. (Loma 5:8; 1 Sione 4:9, 10) ʻOkú ne “fakahopo ʻene laʻā ki he kovi mo e lelei, pea ʻoku ne fakaʻuha ki he faitotonu mo e faihala.” Kapau ʻoku tau feinga ke fakahaaʻi ʻa e houngaʻiá neongo ʻa e moʻui ʻi ha māmani taʻehoungá, te tau fakamoʻoniʻi ai ko kitautolú ko e fānau ʻa “[ʻetau] Tamai ʻoku ʻi Hevani.”—Mātiu 5:45.

[Fakamatala ʻi lalo]

[Fakamatala ʻi he peesi 23]

Tauhi ha lēkooti ʻi ha ʻaho ʻe taha pe ua, ʻo fakaʻilongaʻi ai ʻa e lahi ʻo e taimi ʻokú ke lea fakamālō moʻoni aí

[Fakatātā ʻi he peesi 23]

Naʻa mo e fānau īkí ʻe lava ke akoʻi ke nau fakahāhā ʻa e houngaʻiá

[Fakatātā ʻi he peesi 23]

Fokotuʻu ha faʻifaʻitakiʻanga ki hoʻo fānaú ʻi hono fakahāhā ʻo e houngaʻiá