ʻOku tau moʻui ʻi he ngaahi taimi ʻo e loto-moʻuá, ko e “ngaahi taimi fakalilifu ʻa ia ʻe faingataʻa ke fekuki mo ia.” (2 Tīmote 3:1) Ko e tokolahi ʻoku nau fehangahangai mo e tōlalo fakaʻekonōmika, māvahevahe fakafāmilí, taú, lahi fau ʻa e mahaki fakatupu maté mo e fakatamaki fakanatula pe fakatupu ʻe he tangatá. Tānaki atu ki heni mo e ngaahi hohaʻa fakafoʻituitui kehe: ‘ʻE tupu ʻa e meʻa ko ení ʻi hoku sinó pea u hoko ʻo kanisā?’ ‘Ko e hā ʻa e faʻahinga ʻātakai ʻe tupu hake ai hoku fanga mokopuná?’

ʻOku ʻikai kovi ʻa e loto-moʻua kotoa pē. ʻOku fakanatula pē ke tau manavasiʻi ki muʻa ʻi ha sivi, fakaʻekeʻeke ki ha ngāue pe fakahoko ha meʻa. Pea ko e manavahē totonu ki ha fakatuʻutāmaki ʻoku tokoniʻi ai kitautolu ke fakaʻehiʻehi mei ha maumau. Ka ko e loto-moʻua tōtuʻa mo hokohokó ʻoku fakatupu maumau. Ko ha ngaahi ako ki muí ni naʻe kau ai ha kakai lalahi ʻe toko 68,000 naʻe hā mei ai naʻa mo e loto-moʻua siʻisiʻí ʻoku tupulaki ai ʻa e mate mutukiá. ʻI ha ʻuhinga lelei, naʻe ʻeke ai ʻe Sīsū: “Ko hai ʻiate kimoutolu ʻe lava ʻe heʻene loto-moʻuá ke tānaki atu ha kiupite ʻe taha ki he lōloa ʻo ʻene moʻuí?” Ko e moʻoni, ko e loto-moʻuá ʻoku ʻikai lava ia ke ne fakalōloaʻi ha moʻui ʻa ha taha. Ko ia ai naʻe fai ʻe Sīsū ʻa e akonaki: “Tuku hoʻomou loto-moʻua.” (Mātiu 6:25, 27) Ka ʻe lava fēfē ke hoko moʻoni eni?

Ko e talí ʻoku kau ki ai ʻa hono ngāueʻaki ʻa e poto ʻaonga, fakatupulekina ʻa e tui moʻoni ki he ʻOtuá pea langa hake ha ʻamanaki moʻoni ki he kahaʻú. Neongo kapau ʻoku ʻikai ke tau fehangahangai he taimí ni mo ha ngaahi tuʻunga faingataʻa, ka te tau fehangahangai nai mo ia ʻi he kahaʻú. Te tau vakai angé ki he anga hono tokoniʻi ʻe he ngaahi founga ko ení ʻa Paul, Janet mo Alona ke fekuki mo e loto-moʻuá.