Ko e masiva ʻangoʻangó ʻokú ne tāmateʻi ʻa e laui miliona ʻi he taʻu taki taha hangē ko e fasimanavá mo e mahakí. Neongo ʻoku tuʻumālie ʻa e ngaahi feituʻu ʻe niʻihi ʻi he māmaní, ka ʻoku kei masiva ʻangoʻango pē ʻa e kakai tokolahi. ʻOku fakahaaʻi ʻi he Tohi Tapú ko e masivá ko ha palopalema anga-maheni ia ʻi he faʻahinga ʻo e tangatá.—Lau ʻa e Sione 12:8.

ʻE fiemaʻu ha founga-pule ki he māmaní ke ne fakangata ʻa e masivá. ʻOku fiemaʻu ke maʻu ʻe he founga-pule ko iá ʻa e mālohi ke vahevahe tatau ʻa e ngaahi meʻá ki he māmaní pea fakangata ʻa e taú ʻa ia ko e tupuʻanga tefito ia ʻo e masivá. Kuo talaʻofa ʻe he ʻOtuá ha founga-pule pehē ki he māmaní.—Lau ʻa e Taniela 2:44.

Kuo fakanofo ʻe he ʻOtuá ʻa hono ʻAló, ʻa Sīsū, ke ne pule ki he faʻahinga kotoa ʻo e tangatá. (Saame 2:4-8) ʻE fakahaofi ʻe Sīsū ʻa e masivá pea fakangata ʻa e ngaohikoviá mo e fakamālohí.—Lau ʻa e Saame 72:8, 12-14.

Hangē ko ia naʻe tomuʻa talá ko Sīsū ko e “ʻEiki ʻo e Melino,” te ne fokotuʻu ʻa e melino mo e malu ʻi he māmaní. Pea ko e faʻahinga kotoa ʻi he māmaní te nau nofo ʻi honau taki taha ʻapi, maʻu ha ngāue fakafiemālie pea lahi mo e meʻakaí.—Lau ʻa e ʻAisea 9:6, 7 (9:5, 6, PM); 65:21-23.