Ko e huafa fakaʻotuá, ʻa ia ʻoku fakafofongaʻi ʻe he ngaahi foʻi konisinānite faka-Hepelū ʻe fā ko e יהוה, ʻoku hā meimei tuʻo 7,000 ia ʻi he Ngaahi Konga Tohi Tapu Faka-Hepeluú. ʻOku fakalea ʻe he liliu ko ení ʻa e mataʻitohi ʻe fā ko iá, ʻa ia ʻoku ʻiloa ko e Tetakalamatoní, ko e “Sihova.” Ko e huafa ko iá ʻa e hingoa ʻoku toutou hā tuʻo lahi taha ʻi he Tohi Tapú. Neongo ʻoku lave ʻa e kau hiki-tohi fakamānavaʻí ki he ʻOtuá ʻo ngāueʻaki ʻa e ngaahi hingoa fakalakanga lahi mo e ngaahi foʻi lea fakamatalaʻi, hangē ko e “Māfimafi-Aoniu,” “Fungani Māʻolunga,” mo e “ʻEiki,” ko e Tetakalamatoní ʻa e hingoa fakafoʻituitui pē ʻe taha ʻoku nau ngāueʻaki ke uiʻaki ʻa e ʻOtuá.

Ko Sihova ko e ʻOtuá tonu naʻá ne tataki ʻa e kau hiki Tohi Tapú ke ngāueʻaki hono huafá. Ko e fakatātaá, naʻá ne fakamānavaʻi ʻa e palōfita ko Sioelí ke ne tohi: “Ko e tokotaha kotoa pē ʻoku ui ki he huafa ʻo Sihová ʻe fakahaofi.” (Sioeli 2:32) Pea naʻe ʻai ʻe he ʻOtuá ʻa e tokotaha-tohi-saame ʻe taha ke ne tohi: “ʻOfa ke ʻilo ʻe he kakaí ko koe, ʻa ia ko ho huafá ko Sihova, ko koe pē toko taha ʻa e Fungani Māʻolunga ʻi he māmaní kotoa.” (Saame 83:18) Ko hono moʻoní, ʻoku hā tuʻo 700 nai ʻa e huafa fakaʻotuá ʻi he tohi Sāmé ʻataʻatā pē—ko ha tohi fakaetaʻanga ia naʻe hiki ke hivaʻi pea mo lau maʻuloto ʻe he kakai ʻa e ʻOtuá. Ko ia, ko e hā ʻoku ʻikai ʻasi ai ʻa e huafa ʻo e ʻOtuá ʻi he ngaahi liliu Tohi Tapu lahi? Ko e hā ʻoku ngāueʻaki ai ʻe he liliu ko ení ʻa e sipela “Sihová”? Pea ko e hā ʻoku ʻuhinga ki ai ʻa e huafa fakaʻotua, ko e Sihová?

Ko e hā ʻoku ʻikai ʻasi ai ʻa e huafá ʻi he ngaahi liliu Tohi Tapu lahi? ʻOku kehekehe ʻa e ʻuhingá. ʻOku ongoʻi ʻe he niʻihi ʻoku ʻikai fiemaʻu ki he ʻOtua Māfimafi-Aoniú ha huafa makehe ke uiʻaki ia. ʻOku hā ngali kuo tākiekina ʻa e niʻihi ʻe he talatukufakaholo faka-Siu ʻa ia ko e fakaʻehiʻehi mei hono ngāueʻaki ʻa e huafá, koeʻuhí nai ko e manavahē ki hano taʻefakatoputapuʻi ia. Lolotonga iá ʻoku tui ʻa e niʻihi, koeʻuhí ko e ʻikai lava ʻe ha taha ke ne fakapapauʻi ʻa e puʻaki tonu mātē ʻo e huafa ʻo e ʻOtuá, ʻoku lelei ange ke ngāueʻaki pē ha hingoa fakalakanga, hangē ko e “ʻEiki” pe  “ʻOtua.” Kae kehe, ko e taʻelototatau peheé ʻoku ʻikai falalaʻanga ia koeʻuhi ko e ngaahi ʻuhinga ko ení:

• Ko e faʻahinga ko ia ʻoku nau fakakikihiʻi ʻoku ʻikai fiemaʻu ki he ʻOtua Māfimafi-Aoniú ha huafa makehé ʻoku nau tukunoaʻi ʻa e fakamoʻoni ko ia ʻoku ʻasi ʻa e huafa fakafoʻituitui ʻo e ʻOtuá ʻi he ngaahi muʻaki tatau ʻo ʻene Folofolá, ʻo kau ai ʻa e ngaahi tatau naʻe fakatolonga mai mei he taimi ki muʻa ʻia Kalaisí. Hangē ko ia ne hā ʻi ʻolungá, ko e ʻOtuá naʻá ne tataki ke fokotuʻu ʻa hono huafá ʻi heʻene Folofolá ʻo tuʻo 7,000 nai. ʻOku hā mahino, ʻokú ne fiemaʻu mai ke tau ʻilo mo ngāueʻaki hono huafá.

• Ko e kau liliu-lea ʻoku nau toʻo ʻa e huafá koeʻuhi ko hono tokaʻi ʻa e talatukufakaholo faka-Siú ʻoku ʻikai te nau fakatokangaʻi ha moʻoniʻi meʻa tefito. Neongo naʻe fakafisi ʻa e kau sikalaipe Siu ʻe niʻihi ke puʻaki ʻa e huafá, naʻe ʻikai te nau toʻo ia mei heʻenau ngaahi tatau ʻo e Tohi Tapú. Ko e ngaahi takainga tohi ʻo e kuonga muʻá naʻe maʻu ʻi Kumilani, ofi ki he Tahi Maté, ʻoku lahi ʻa e ʻasi ai ʻa e huafá. ʻOku fakahuʻunga ʻe he kau liliu Tohi Tapu ʻe niʻihi naʻe hā ʻa e huafa fakaʻotuá ʻi he muʻaki tataú ʻi heʻenau fakafetongiʻaki ia ʻa e hingoa fakalakanga ko e “ʻEIKI” ʻi he ngaahi mataʻitohi lalahi. Ka ʻoku kei tuʻu pē ʻa e fehuʻí, Ko e hā kuo ongoʻi tauʻatāina ai ʻa e kau liliu-leá ni ke fakafetongi pe toʻo ʻa e huafa ʻo e ʻOtuá mei he Tohi Tapú lolotonga ia ʻenau lāuʻilo ʻoku ʻasi ia ʻi he Tohi Tapú ʻo tuʻo laui afe? Ko hai ʻoku nau tui naʻá ne ʻoange ʻa e mafai ke nau fai ha liliu peheé? Ko kinautolu pē ʻoku nau ʻiló.

• Ko e faʻahinga ko ia ʻoku nau pehē ʻoku ʻikai totonu ke ngāueʻaki ʻa e huafa fakaʻotuá koeʻuhí ʻoku ʻikai ʻiloʻi tonu mātē ʻa e anga hono puʻaki iá te nau kei ngāueʻaki tauʻatāina pē ʻa e hingoa Sīsuú. Kae kehe, naʻe leaʻaki ʻe he kau ākonga ia ʻa Sīsū ʻi he ʻuluaki senitulí ʻa hono hingoá ʻo kehe ʻaupito ia mei he founga ʻoku leaʻaki ʻe he kau Kalisitiane tokolahi he ʻaho ní. Ki he kau Kalisitiane Siú, naʻe puʻaki nai ʻa e hingoa Sīsuú ia ko e Ye·shuʹa‛. Pea ko e hingoa fakalakanga ko e “Kalaisi” ko e Ma·shiʹach, pe “Mīsaia.” Naʻe ui ia ʻe he kau Kalisitiane lea faka-Kalisí ko I·e·sousʹ Khri·stosʹ, pea ko e kau Kalisitiane lea faka-Latiná ko Ieʹsus Chriʹstus. ʻI hono fakamānavaʻí, ko e liliu faka-Kalisi ʻo hono hingoá naʻe lēkooti ia ʻi he Tohi Tapú, ʻo fakahaaʻi ai naʻe muimui ʻa e kau Kalisitiane ʻi he ʻuluaki senitulí ʻi he ʻalunga ʻuhinga lelei ʻo hono ngāueʻaki ʻa e sipela ʻo e hingoa naʻe angamaheniʻaki ʻi heʻenau leá. ʻI he founga meimei tatau, ʻoku ongoʻi ʻe he Kōmiti Liliu Tohi Tapu Māmani Foʻoú ʻoku ʻuhinga lelei ke ngāueʻaki ʻa e huafa “Sihová,” neongo ko e fakalea ko iá ʻoku ʻikai ko e founga tonu mātē ia naʻe puʻaki ai ʻa e huafa fakaʻotuá ʻi he lea faka-Hepelū ʻo e kuonga muʻá.

Ko e hā ʻoku ngāueʻaki ai ʻe he Liliu Tohi Tapu Māmani Foʻoú ʻa e sipela “Sihová”? ʻI he lea faka-Pilitāniá, ko e foʻi mataʻitohi ʻe fā ʻo e Tetakalamatoní (יהוה) ʻoku fakafofongaʻiʻaki ʻa e ngaahi konisinānite YHWH. Hangē pē ko e ngaahi foʻi lea kotoa naʻe tohiʻi ʻi he lea faka-Hepelū ʻo e kuonga muʻá, ko e Tetakalamatoní naʻe ʻikai ha ngaahi vauele ai. ʻI he taimi naʻe ngāue fakaʻaho ʻaki ai ʻa e lea faka-Hepelū ʻo e kuonga muʻá, naʻe faingofua pē ki he kau lautohí ke nau ʻai ʻa e ngaahi vauele naʻe feʻungamālie ki aí.

 Hili ha taʻu nai ʻe taha afe mei he kakato ʻa e Ngaahi Konga Tohi Tapu Faka-Hepeluú, naʻe faʻu ai ʻe he kau mataotao Siú ha faʻunga ʻo e ngaahi fakaʻilonga puʻaki lea, ʻa ia te ne fakahaaʻi ko fē ʻa e ngaahi vauele ʻe ngāueʻaki ʻi he lautohi ʻi he lea faka-Hepeluú. Kae kehe, ʻi he aʻu mai ki he taimi ko iá, naʻe maʻu ʻe he kau Siu tokolahi ʻa e fakakaukau fakafaʻahikehe ʻa ia naʻe hala ai ke lea leʻo-lahi ʻaki ʻa e huafa fakafoʻituitui ʻo e ʻOtuá, ko ia naʻa nau ngāueʻaki ʻa e ngaahi kupuʻi lea ke fakafetongiʻaki ia. Ko ia, ʻoku hā ngali ʻi he taimi naʻa nau hiki-tatau ai ʻa e Tetakalamatoní, naʻa nau fakatahaʻi ʻa e ngaahi vauele ki he ngaahi kupuʻi lea fakafetongí mo e konisinānite ʻe fā ʻoku fakafofongaʻiʻaki ʻa e huafa fakaʻotuá. Ko ia ai, ko e ngaahi tatau tohinima ʻoku ʻi ai ʻa e ngaahi fakaʻilonga vauele ko iá ʻoku ʻikai tokoni ia ki hono fakapapauʻi pe naʻe anga-fēfē hono fuofua puʻaki ʻa e huafá ʻi he lea faka-Hepeluú. ʻOku ongoʻi ʻe he niʻihi naʻe puʻaki ʻa e huafá ko e “Yahweh,” lolotonga ia ʻoku fokotuʻu mai ʻe he niʻihi kehe ia ʻa e ngaahi puʻaki kehe. Ko ha Takainga Tohi Tahi Mate ʻoku ʻi ai ha konga ʻo e tohi Livitikó ʻi he lea faka-Kalisí ʻoku liliu fakahangatonu ai ʻa e huafa fakaʻotuá ko e Iao. Tuku kehe ʻa e sipela ko iá, ʻoku toe fokotuʻu mai ʻe he muʻaki kau hiki-tohi Kalisí ia ʻa e ngaahi puʻaki ko e Iae, I·a·beʹ, mo e I·a·ou·eʹ. Kae kehe, ʻoku ʻikai ha ʻuhinga ia ke hoko ai ʻo fuʻu fakamatematē ʻi he meʻá ni. ʻOku ʻikai pē ke tau ʻilo ʻe kitautolu ʻa e anga hono puʻaki ʻe he kau sevāniti ʻa e ʻOtuá ʻi he kuonga muʻá ʻa e huafá ni ʻi he lea faka-Hepeluú. (Sēnesi 13:4; ʻEkisoto 3:15) Ko e meʻa ʻoku tau ʻiló naʻe toutou ngāueʻaki ʻe he ʻOtuá hono huafá ʻi he fetuʻutaki mo ʻene kakaí, pea naʻa nau lea kiate ia ʻi he huafa ko iá, pea ngāue tauʻatāina ʻaki ia ʻi heʻenau lea ki he niʻihi kehé.—ʻEkisoto 6:2; 1 Tuʻi 8:23; Saame 99:9.

Ko ia, ko e hā ʻoku ngāueʻaki ai ʻi he liliu ko ení ʻa e sipela “Sihová”? Koeʻuhí ko e sipela ko ia ʻo e huafa fakaʻotuá kuo fuoloa hono ngāueʻaki ʻi he lea faka-Tongá.

Ko e ʻuluaki liliu ʻo e huafa fakafoʻituitui ʻo e ʻOtuá ʻi ha Tohi Tapu faka-Pilitānia naʻe hā ia ʻi he 1530 ʻi he liliu ʻo e Penitātusí ʻa Viliami Tinitalé. Naʻá ne ngāueʻaki ʻa e sipela “Iehouah.” ʻI he faai mai ʻa e taimí, naʻe maliuliu ʻa e lea faka-Pilitāniá, pea naʻe ʻai ai ʻa e sipela ʻo e huafa fakaʻotuá ke fakaonopooni. Ko e fakatātaá, ʻi he 1612 naʻe ngāueʻaki ai ʻe Henry Ainsworth ʻa e sipela “Iehovah” ʻi he kotoa ʻo ʻene liliu ʻa e tohi Sāmé. ʻI he 1639  leva, ʻi hono toe fakaleleiʻi mo pulusi ʻa e tohi ko iá fakataha mo e Penitātusí, naʻe ngāueʻaki ai ʻa e sipela “Jehovah.” ʻI he 1901, ko e kau liliu-lea ko ia naʻa nau faʻu ʻa e liliu Tohi Tapu ko e American Standard Version naʻa nau ngāueʻaki ʻa e sipela “Jehovah” ʻi he feituʻu naʻe hā ai ʻa e huafa fakaʻotuá ʻi he tatau faka-Hepeluú.

ʻI he fakamatala ʻa e mataotao Tohi Tapu naʻe tokaʻi ko Joseph Bryant Rotherham ki he ʻuhinga naʻá ne ngāueʻaki ai ʻa e “Jehovah” kae ʻikai ko e “Yahweh” ʻi heʻene tohi ʻi he 1911 ko e Studies in the Psalms, naʻá ne pehē ai naʻá ne fiemaʻu ke ngāueʻaki ha “sipela ʻo e huafá ʻoku anga-maheni (pea ala tali lelei) ange ʻe he kakai lau Tohi Tapú fakalūkufua.” ʻI he 1930 naʻe lave ai ʻa e mataotao ko A. F. Kirkpatrick ki ha poini meimei tatau fekauʻaki mo hono ngāueʻaki ʻa e sipela “Jehovah.” Naʻá ne pehē: “ʻOku fakakikihiʻi ʻe he kau faʻu kalama ʻi onopōní ʻoku totonu ke lau ia ʻo pehē Yahveh pe Yahaveh; ka ʻoku hā ngali ko e JEHOVAH (SIHOVA) kuo faiaka mālohi ʻi he lea faka-Pilitāniá, pea ko e poini mahuʻinga moʻoní ʻoku ʻikai ko e puʻaki tonu māteé, ka ko hono ʻiloʻi ko e hingoa ia ʻo ha taha, ʻikai ko ha hingoa fakalakanga tavale pē hangē ko e ‘ʻEikí.’”

Ko e hā ʻa e ʻuhinga ʻo e huafa Sihová? ʻI he lea faka-Hepeluú, ko e huafa Sihová ʻoku haʻu ia mei ha foʻi veape ʻoku ʻuhingá “ke hoko,” pea ʻoku ongoʻi ʻe he kau mataotao tokolahi ʻoku tapua mai ai ʻa e faʻunga fakatupunga ke hoko ʻo e foʻi veape faka-Hepelū ko iá. Ko ia, ko e mahino ʻa e Kōmiti Liliu Tohi Tapu Māmani Foʻoú ko e huafa ʻo e ʻOtuá ʻoku ʻuhingá “ʻOkú Ne Fakatupunga ke Hoko.” ʻOku kehekehe ʻa e ngaahi fakakaukau ʻa e kau mataotaó, ko ia heʻikai lava ke tau fakamatematē fekauʻaki mo e ʻuhinga ko ʻení. Kae kehe, ʻoku feʻunga lelei ʻa e fakamatala ko ʻení mo e ngafa ʻo Sihova ko e Tokotaha-Fakatupu ʻo e ngaahi meʻa kotoa pē pea mo e Tokotaha-Fakahoko ʻo ʻene taumuʻá. Naʻe ʻikai ngata pē ʻi heʻene fakatupunga ʻa e ʻuniveesi fakamatelié mo e ngaahi meʻamoʻui ʻatamai potó ke nau ʻi aí, kae hangē ko ia kuo tatala mai ʻe he ngaahi meʻa kuo hokó, ʻokú ne hokohoko atu ke fakatupunga ke hoko hono finangaló mo ʻene taumuʻá.

Ko ia ai, ko e ʻuhinga ʻo e huafa Sihová ʻoku ʻikai fakangatangata ia ki he foʻi veape fekauʻaki mo ia ʻoku maʻu ʻi he ʻEkisoto 3:14, ʻa ia ʻoku pehē hono laú: “Te U Hoko ko e Meʻa ʻOku Ou Fili ke Hoko ki Aí,” pe “Te U Fakapapauʻi ke Hoko ko e Meʻa Te U Fakapapauʻi ke Hoko ki Aí.” ʻI hono ʻuhinga tonu mātē tahá, ʻoku ʻikai ke fakamatalaʻi kakato ʻe he ngaahi foʻi lea ia ko iá ʻa e huafa ʻo e ʻOtuá. Kae kehe, ʻoku nau fakahaaʻi ha tafaʻaki ʻo e ʻulungaanga ʻo e ʻOtuá, ʻo fakahaaʻi ʻokú ne hoko ki he meʻa ʻoku fiemaʻu ʻi he tuʻunga taki taha ke fakahoko ai ʻene taumuʻá. Ko ia neongo ʻoku kau nai ʻi he huafa Sihová ʻa e fakakaukau ko ení, ʻoku ʻikai ke fakangatangata pē ia ki he meʻa ʻokú ne fili ʻe ia tonu ke hoko ki aí. ʻOku toe kau ki ai ʻa e meʻa ʻokú ne fakatupunga ke hoko ʻi he fekauʻaki mo ʻene fakatupú mo hono fakahoko ʻo ʻene taumuʻá.