Ua Kolinitō 10:1-18
10 Pea ko au Paula, ʻoku ou fakatangi atu kiate kimoutolu ʻi he anga-malū mo e anga-lelei ʻa e Kalaisí,+ neongo ʻoku mou vakai mai kiate au ʻoku ou hā vaivai ʻi heʻetau fesiofakí,+ ka ʻoku mou vakai mai kiate au ʻoku ou loto-toʻa ʻi heʻeku mamaʻó.+
2 ʻOku ou kole atu, ʻi he taimi te u ʻi hena aí, kuo ʻosi liliu ʻa e faʻahinga ko ia ʻoku nau fakakaukau ʻoku mau ʻaʻeva ʻo fakatatau ki he kakanó, koeʻuhí ke ʻoua naʻa pau ai ke u valokiʻi fefeka kinautolu.
3 He neongo ʻoku mau ʻaʻeva ʻi he kakanó, ʻoku ʻikai te mau faitau ʻo fakatatau ki homau tuʻunga fakaekakanó.
4 He ko e ngaahi meʻatau ʻo ʻemau faitaú ʻoku ʻikai fakaekakano,+ ka ʻoku mālohi ko e meʻa ʻi he ʻOtuá+ ki hono fulihi ʻa e ngaahi meʻa ʻoku mālohi hangē ha ngaahi kolotaú.
5 He ʻoku mau fulihi ʻa e ngaahi fakaʻuhinga mo e meʻa māʻolunga kotoa pē kuo ʻohake ʻo fakafepaki ki he ʻilo fekauʻaki mo e ʻOtuá,+ pea ʻoku mau taki pōpula mai ʻa e fakakaukau kotoa pē ke ʻai ia ke talangofua ki he Kalaisí;
6 pea kuo mau mateuteu ke hilifaki ha tautea ki he talangataʻa kotoa pē,+ ʻi he hili pē ko ia ʻa e kakato ʻa hoʻomou talangofuá.
7 ʻOku mou sio ki he ngaahi meʻá ʻo fakatatau pē ki hono mahuʻinga ʻoku hā mai ki tuʻá. Kapau ʻoku loto-falala ha taha ʻo pehē ʻoku ʻo Kalaisi ia, tuku ke ne toe fakakaukau ki he moʻoniʻi meʻa ko ení: Hangē tofu pē ko ʻene hoko ko e meʻa ʻa Kalaisí, ʻoku pehē pē foki mo kimautolu.
8 He neongo kapau te u kiʻi pōlepole ʻo fuʻu lahi fekauʻaki mo e mafai naʻe ʻomai ʻe he ʻEikí kiate kimautolu ke langa hake ʻaki kimoutolu ʻo ʻikai ko hono holoki hifo kimoutolú,+ heʻikai ke fakamaaʻi ai au.
9 He ʻoku ʻikai te u loto ke hā ʻo hangē ia naʻá ku feinga ke fakamanavaheeʻi kimoutolu ʻaki ʻeku ngaahi tohí.
10 He ʻoku pehē ʻe he kakai ʻe niʻihi: “Ko ʻene ngaahi tohí ʻoku mamafa mo mālohi ʻaupito, ka ko ʻene fotu mai ʻi he sinó ʻoku vaivai pea ko ʻene leá ʻoku ʻikai hano mahuʻinga.”
11 Tuku ki ha tangata pehē ke ne fakakaukau ko e meʻa ko ia ʻoku mau leaʻaki* ʻi he ngaahi tohí ʻi heʻemau mamaʻó, ko e meʻa pē ia te mau fai* ʻi heʻemau ʻi hená.+
12 He ʻoku ʻikai te mau loto ke fakakalasi kimautolu mo e kau hīkisiá, pe ke hangē ko kinautolú.+ ʻOku nau fakamāuʻi kinautolu ʻo fakatatau ki he meʻa ʻoku nau pehē pē ʻe kinautolu ʻoku leleí, pea ʻi he foungá ni ʻoku hā ai ʻoku ʻikai te nau maʻu ha mahino.+
13 Kae kehe, ʻe ʻikai te mau pōlepole ʻo fakalaka atu ia mei homau ngaahi ngatangataʻanga kuo vaheʻi maí, ka ʻi loto ʻi he ngatangataʻanga ʻo e vāhenga-ngāue naʻe fua ʻe he ʻOtuá ʻo vaheʻi mai kiate kimautolú, ʻo ʻai ai ia ke aʻu atu ai pē kiate kimoutolu.+
14 Ko hono moʻoní, naʻe ʻikai ko haʻamau fakalaka atu ia ʻa kimautolu ʻi homau vāhenga-ngāué ʻi heʻemau ʻalu atu kiate kimoutolú, ʻo hangē ia naʻe ʻikai te mou kau ʻi heʻemau vāhenga-ngāué, he ko kimautolu ʻa e ʻuluaki faʻahinga naʻe aʻu atu kiate kimoutolu mo e ongoongo lelei fekauʻaki mo e Kalaisí.+
15 ʻIkai, ʻoku ʻikai te mau pōlepole ʻo fakalaka atu mei homau ngaahi ngatangataʻanga ne vaheʻi maí ʻo fekauʻaki mo e fakaongosia ʻa ha taha kehe, ka ʻoku mau ʻamanaki ʻi he hokohoko atu ʻa e tupulekina ʻa hoʻomou tuí, ʻe lava ke tupulekina ai ʻa e meʻa kuo mau faí, ʻi loto pē ʻi homau vāhenga-ngāué. Pea ʻe toe fakalahi ai ʻemau feituʻu ngāué,
16 ke mau talaki atu ai ʻa e ongoongo leleí ki he ngaahi fonua ʻoku mamaʻo atu meiate kimoutolú, koeʻuhi ke ʻoua ʻe fai ha pōlepole ʻi he meʻa kuo ʻosi fai ʻi he vāhenga-ngāue ʻo ha taha kehe.
17 “Ka ko e tokotaha ko ē ʻoku pōlepolé, tuku ke ne pōlepole ʻia Sihova.”*+
18 He ʻoku ʻikai ko e tokotaha ko ia ʻokú ne fakaongoongoleleiʻi ʻa ia tonú ʻoku fakahōifuá,+ ka ko e tokotaha ko ia ʻoku fakaongoongoleleiʻi ʻe Sihová.*+
Fakamatala ‘i Lalo
^ Fakafoʻilea, “ko e meʻa ʻoku hā ʻiate kimautolu ʻi he lea.”
^ Fakafoʻilea, “ʻe fakahoko foki.”
^ Sio ki he Fakamatala Fakalahi A5.
^ Sio ki he Fakamatala Fakalahi A5.
