Akaboni aku Yehova alondo vo Bayibolu likamba kuti angamukanga cha nkhani zinyaki zo ŵanthu atiŵanena pamwenga kuŵanyoza. Mwakuyeruzgiyapu, nthanthi yinyaki ya mu Bayibolu yikamba kuti: “Munthu yo wanyoloska wakunyoza, watijidaniya soni.” (Nthanthi 9:7, 8; 26:4) Mwaviyo, mumalu mwakumaliya nyengu yidu pakulimbana ndi ŵanthu wo atitinena vinthu vaboza, isi tiŵika mtima pakukondwesa Chiuta.​—Sumu 119:69.

 Bayibolu likamba kuti pe “nyengu yakuja cheti ndi nyengu yakulongoro.” (Wakutaula 3:7) Mwaviyo, timuka ŵanthu wo akhumba nadi kuziŵa uneneska, kweni tikhwecha suskanu zaŵakaŵaka. Pakuchita venivi, tilondo vo Yesu ndipuso Akhristu akwambiriya achitanga ndi kusambiza.

•   Yesu wangumuka cha pa nyengu yo amumbanga mulandu waboza pa masu paku Pilato. (Mateyu 27:11-14; 1 Peturo 2:21-23) Pa nyengu yinyaki, iyu wangumuka so cha vo ŵanthu amunenanga kuti wenga muloŵevu kweniso munkharyi. Mumalu mwaki, iyu wachitanga vinthu vamampha kuti ŵanthu awoni ŵija ntchitu zaki zamampha. Ndipu venivi vikoliyana ndi fundu ya mu Bayibolu yakuti: “Zeru yiziŵika kuti njirunji chifukwa cha vo vichitika pavuli paki.” (Mateyu 11:19, mazu ngamumphata) Kweni asani mphakwenere, nyengu zinyaki Yesu waŵamukanga mwambula mantha ŵanthu wo amunenanga.​—Mateyu 15:1-3; Mariko 3:22-30.

   Yesu wangusambiza ŵanthu wo amulondonga kuti angaguŵanga cha ndi vinthu vaboza vo ŵanthu aŵanenanga. Iyu wangukamba kuti: “Ndimwi akukondwa asani ŵanthu atikunyozani, atikutombozgani ndipuso atikupusikiyani vinthu viheni vamtundu wewosi chifukwa chaku ini.” (Mateyu 5:11, 12) Kweni wanguŵakambiya so kuti asani vingachitika kumuka vo ŵanthu aŵanenanga, iyu wazamufiska layizgu laki lakuti: “Ndazakukupaskani mazu ndipuso zeru, mwakuti arwani ŵinu wosi azamutondeka kukana pamwenga kususka.”​—Luka 21:12-15.

•   Wakutumika Paulo wangukambiya Akhristu kuti akhumbikanga cha kupindana ndi ŵanthu akususka, ndipu wangukamba kuti mphindanu zenizi ‘zambula phindu kweniso zaŵaka.’​—Tito 3:9; Aroma 16:17, 18.

•   Wakutumika Peturo wanguchiska Akhristu kuti akhumbikanga kukamba vo agomezga asani mphakwenere. (1 Peturo 3:15) Kweni Peturo waziŵanga kuti vo munthu wachita ndivu vilongo ukongwa vo wagomezga kuluska vo wakamba. Iyu wangulemba kuti: ‘Mwakuchita chamampha, mungajala pamulomu pa ŵanthu ambula zeru wo akamba vinthu vaŵakaŵaka.’​—1 Peturo 2:12-15.