Akaboni aku Yehova apharazgiya ŵanthu wosi uthenga wa mu Bayibolu chifukwa chakuti atanja Chiuta kweniso ŵanthu. Yiwu apharazgiya so chinanga mbanthu wo pakwamba angukana kuŵapharazgiya. (Mateyu 22:37-39) Kwanja Chiuta kutitichitiska kuvwiya dangu la Mwana waki, la “kupereka ukaboni mwakukwana.” (Machitidu 10:42; 1 Yohane 5:3) Chifukwa chakuvwiya dangu lenili, tiweriyaku maulendu nganandi ku ŵanthu kuti tikaŵapharazgiyi uthenga wa mu Bayibolu, nge mo achitiyanga achimi aku Chiuta a mu nyengu yakali. (Yeremiya 25:4) Kweniso chifukwa chakuti titanja anyidu, titiŵapharazgiya ‘uthenga wamampha wa Ufumu.’ Tipharazga uthenga wa utaski wenuwu ku ŵanthu wosi, kusazgapu ŵanthu wo pakwamba angukana kuŵapharazgiya.​—Mateyu 24:14.

 Kanandi tisaniya ŵanthu wo akhumba kuvwisiya pa nyumba yo pakwamba angukana kuŵapharazgiya. Ntchifukwa wuli venivi vichitika? Wonani vifukwa vitatu:

•   Ŵanthu asama.

•   Ŵanthu anyaki pa nyumba yeniyo aja ndi mtima wakukhumba kuvwisiya uthenga widu.

•   Ŵanthu asintha. Asani vinthu vasintha mucharu kweniso pa umoyu wa munthu, vichitiska munthu ‘kuziŵa kuti wakhumbika Chiuta’ ndipuso kuziŵa kuti wakhumbika kusambira Bayibolu. (Mateyu 5:3) Chinanga mbanthu wo atitisuska, nawu angasintha nge mo wanguchitiya wakutumika Paulo.​—1 Timote 1:13.

 Chinanga kuti ve viyo, tichichizga ŵanthu cha kuti avwisiyi uthenga widu. (1 Peturo 3:15) Tiwona kuti munthu weyosi we ndi wanangwa wakusankha yija vo wakhumba pa nkhani yakusopa Chiuta.​—Marangu 30:19, 20.