Kalata Yachiŵi Yaku Peturo 1:1-21
1 Ini Simoni Peturo, kapolu ndipuso wakutumika waku Yesu Khristu, ndilembe ŵanthu wo asaniya chivwanu chakuzirwa nge chidu kuporote mu urunji waku Chiuta widu kweniso waku Yesu Khristu Mtaski, kuti:
2 Wezi ukulu ndipuso chimangu visazgikiyeku kwaku yimwi chifukwa chakumuziŵa umampha+ Chiuta kweniso Yesu Ambuyafwi.
3 Chifukwa cha nthazi zaki, Chiuta watipaska* vinthu vosi vo vititiwovya kusaniya umoyu kweniso kuja akujipereka kwaku iyu chifukwa chakumuziŵa umampha Yo wakutidana+ kuporote mu unkhankhu waki kweniso umampha waki.
4 Kuporote mu vinthu venivi, iyu wakutipaska* malayizgu ngakuzirwa kweniso ngakulu ukongwa,+ kuti kuporote mu malayizgu ngenanga, namwi muje ndi mijalidu yaku Chiuta,+ pakuti mwatuwaku ku mijalidu yakuvunda ya charu yo yituliya mu makhumbiru ngaheni.
5 Pa chifukwa chenichi, yesesani ndi mtima wosi+ kuti pa chivwanu chinu musazgiyepu umampha,+ pa umampha musazgiyepu kuziŵa vinthu,+
6 pa kuziŵa vinthu musazgiyepu kujiko, pa kujiko+ musazgiyepu kukunthiyapu, pa kukunthiyapu musazgiyepu kujipereka kwaku Chiuta,+
7 pa kujipereka kwaku Chiuta musazgiyepu kwanja abali, pa kwanja abali musazgiyepu chanju.+
8 Pakuti asani mwe ndi vinthu venivi ndipu vizara mwaku yimwi, vikuvikiliyeningi kuti muleki kuja akulopwa pamwenga ambula kupasa vipasu+ pa nkhani yakuŵaziŵa umampha Ambuyafwi Yesu Khristu.
9 Pakuti munthu weyosi yo walivi vinthu venivi ngwachibulumutiya, wajala masu ngaki ku ukweru*+ ndipuso waluwa kuti wakutoweseka ku maubudi ngaki+ ngakali.
10 Mwaviyo abali, yesesani ndi mtima wosi kuti yimwi mwaŵeni musimikiziyi kudanika+ kweniso kusankhika kwinu, pakuti asani mulutirizga kuchita venivi mwazamutondeka cha mwemosi mo vingaŵiya.+
11 Mu nthowa yeniyi, mwazamutumbikika ukongwa ndipu mwazamuzomerezeka kusere mu Ufumu wamuyaya+ wa Ambuyafwi kweniso Mtaski widu, Yesu Khristu.+
12 Pa chifukwa chenichi nyengu zosi ndikhumba kuti ndikukumbuseningi vinthu venivi, chinanga kuti mutiviziŵa kali ndipuso mwe akujalikiskika mu uneneska wo muziŵa.
13 Kweni ndiwona kuti nkhwakwenere pa nyengu yo ndeche mu chihema ichi*+ kukusukunyisani mwakukukumbusani,+
14 pakuziŵa kuti po ndichita venivi chihema changu chituzgikengepu pambula kuswera yapa, nge mo so Yesu Khristu Ambuyafwi wakundilongore.+
15 Ndiyesesengi kuchita vosi vo ndingafiska kuti asani ndatuwapu muzikumbukengi* mwija vinthu venivi.
16 Tingukuziŵisani vakukwaskana ndi nthazi kweniso kuŵapu kwaku Yesu Khristu, Ambuyafwi, ndipu tingugwiriskiya ntchitu nkhani zaboza cha zakunozgeka mwauryarya, kweni tingujiwone tija ukulu waki.+
17 Pakuti iyu wangulonde ulemu ndi unkhankhu kutuliya kwaku Chiuta Ada pa nyengu yo mweneku wa unkhankhu ukulu wangumukambiya mazu ngakuti: “Uyu ndi Mwana wangu, mweniyo nditanja, yo watindikondwesa.”+
18 Hinya, mazu yanga nganguvwika kutuliya kuchanya pa nyengu yo tenga ndi iyu muphiri lakupaturika.
19 Mwaviyo, te ndi mazu nga uchimi ngakugomezgeka ukongwa, ndipu muchita umampha kuŵikapu mtima nge mo muchitiya ndi nyali+ yo yimbulika mumalu ngamdima mumitima yinu (mpaka po chiwumbu chateme ndipuso mpaka po nyenyezi ya thondu+ yatuliya).
20 Pakuti muziŵa fundu yakukhumbika ukongwa yakuti, palivi uchimi wa mu Lemba wo utuliya mumaŵanaŵanu nga munthu.
21 Pakuti palivi nyengu yo uchimi ukuzapu chifukwa cha khumbu la munthu,+ kweni ŵanthu alongoronga mazu ngakutuliya kwaku Chiuta mwakulongozgeka ndi mzimu wakupaturika.+
Mazu Ngam'mphata
^ Pamwenga kuti, “watipaska kwawezi.”
^ Pamwenga kuti, “wakutipaska kwawezi.”
^ Yapa pangafwatulikiya so kuti, “ngwachibulumutiya, wawona patali cha.”
^ Pamwenga kuti, “mu hema ili.” Kung’anamuwa liŵavu laki we pacharu chapasi.
^ Pamwenga kuti, “muzizumbuwengi.”
