Kalata Yakuluta kwa Aroma 6:1-23
6 Sonu tingakambanji? Kumbi tilutirizgi kuchita ubudi kuti wezi ukulu usazgikiyengeku?
2 Awa! Pakuti sonu tafwatulika ku* ubudi,+ tikhumbiyenji so kulutirizga kuja mu ubudi?+
3 Pamwenga kumbi muziŵa cha kuti tosi isi tikubatizika mwaku Khristu Yesu,+ tikubatizika so mu nyifwa yaki?+
4 Mwaviyo, tikuwundikiya limoza ndi iyu chifukwa tikubatizika mu nyifwa yaki,+ kuti nge mo Khristu wanguyuskikiya ku nyifwa kuporote mu unkhankhu wa Awisi, nasi so tiyendi mu umoyu wufya.+
5 Asani te akukoliyana ndi iyu chifukwa titufwa nge mo iyu wangufwiya,+ ndikuti te akukoliyana so nayu chifukwa tiyuskika nge mo iyu wakuyuskikiya.+
6 Chifukwa tiziŵa kuti umunthu widu wakali ukukhomeke nayu limoza pachimiti+ kuti maliŵavu ngidu ngakubuda ngaje ngambula nthazi,+ ndi chilatu chakuti tileki kulutirizga kuja akapolu a ubudi.+
7 Chifukwa munthu yo wafwa, wafwatulika ku* ubudi waki.
8 Kweniso asani tafwa ndi Khristu, tigomezga kuti tazamuja so amoyu ndi iyu.
9 Pakuti sonu tiziŵa kuti Khristu wakuyuskika ku nyifwa+ ndipu wafwengi so cha,+ nyifwa yilivi mazaza paku iyu.
10 Chifukwa nyifwa yo wangufwa, wangufwa kamoza pe mbwenu mpaka muyaya kuti watuzgepu ubudi,+ kweni umoyu wo waja, wajaliya kuti wachiti khumbu laku Chiuta.
11 Namwi so jiwoneni kuti mwe akufwatulika ku* ubudi, ndipu jani ndi umoyu wakuchita khumbu laku Chiuta kuporote mwaku Khristu Yesu.+
12 Mwaviyo, lekani kuzomereza kuti ubudi ulutirizgi kuchita ufumu pa maliŵavu nginu ngo ngangafwa+ kuti muvwiyengi makhumbiru nga maliŵavu nginu.
13 Ndipuso muleki kupereka maliŵavu nginu* ku ubudi kuti ngaje vidya vakuchitiya vinthu vambula urunji, kweni jiperekeni kwaku Chiuta nge ŵanthu akuyuka ku nyifwa, kweniso perekani maliŵavu nginu* kwaku Chiuta nge vidya vakuchitiya urunji.+
14 Pakuti mwe pasi pa dangu cha, kweni mwe pasi pa wezi ukulu,+ ubudi ungaŵanga ndi mazaza cha paku yimwi.+
15 Sonu asani vaŵa viyo? Kumbi tichitengi ubudi chifukwa chakuti te pasi pa dangu cha kweni te pasi pa wezi ukulu?+ Awa!
16 Kumbi muziŵa cha kuti asani mutijipereka ku munthu weyosi nge akapolu kuti mumuvwiyengi, ndikuti mwe akapolu aku mweniyo muvwiya,+ kwali ungaŵa ubudi+ wo ulongozge ku nyifwa+ pamwenga kuvwiya ko kulongozge ku urunji?
17 Kweni wawongeki Chiuta chifukwa munguvwiya ndi mtima wosi mtundu wa chisambizu chenicho mungupaskika, chinanga kuti nyengu yinyaki mwenga akapolu a ubudi.
18 Ndipu pakuti mukufwatulika ku ubudi,+ mukuja akapolu a urunji.+
19 Ndilongoro mazu ngapusu ngo ŵanthu angasuzgika cha kuvwa chifukwa cha kulopwa kwa maliŵavu nginu. Pakuti nge mo mwaperekiyanga viŵalu va maliŵavu nginu kuti vije akapolu a vinthu vakufipiskika ndipuso akapolu a kuleka kuvwiya marangu ko kulongozge ku kuleka kuvwiya marangu, sonu perekani viŵalu va maliŵavu nginu kuti vije akapolu a urunji wo ulongozge ku kupaturika.+
20 Chifukwa pa nyengu yo mwenga akapolu a ubudi, mwenga akufwatuka ku urunji.
21 Kumbi ndi vipasu wuli vo mwapasanga pa nyengu yo? Venga vinthu venivo sonu muchita navu soni. Chifukwa umaliru wa vinthu venivo ndi nyifwa.+
22 Kweni sonu chifukwa mukufwatulika ku ubudi ndipu mwe akapolu aku Chiuta, mupasa vipasu mu nthowa yakupaturika+ ndipu umaliru waki ndi umoyu wamuyaya.+
23 Pakuti malipiru nga ubudi ndi nyifwa,+ kweni mphasu yo Chiuta wapereka mbumoyu wamuyaya+ kuporote mwa Ambuyafwi Khristu Yesu.+
Mazu Ngam'mphata
^ Mazu ngaki chayingu, “tafwa ku.”
^ Pamwenga kuti, “wagowokereka.”
^ Mazu ngaki chayingu, “mwe akufwa ku.”
^ Mazu ngaki chayingu, “viŵalu vinu.”
^ Mazu ngaki chayingu, “viŵalu vinu.”
