Masalimo 45:1-17
Kwaku yo walongozga sumu. Sumu iyi yishuniki pa “Maluŵa.” Sumu ya ŵana aku Kora.+ Masikili.* Sumu ya chanju.
45 Mtima wangu wavundulika ndi chinthu chinyaki chamampha.
Ndipu ndikamba kuti: “Sumu yangu njakukwaskana* ndi fumu.”+
Lilimi langu lije nge chakulembe+ cha mlembi walusu.+
2 Ndiwi wakutowa ukongwa pa ŵana anthulumi wosi a ŵanthu.
Pamilomu yaku patuwa mazu ngakukondwesa.+
Ndichu chifukwa chaki Chiuta wakutumbika kwamuyaya.+
3 Mangiriya lipanga laku+ muchiwunu mwaku, yiwi munthu wanthazi,+Limoza ndi ulemu waku kweniso unkhankhu waku.+
4 Ndipu mu unkhankhu waku luta kuti ukathereski;+Kwera pahachi kuti ukachitiyi nkhondu uneneska, kujiyuyuwa ndipuso urunji,+Ndipu janja laku lamaryi lichitengi* vinthu vakuchitiska mantha ukongwa.
5 Mivi yaku njakuthwa ndipu yiwisa ŵanthu pa masu paku;+Yilasa mitima ya arwani a fumu.+
6 Chiuta ndiyu mpandu waku waufumu, muyaya mpaka muyaya;+Nthonga ya ufumu waku ndi nthonga yakunyoloka.*+
7 Ungwanja urunji+ ndipu ungutinkha uheni.+
Ndichu chifukwa chaki Chiuta, Chiuta waku wakusankha+ mwakukupunguliya mafuta ngalikondwa likulu+ kuluska anyaku.
8 Malaya ngaku ngosi ngachifumu nganunkhira mure, aloyi kweniso kasiya;Ukondwa ndi vakumbiya va vingwi vakutuliya munyumba yachifumu yakupangika ndi minyanga ya njovu.
9 Ŵana anthukazi a mafumu ŵe mu gulu la anthukazi ŵaku akutumbikika.
Fumukazi yama kujanja laku lamaryi ndipu ayitowesa ndi golidi wa ku Ofiri.+
10 Vwisiya yiwi wamwana munthukazi, vwisiya mwakuphwere ndipu ŵikaku gutu laku;Uluwi ŵanthu ŵaku kweniso nyumba ya awusu.
11 Ndipu fumu yikhumbirengi kutowa kwaku,Pakuti iyu ndiyu mbuyaku,Mwaviyo, uyijikamiyi.
12 Mwana munthukazi wa ku Turo wazengi ndi mphasu;Anthulumi akukhupuka ukongwa apenjengi kuti uŵachitiyi lisungu.*
13 Mwana munthukazi wa fumu watowa ukongwa mukati munyumba yachifumu;*Vakuvwala vaki avitowesa* ndi golidi.
14 Azengi nayu kwa fumu wavwala vakuvwala vakulukika umampha ukongwa.*
Amwali wo atimuperekeza atuza nawu pa masu paku.
15 Azengi nawu ndi likondwa kweniso kusekere;Yiwu aserengi munyumba ya fumu.
16 Ŵana ŵaku anthulumi azamusere mumalu mwa apapi ŵaku akali.
Yiwi uŵasankhengi kuti aje alongozgi mucharu chosi chapasi.+
17 Ndichitiskengi kuti zina laku liziŵiki mu migonezi yosi yo yituza.+
Ndichu chifukwa chaki ŵanthu akuthamikengi muyaya mpaka muyaya.
Mazu Ngam'mphata
^ Wonani Mazu ngo Ngakonkhoskeka.
^ Mazu ngaki chayingu, “Ntchitu zangu zakukwaskana.”
^ Mazu ngaki chayingu, “likusambizengi.”
^ Pamwenga kuti, “yaurunji.”
^ Pamwenga kuti, “awoloŵesengi chisku chaku.”
^ Mazu ngaki chayingu, “ngwakutowa ukongwa mukati mwaki.”
^ Mazu ngaki chayingu, “valukika.”
^ Yapa pangafwatulikiya so kuti, “mikhanju yakudyoŵeka.”
