Masalimo 73:1-28
Sumu yaku Asafu.+
73 Chiuta ngwamampha nadi kwaku Isirayeli, kwaku wo mbatuŵa mtima.+
2 Kweni ini malundi ngangu nganguja kamanavi kulanda;Maphazi ngangu nganguja kamanavi kuteremuka.+
3 Pakuti ndinguchitiya sanji ŵanthu akujikuzga*Pakuwona chimangu cha ŵanthu aheni.+
4 Pakuti yiwu atufwa kwambula kuvwa urwirwi;Maliŵavu ngawu nganthazi.*+
5 Mwakupambana ndi ŵanthu anyaki, yiwu asuzgika cha,+Kweniso akumana ndi masoka cha nge mo viŵiya ndi ŵanthu anyaki.+
6 Mwaviyo avwala kujikuzga nge nekelesi;+Ndipu nkhaza ndizu chakuvwala chawu.
7 Chuma chawu chichitiska* kuti masu ngawu nganyotoki;Vo asaniya viphara vo mtima wawu waŵanaŵananga.
8 Yiwu anyoza ndipuso akamba vinthu viheni.+
Awofyeza ŵanthu mwakujikuzga kuti aŵakandirizgengi.+
9 Yiwu alongoro nge kuti ŵe pachanya nge kuchanya,Malilimi ngawu ngalongoro vakujikuzga mucharu.
10 Mwaviyo, ŵanthu ŵaki ang’anamukiya kwaku yiwu,Ndipu atumwa kutuliya pamaji ngawu nganandi.
11 Yiwu atiti: “Kumbi Chiuta waziŵa wuli?+
Kumbi Wapachanya Limu waziŵa nadi vinthu?”
12 Hinya, ŵenaŵa mbanthu aheni wo nyengu zosi vitiŵayende.+
Alutirizga kusazgiyaku chuma chawu.+
13 Nadi panu, ndatowesa mtima wangu paŵakaKweniso ndasamba mumanja paŵaka kuti nde wambula mulandu.+
14 Ndasuzgikanga zuŵa losi lamphumphu;+Ndipuso ndachenyekanga mlenji wewosi.+
15 Kweni asani ndinguvikamba vinthu venivi,Ndatingi ndiŵachitiyengi uryarya ŵanthu ŵinu.*
16 Ndati ndayesesa kuti ndivivwisi,Vingundisuzga ukongwa maŵanaŵanu
17 Mpaka po ndinguselere mumalu ngakupaturika ngaku Chiuta,Ndipu ndinguziŵiya mo vinthu viŵayendiyengi kunthazi.
18 Nadi panu, mwaŵaŵika pamalu ngakuteremuka.+
Mutiŵachitiska kuti awi ndi kuparanyika.+
19 Yiwu anangika mwamabuchibuchi!+
Umaliru wawu ngwamabuchibuchi ndipuso ngwakuŵaŵa ukongwa!
20 Yimwi Yehova, nge malotu asani munthu wayuka,Namwi asani muyuka mutuzgengepu* chikozgu chawu.
21 Kweni mtima wangu unguŵaŵa,+Ndipu mukati mwangu* ndinguvwa urwirwi ukulu.
22 Ndengavi zeru kweniso ndenga wambula kuvwisa vinthu;Ndenga nge chinyama chambula zeru pa masu pinu.
23 Kweni sonu nde ndi yimwi nyengu zosi;Ndipu yimwi mwako janja langu lamaryi.+
24 Mutindilongozga ndi ulongozgi winu,+Ndipu pavuli paki mundilongozgiyengi ku unkhankhu.+
25 Kumbi nde ndi yani kuchanya?
Kupatuwaku yimwi, ndikhumbira so chinthu chinyaki chechosi cha pacharu chapasi.+
26 Liŵavu langu kweniso mtima wangu vingatondeka,Kweni Chiuta ndiyu jalawi la mtima wangu, ndipuso chigaŵa changu mpaka muyaya.+
27 Mbuneneska, wo aja kutali ndi yimwi amalengi.
Yimwi munangengi* weyosi yo watikusiyani mwakuchita chigololu.*+
28 Kweni kwaku ini, chinthu chamampha nkhundere kufupi ndi Chiuta.+Yehova Ambuya Fumu Yikulu, ndamusambusa malu ngangu ngakuthaŵiyaku,
Kuti ndipharazgi ntchitu zinu zosi.+
Mazu Ngam'mphata
^ Pamwenga kuti, “akujiŵikamu.”
^ Pamwenga kuti, “Yiwu ŵe ndi malufu ngakulu.”
^ Mazu ngaki chayingu, “mafuta ngawu.”
^ Mazu ngaki chayingu, “Ndatingi ndiwuchitiyengi uryarya mugonezi wa ŵana ŵinu.”
^ Mazu ngaki chayingu, “mutinkhengi.”
^ Mazu ngaki chayingu, “musana zangu.”
^ Mazu ngaki chayingu, “mumujalikengi cheti.”
^ Pamwenga kuti, “yo waleka kuja wakugomezgeka ndipu watikusiyani.”
