Wakutawula 3:1-22
3 Chinthu chechosi che ndi nyengu yaki yakuŵikika,Chakuchitika chechosi che ndi nyengu yaki pacharu chapasi:*
2 Nyengu yakuwiya ndi nyengu yakufwiya;Nyengu yakupandiya ndi nyengu yakuchesuliya vo vingupandika;
3 Nyengu yakubaya ndi nyengu yakuchizga;Nyengu yakubwanganduwa ndi nyengu yakuzenga;
4 Nyengu yakuliya ndi nyengu yakuseka;Nyengu yakutenje ndi nyengu yakuvina;*
5 Nyengu yakutaya mya ndi nyengu yakuwunjika mya pamoza;Nyengu yakuvumbatiya ndi nyengu yakuleka kuvumbatiya;
6 Nyengu yakupenje ndi nyengu yakuzomereza kuti chinthu chasoŵa;Nyengu yakusunga ndi nyengu yakutaya;
7 Nyengu yakukeruwa+ ndi nyengu yakusona;Nyengu yakuja cheti+ ndi nyengu yakulongoro;+
8 Nyengu yakwanja ndi nyengu yakutinkha;+Nyengu yankhondu ndi nyengu yachimangu.
9 Kumbi munthu yo wagwira ntchitu wayanduwanji pa ntchitu zaki zosi zo wagwira mwaphamphu?+
10 Ini ndawona ntchitu yo Chiuta wapaska ŵana a ŵanthu yo atangwanika nayu.
11 Chinthu chechosi Chiuta wakuchipanga chakutowa*+ ndipuso pa nyengu yaki. Iyu waŵika so umuyaya mumitima yawu; chinanga kuti ve viyo, ŵanthu afiskengi cha kuziŵa ntchitu yo Chiuta wauneneska wakugwira kutuwa pakwamba mpaka pakumaliya.
12 Ndawona kuti palivi chinthu chamampha kwaku yiwu kuluska kuti akondwi ndi kuchita vinthu vamampha pa umoyu wawu,+
13 kweniso kuti weyosi waryi, wamwi ndi kukondwa chifukwa cha ntchitu zosi zo wagwira mwaphamphu. Yeniyi ndi mphasu yaku Chiuta.+
14 Ndasaniya kuti vinthu vosi vo Chiuta wauneneska wapanga vilutirizgengi kujaku mpaka muyaya. Palivi cho chisazgikiyengeku pamwenga kutuzgikaku. Chiuta wauneneska wakuvipanga mu nthowa yeniyi, kuti ŵanthu amuwopengi.+
15 Chechosi cho chichitika, chikuchitikapu kali, ndipu chechosi cho chizengi chengaku kali;+ kweni Chiuta wauneneska wapenja vo vitchimbizika.*
16 Ndawona so ivi pacharu chapasi: mumalu mwa cheruzgu chakunyoloka paja vinthu viheni, mumalu mwa urunji paja vinthu viheni.+
17 Sonu ndingulongoro mumtima mwangu kuti: “Chiuta wauneneska wayeruzgengi arunji ndi aheni viyo,+ pakuti chakuchitika chechosi kweniso chinthu chechosi che ndi nyengu yaki.”
18 Ndingukambiya so mtima wangu vakukwaskana ndi ŵana a ŵanthu kuti Chiuta wauneneska waŵayesengi ndi kuŵalongo kuti ayanana ŵaka ndi nyama,
19 pakuti ŵanthu ŵe ndi umaliru ndipu nyama nazu ze ndi umaliru; vosi umaliru wawu ngumoza.+ Ŵanthu atufwa, nyama nazu zitufwa; ndipu vosi mzimu wawu ngumoza.+ Mwaviyo munthu waluska nyama cha, pakuti vinthu vosi vambula phindu.
20 Vosi viluta kumalu ngamoza.+ Vosi vituliya kufuvu,+ ndipu vosi viwere kufuvu.+
21 Ndiyani yo waziŵa asani mzimu wa munthu ukwere kuchanya, ndipu mzimu wa nyama usikiya pasi?+
22 Ndipu ndawona kuti palivi chinthu chamampha kuluska kuti munthu wakondwi ndi ntchitu yaki,+ pakuti yeniyi ndiyu mphotu yaki;* chifukwa kumbi ndiyani yo wangamuwovya kuti wawoni vo vichitikengi asani iyu waluta?+
Mazu Ngam'mphata
^ Mazu ngaki chayingu, “kusi kwa kuchanya.”
^ Mazu ngaki chayingu, “yakundwikandwika.”
^ Pamwenga kuti, “mwandondomeku; umamphaumampha.”
^ Yapa pangafwatulikiya so kuti, “vo viluta.”
^ Pamwenga kuti, “chigaŵa chaki.”
