Yesaya 56:1-12
56 Ivi ndivu Yehova wakamba:“Kolesani urunji,+ ndipuso chitani chinthu chaurunji,Pakuti utaski wangu we pafupi kuzaNdipu urunji wangu uvumbulikengi.+
2 Ngwakukondwa munthu yo wachita venivi
Ndipuso mwana wa munthu yo wakolesa venivi,Yo wasunga Sabata kweniso watilifipiska cha+
Ndipu waweza janja laki ku uheni wa mtundu wewosi.
3 Mulendu yo watijibatika kwaku Yehova+ wangakambanga cha kuti,‘Yehova wandipatuwengi nadi ku ŵanthu ŵaki.’
Ndipu wakutheneka wangakambanga cha kuti, ‘Awonani! Ini ndini chimiti chakumira.’”
4 Pakuti ivi ndivu Yehova wakambiya akutheneka wo asunga marangu ngangu ndipuso wo asankha kuchita vo vitindikondwesa ndi kukolesa phanganu langu:
5 “Munyumba mwangu ndipuso mukati mwa vimati vangu ndazakuŵapaska chipilala chachikumbusu kweniso zina,Cho ntchinthu chamampha ukongwa kuluska ŵana anthulumi kweniso ŵana anthukazi.
Ndazakuŵapaska zina lamuyaya,Lo lazamumala cha.
6 Alendu wo atijibatika kwaku Yehova kuti amuteŵete,Kuti ayanjengi zina laku Yehova+Ndipuso kuti aje ateŵeti ŵaki,Wosi wo asunga Sabata kweniso atilifipiska chaNdipuso wo akolesa phanganu langu,
7 Nawu ndazamukuza nawu kuphiri langu lakupaturika+Ndipu ndazamuchitiska kuti akondwengi mukati mwa nyumba yangu yakupempheriyamu.
Sembi zawu zamphumphu zakupiriza kweniso sembi zawu zinyaki zazamuzomerezeka paguŵa la sembi.
Pakuti nyumba yangu yazamudanika kuti nyumba yakupempheriyamu ya ŵanthu wosi.”+
8 Yehova, Ambuya Fumu Yikulu, yo wawunganisa pamoza ŵanthu akumbininika aku Isirayeli,+ wakamba kuti:
“Kusazgiyapu pa wo akuwunganisika kali, ndazamuwunganisa so ŵanthu anyaki kwaku iyu.”+
9 Yimwi mosi nyama zamudondu, zani kuti muziryi,Yimwi mosi nyama zamulisuwa.+
10 Alonda ŵaki mbachibulumutiya,+ aziŵa kanthu cha.+
Wosi mbagalu wo aja ŵaka cheti, atondeka kubwentha.+
Aŵeŵefuka ŵaka ndi kugona; atanja kugona tulu.
11 Yiwu mbagalu wo ŵe ndi nja ukongwa;Aguta cha.
Yiwu mbaliska wo avwisa vinthu cha.+
Wosi alanda;Wakumaliya weyosi waku yiwu wapenja phindu laki lachinyengu ndipu wakamba kuti:
12 “Zaningi, agani ndito vinyu,Tiyeni timwi chakumwa chakuloŵeresa mpaka kuguta.+
Ndipu zuŵa lamawa liŵengi nge zuŵa la msanawale, kujumpha so penapa!”
