Yobu 1:1-22
1 Mucharu cha Uzi mwenga munthu yo wadanikanga kuti Yobu.*+ Iyu wenga munthu wakunyoloka ndipuso wakugomezgeka;*+ wawopanga Chiuta kweniso wakhwechanga vinthu viheni.+
2 Iyu wangubala ŵana anthulumi 7 kweniso ŵana anthukazi atatu.
3 Viŵetu vaki venga mbereri 7,000, ngamila 3,000, ng’ombi 1,000* ndipuso abulu* 500. Wenga so ndi ateŵeti anandi, mwakuti wenga munthu wakuzirwa ukongwa pa ŵanthu wosi a Kuvuma.*
4 Ŵana ŵaki wosi anthulumi achitanga phwandu, ndipu weyosi wachitiyanga kunyumba yaki pa zuŵa laki.* Yiwu adananga azichi ŵawu atatu kuti aziryi ndi kumwiya nawu limoza.
5 Asani mazuŵa nga maphwandu ngamala, Yobu waŵadanisanga kuti waŵatowesi. Pavuli paki, iyu wayukanga ndi mlenjilenji kuti wapereke weyosi waku yiwu sembi zakupiriza.+ Yobu wachitanga venivi chifukwa wakambanga kuti: “Panyaki ŵana ŵangu abuda kweniso atuka Chiuta mumitima yawu.” Venivi ndivu Yobu wachitanga nyengu zosi.+
6 Sonu zuŵa lingukwana lakuti ŵana aku Chiuta wauneneska*+ asere ndi kuma pa masu paku Yehova,+ ndipu Satana+ nayu wangusere.+
7 Yehova wangufumba Satana kuti: “Kumbi watuliya pani?” Satana wangumuka Yehova kuti: “Ndachiyingangayinganga kweniso kwendakwenda mucharu.”+
8 Sonu Yehova wangukambiya Satana kuti: “Kumbi wamuwona* mteŵeti wangu Yobu? Pacharu chapasi, palivi munthu munyaki wakuyanana ndi iyu. Iyu ndi munthu wakunyoloka ndipuso wakugomezgeka,*+ watopa Chiuta kweniso wakhwecha vinthu viheni.”
9 Satana wangumuka Yehova kuti: “Kumbi muwona kuti Yobu watimuwopa ŵaka Chiuta?+
10 Asi yimwi mwamuzingiliza ndi mpanda kuti mumuvikiliyi,+ kweniso kuti muvikiliyi nyumba yaki ndi chechosi cho we nachu? Yimwi mwatumbika ntchitu za manja ngaki,+ ndipuso viŵetu vaki vayandana ukongwa mucharu.
11 Kweni tambasuwani janja linu ndi kunanga chechosi cho we nachu, nadi panu, namwi mumuwonengi wachikutukani.”
12 Sonu Yehova wangukambiya Satana kuti: “Awona! Vosi vo iyu we navu ve mu manja mwaku. Kweni paku iyu pe, ungaŵikangapu janja laku cha!” Mwaviyo, Satana wangutuwapu pa masu paku* Yehova.+
13 Sonu pa zuŵa lo ŵana anthulumi ndipuso ŵana anthukazi aku Yobu aryanga ndi kumwa vinyu munyumba ya mku wawu,+
14 kwaku iyu kunguza munthu yo wangupinga uthenga wakuti: “Ng’ombi zalimanga ndipu abulu aryanga pafupi ndi ng’ombi zo.
15 Sonu kunguza Asabiya wo anguyukiya ndi kuphanga viŵetu vo, kweniso abaya ateŵeti ŵinu ndi lipanga. Ini pe ndija ndini ndapona kuti ndizikukambiyeni.”
16 Iyu weche kulongoro, kunguza munyaki yo wangukamba kuti: “Motu wakutuwa kwaku Chiuta unguwa* kutuwa kuchanya ndi kotcha mbereri kweniso ateŵeti ŵinu, ndipu vosi vamaliya penipo! Ini pe ndija ndini ndapona kuti ndizikukambiyeni.”
17 Iyu weche kulongoro, kunguza munyaki yo wangukamba kuti: “Akadiya+ angupanga magulu ngatatu, ndipu aphanga ngamila ndi kuluta nazu, kweniso abaya ateŵeti ŵinu ndi lipanga. Ini pe ndija ndini ndapona kuti ndizikukambiyeni.”
18 Iyu weche kulongoro, kunguza so munyaki yo wangukamba kuti: “Ŵana ŵinu anthulumi kweniso ŵana ŵinu anthukazi aryanga ndi kumwa vinyu munyumba ya mku wawu.
19 Mwamabuchibuchi, kunguza chimphepu kutuliya kuchipululu, ndipu chapuma makona nganayi nga nyumba yo, mwakuti yawiya ŵana ŵinu ndi kuŵabaya. Ini pe ndija ndini ndapona kuti ndizikukambiyeni.”
20 Yobu wati wavwa venivi, wangusoka ndi kukeruwa vakuvwala vaki, kweniso wangumeta sisi kumutu kwaki. Pavuli paki, wanguwa pasi ndi kujikama,
21 ndipu wangukamba kuti:
“Ndingutuwa mumoyu mwa ama nde nkhuli,Ndipu ndiweleriyengi nde nkhuli.+
Yehova wapereka,+ ndipu Yehova walonda.
Zina laku Yehova lilutirizgi kutumbikika.”
22 Pa vosi venivi, Yobu wangubuda cha, pamwenga kumba mulandu Chiuta kuti wachita chinthu chiheni.*
Mazu Ngam'mphata
^ Panyaki zina ili ling’anamuwa kuti “Chinthu cho Atichichitiya Nkhaza.”
^ Pamwenga kuti, “munthu wambula kafukwa ndipuso wakunyoloka.”
^ Mazu ngaki chayingu, “magulu 500 nga ng’ombi ziŵiziŵi.”
^ Mazu ngaki chayingu, “abulu anthukazi.”
^ Pamwenga kuti, “ko kutuliya lumwi.”
^ Pamwenga kuti, “ndipu achitiyanga kunyumba yaku weyosi mwakusinthanasinthana.”
^ Pamwenga kuti, “angelu.”
^ Mazu ngaki chayingu, “Kumbi waŵika mtima waku pa.”
^ Pamwenga kuti, “munthu wambula kafukwa ndipuso wakunyoloka.”
^ Mazu ngaki chayingu, “pa chisku chaku.”
^ Yapa pangafwatulikiya so kuti, “Limphezi linguwa.”
^ Pamwenga kuti, “kukambiya Chiuta chinthu chechosi chiheni.”
