Ndikukuliya muchigaŵa chikavu mutawuni ya Montreal. Ada ŵangu akutayika nde myezi 6. Chifukwa cha venivi, ama ndiwu ŵenga ndi udindu wakuphwere banja. Ini ndini ndenga wakumaliya mu banja la ŵana 8.

Ndichikuwa, ndagwiriskiyanga ntchitu munkhwala wakutimbanyizga wongu, ndatchovanga juga, ndachitanga ndewu kweniso ndachezanga ndi ankhungu. Ndati ndakwanisa vyaka 10, ndingwamba kugwiriya ntchitu zinyaki mahuli kweniso ŵanthu wo abwerekesanga ndalama zakatapira. Kwaku ini, boza lenga pamuzi ndipu kubiya ŵanthu mwachinyengu ndiku kwenga kurya kwangu.

Ndichikwanisa vyaka 14, ndenga kaswiri pa nkhani yakubiya ŵanthu mwachinyengu. Mwakuyeruzgiyapu, ndagulanga mawochi, vibangili kweniso mpheti zo zikupangika ndi tigolidi timanavi. Pavuli paki, ndazidindanga chidindu chakulongo kuti zagolidi pe ndipu ndazigulisanga mwakudula ukongwa. Ndazigulisanga mumisewu kweniso mumalu ngo amikaku magalimotu pabwalu pa mashopu ngakulungakulu. Ndakondwanga ukongwa kusaniya ndalama kwambula kuzituziya vuchi. Zuŵa linyaki ndingupanga ndalama zakukwana madola 10,000 nga ku Canada!

Pa nyengu yo ndenga ndi vyaka 15, angundidikisa kusukulu yo asungiyaku ŵana wo apenja kuŵawovya kuti asinthi nkharu yawu. Mwaviyo, ndingwamba kusoŵa kwakuja. Ndagonanga mumisewu, mumapaki kweniso nyengu zinyaki kunyumba za anyangu.

Chifukwa cha jalidu langu lakubiya ŵanthu mwachinyengu, kupolisi kwenga kumuzi. Kweni pakuti ndagulisanga vinthu vakuti ndaba cha, atondekanga kunditumiza kujeri. Kanandi andilipisanga waka ndalama zinandi chifukwa chakubiya ŵanthu mwachinyengu kweniso kugulisa vinthu kwambula layisensi. Chifukwa chakuti ndawopanga munthu cha, nyengu zinyaki wo achitanga katapila anditumanga kuti nkhaŵalonde ndalama ku ŵanthu akusuzga. Kuchita venivi kwenga kwakofya ukongwa, mwakuti nyengu zinyaki ndapinganga futi. Nyengu yinyaki so ndingwamba kuchita vinthu ndi gulu la vigeŵenga.

Ndinguvwa kakwamba vakukwaskana ndi Bayibolu nde ndi vyaka 17. Pa nyengu iyi ndajanga ndi msungwana munyaki yo wenga chibwezi changu ndipu wangwamba kusambira Bayibolu ndi Akaboni aku Yehova. Kweni ini ndingukana chifukwa ndawonanga kuti fundu za mu Bayibolu zakusuzga. Mwaviyo, ndingumuleka ndipu ndingwamba kuchija ndi msungwana munyaki yo ndenga nayu so pa chibwezi.

Kweni ndingusintha maŵanaŵanu ngangu msungwana yo wenga chibwezi changu chachiŵi nayu wati wayamba kusambira Bayibolu ndi Akaboni! Msungwana uyu wangusintha ukongwa mijalidu yaki, ndipu ndinguzizwa kuwona kuti wayamba kuchita nani vinthu mwakuzikira. Ndinguzomera kuti zuŵa linyaki ndiluti ku Nyumba ya Ufumu ya Akaboni aku Yehova. Kwenuku ŵanthu ŵaki awonekanga umampha kweniso ŵenga alisungu ndipu angundilondere umampha. Venivi venga vakupambana ukongwa ndi vo ndinguziŵiliya! Ndingukuliya mu banja lo weyosi wayendiyanga yaki ndipu tayanjananga cha. Chanju cho Akaboni aku Yehova angundilongo, ndichu ndasoŵanga pa umoyu wangu kutuliya nde munamana. Yiwu ŵati andipempha kuti ayambi kusambira nani Bayibolu, ndinguzomera ndi mtima wosi.

Ndiwona kuti vo ndasambiranga mu Bayibolu ndivu vikutaska umoyu wangu. Mwakuyeruzgiyapu, ndechendayambi kusambira Bayibolu, ndingupangana ndi anyangu kuti tikabi kumalu nganyaki. Ndapenjanga kuchiba kuti ndiwezi ngongoli yo ndenga nayu pajuga ya ndalama zakujumpha madola 50,000 nga ku Canada. Kweni chifukwa cha kwamba kusambira Bayibolu, ndingukaku cha! Anyangu anguluta, ndipu anguchikumaniza, chifukwa yumoza wangumangika ndipu munyaki wangubayika.

Ndichilutirizga kusambira Bayibolu, ndinguwona kuti pe vinandi vo ndikhumbika kusintha. Mwakuyeruzgiyapu, ndingusambira kuti pa 1 Akorinto 6:10, Bayibolu likamba kuti: “Ankhungu, ambunu, aloŵevu, akutuka ndipuso akuphanga azamuhara cha Ufumu waku Chiuta.” Ndati ndakumbuka vo ini ndichita, ndinguliya. Ndinguwona kuti ndikhumbika kusinthiya limu umoyu wangu. (Aroma 12:2) Ndewu, ukali kweniso boza venga waka mundopa.

Kweni kusambira Bayibolu kungundiwovya kuziŵa kuti Yehova ngwalisungu ndipuso wagowoka. (Yesaya 1:18) Ndingupemphera kutuliya pasi pa mtima, ndipu ndingupempha Yehova kuti wandiwovyi kusintha umoyu wangu. Ndi chovyu chaki, ndingufiska kusintha kamanakamana. Chinthu chinyaki so chakukhumbika ukongwa cho ndinguchita, ntchakuti tinguchilembesa nthengwa yidu ku boma ndi msungwana yuwa ndajanga nayu.

Pa nyengu iyi ndipu nde ndi vyaka 24 kweniso ndipu te ndi ŵana atatu. Yapa ndakhumbikanga kusaniya ntchitu kuti ndiphweriyengi banja langu. Kweni ndengavi satifiketi yeyosi. Yapa napu ndingupemphera kwaku Yehova kutuliya pasi pa mtima. Pavuli paki, ndingwamba kupenjapenja ntchitu. Mabwana ndangakambiyanga kuti nditesesa kuti ndisinthi umoyu wangu ndipu asani ngandilemba ntchitu ndigwirengi mwakugomezgeka. Nyengu zinyaki ndaŵakambiyanga so kuti ndisambira Bayibolu ndipu ndikhumba kuja munthu wakuthembeka muchigaŵa. Mabwana nganandi ngangukana kundilemba ntchitu. Kweni zuŵa linyaki ndati ndaluta kuchikumana ndi abwana pakampani yinyaki, ndinguŵakonkhoske mbiri yangu ndipu yiwu angukamba kuti: “Ndiziŵa cha kuti ntchifukwa wuli, kweni chinthu chinyaki mumtima mwangu chitindikambiya kuti ndikulembi ntchitu.” Ndigomezga kuti yapa Yehova wangumuka pempheru langu. Pati pajumpha nyengu, ini ndi muwolu wangu tingubatizika ndi kuja Akaboni aku Yehova.

Nde ndi umoyu msanawale chifukwa chakugwiriskiya ntchitu fundu za mu Bayibolu kweniso chifukwa chakuchita vinthu nge Mkhristu. Banja langu likondwa ukongwa. Kweniso chifukwa chakuti ndiziŵa kuti Yehova wakundigowoke, sonu nde ndi njuŵi yituŵa.

Kwa vyaka 14 sonu, ndaja ndichichita upayiniya wa nyengu zosi kuti ndiwovyi ŵanthu anandi kusambira Bayibolu. Pambula kuswera yapa, muwolu wangu nayu wayamba kuchita upayiniya. Pa vyaka 30 vo vajumpha, ndawovyapu ŵanthu 22 wo ndigwira nawu ntchitu kuti ayambi kusopa Yehova. Ndeche kuluta mbwenu kumashopu ngakulungakulu, kweni ndikiyaku kwachibiya ŵanthu mwachinyengu cha. Mazuŵa nganu, kanandi ndiluta kumashopu ngenanga kuti ngapharazgiyi ŵanthu. Ndikhumba kuŵawovya kuti aje ndi chilindizga chakuti angazija umoyu wamampha mucharu chifya cho mwazamuŵavi ankhungu.—Salimo 37:10, 11.