Ŵanaŵaniyani chakuchitika ichi: Karen waza paphwandu. Wajapu waka kwa maminiti 10 mbwenu watuvwa mazu nga mubwezi waki ngakuti:

Karen wang’anamuka ndipu wawona Jessica wapinga mabotolu ngaŵi ngakujula. Iyu waziŵa kuti mabotolu ngo ngamoŵa. Jessica wapereka botolu limoza kwaku Karen ndipu watimukambiya kuti, “Mwapu waka kamanavi, we mura sonu ayise.”

Karen watondeka kukana chifukwa Jessica ndi munyaki. Kweniso, Karen wakhumba cha kuti mubwezi waki wamuwonengi kuti ngwakunyada. Iyu wawona kuti Jessica ndi msungwana wamampha ukongwa. Ndipu waŵanaŵana kuti asani Jessica ndiyu watumwa ndikuti palivi suzu. Iyu wawona kuti moŵa uyanana ŵaka ndi vakumwa vinyaki ndipu upambana ndi kumwa munkhwala wakutimbanyiza wongu.

Kumbi mwatingi muchitengi wuli asani yimwi ndimwi mwenga Karen?

Kuti musankhi umampha vakuchita pa chakuchitika nge ichi, mukhumbika kujiziŵa umampha. Ivi ving’anamuwa kuziŵa umunthu winu kweniso mo muchitiya vinthu. Venivi vingakuwovyani kuti musankhengi mwija vakuchita m’malu mwakuti akusankhiyeningi anyinu.—1 Ŵakorinte 9:26, 27.

Kumbi ntchinthu wuli cho chingakuwovyani kuti musankhengi mwija vakuchita? Kumuka mafumbu ngo nge papeji 4 kungakuwovyani.

Kuziŵa vo muchita umampha kungakuwovyani kuti muleki kujikayikiya.

CHAKUWONIYAPU CHA M’BAYIBOLU: Wakutumika Paulo wakulemba kuti: “Chinanga kuti ndilivi lusu lakulongoro, kweni ndiziŵa vinthu vinandi.” (2 Ŵakorinte 11:6) Chifukwa chakuti Paulo wavwisisanga Malemba, wanguthera cha pa nyengu yo anyaki amususanga. Wanguzomereza cha kuti vinthu viheni vo akambanga vimugongowesi.—2 Ŵakorinte 10:10; 11:5.

JIFUFUZENI: Lembani vinthu vo mufiska kuchita.

Lembani mijalidu yikulu yo mwenayu. (Mwakuyeruziyapu, kumbi muŵanaŵaniya anyinu? mupasa? mutijigomeza? musunga nyengu?)

Chinanga kuti chingwi chingawoneka kuti ntchakukho kweni chingadumuka asani ntchakuvunda pamalu nganyaki. Mwakuyanana waka, mbiri yidu yinganangika asani tilekere jalidu linyaki liheni lo tenalu.

CHAKUWONIYAPU CHA M’BAYIBOLU: Paulo waziŵanga vo watondekanga kufiska. Iyu wakulemba kuti: “Ndikondwa ukongwa ndi dangu laku Chiuta, kweni ndiwona dangu linyaki muviŵalu vangu lo lilimbana ndi dangu la maŵanaŵanu ngangu ndipu litindichitisa kuŵa kapolu wa dangu la ubudi lo le muliŵavu langu.”—Ŵaroma 7:22, 23.

JIFUFUZENI: Kumbi ndi vinthu wuli vo mutondeka vo muwona kuti mukhumbika kusintha?

Kumbi mungakwera mugalimotu ndi kukambiya dilayiva kuti wazunguliyi chimiti ndi galimotu yaki mpaka po mafuta ngamaliyengi? Kuchita viyo nkhuŵavi zeru.

Kumbi tisambiranjipu? Kuziŵiya limu vo mukhumba kuchita kungakuwovyani kuti vinthu vikuyendiyeni umampha pa umoyu winu. Mukhumbika kuŵanaŵaniya vo mukhumba kuchita ndi kuwona mo mungafiskiya.

CHAKUWONIYAPU CHA M’BAYIBOLU: Paulo wakulemba kuti: “Nditchimbiya, kweni kuti ndileka cha kuziŵa kweniko ndiluta.” (1 Ŵakorinte 9:26) Paulo wajanga ndi vilatu, ndipu wawonesesanga kuti wachita vinthu mwakukoliyana ndi vilatu vaki.—Ŵafilipi 3:12-14.

JIFUFUZENI: Lembani vilatu vitatu vo mukhumba kufiska chaka chamawa.

Asani muziŵa cha vo mugomeza, mutondekengi kusankha vakuchita. Mukhoza kutole ŵaka vakuchita va anyinu nge mo lwenda wasinthiya mtundu. Ivi vingalongo kuti mutijiziŵa umampha cha.

Mwakupambana ndi venivi, asani muchita vinthu mwakukoliyana ndi vo mugomeza mutesesa kuchita vinthu vamampha.

CHAKUWONIYAPU CHA M’BAYIBOLU: Pa nyengu yo Danyele wenga mnyamata, wangusimikiza mtima kuti wavwiyengi marangu ngaku Chiuta chinanga kuti wajanga kutali ndi a m’banja laki. (Danyele 1:8) Ivi vingumuwovya kuti walutilizi kuja wakugomezeka. Danyele wangulutiliza kuvwiya malangu ngaku Chiuta.

JIFUFUZENI: Kumbi mugomezanji? Mwakuyeruzgiyapu: Kumbi mugomeza kuti kwe Chiuta? Asani ndi viyo, ntchifukwa wuli? Kumbi musimikiza wuli kuti waliku nadi?

Kumbi mugomeza kuti fundu za mijalidu yamampha yaku Chiuta zingakuwovyani? Asani ndi viyo, ntchifukwa wuli?

Kumbi mukhumba kuja nge yani? Kumbi mukhumba kuyanana ndi jani lo lawa pasi ndipu liputaputa ndi kamphepu kamanavi, pamwenga mukhumba kuyanana ndi chimiti cho chituwa cha chinanga kungaputa chimphepu chikulu? Lutilizani kujiziŵa umampha kuti muje nge chimiti chenichi. Ivi vikuwovyeningi kumuka fumbu lakuti, Kumbi ndini munthu wa mtundu wuli?