Chiuta wakhumba kuti ŵanthu akondwengi ndi umoyu pacharu chapasi. Iyu wakulenga charu ndipuso vosi vo ve mucharu ichi chifukwa chakuti watanja ŵanthu. Pambula kuswera yapa, Chiuta watuzengepu vinthu vosi vo vitambisa masuzgu pacharu. Venivi vazamuwovya kuti ŵanthu azipumuwi ku masuzgu muvyaru vosi.​—Ŵerengani Yeremiya 29:11.

Palivi boma lo lafiska kutuzgapu viwawa, matenda pamwenga nyifwa. Kweni uthenga wamampha ngwakuti pambula kuswera yapa, Chiuta watuzgengepu maboma ngosi nga ŵanthu ndipu wajalikiskengi boma laki. Ŵanthu wo azamulamulika ndi boma laku Chiuta lenili azamuja mwachimangu kweniso azamutamanga cha.​—Ŵerengani Yesaya 25:8; 33:24; Daniyeli 2:44.

Masuzgu ngosi ngazamumala asani Chiuta wazituzgapu ŵanthu aheni pacharu. (Zefaniya 2:3) Kumbi venivi vazamuchitika zukwanji? Mazu ngaku Chiuta ngakukambiya limu masuzgu ngo ŵanthu akumana nangu mazuŵa nganu. Vinthu viheni vo vichitika pacharu vilongore limu kuti Chiuta wepafupi kuchitapu kanthu.​—Ŵerengani 2 Timote 3:1-5.

Titenere kusambira Bayibolu kuti timuziŵi umampha Chiuta. Bayibolu liyanana ndi kalata yakutuwa kwa awusefwi achanju. Lititikambiya vo tingachita kuti tije ndi umoyu wamampha sonu, kweniso mo tingazisaniriya umoyu wambula kumala pacharu chapasi kunthazi. Chakuti muziŵi ntchakuti ŵanthu anyaki akondwengi cha kuti musambira Bayibolu kuti mulivwisisi. Kweni mungazomerezanga cha kuti ŵanthu anyaki akugongoweseni kusambira Mazu ngaku Chiuta. Mazu ngenanga ndingu ngangakuwovyani kuti muzisaniyi umoyu wambula kumala.​—Ŵerengani Nthanthi 29:25; Chivumbuzi 14:6, 7.