SAMBIRU 5
Kumbi Chiuta Wakhumba Kuŵachitiyanji Ŵanthu Pacharu Chapasi?
1. Ntchifukwa wuli Chiuta wakulenga charu?
Yehova wakulenga charu kuti ŵanthu ajengemu. Mwaviyo, charu ndiwu muzi widu. Chiuta wangulenga Adamu ndi Heva kuti abalani ndi kuchizaza kuchanya cha, chifukwa ndipu walenga kali angelu kuti ndiwu ajengi kuchanya. (Yobu 38:4, 7) Mumalu mwaki, Chiuta wanguŵika munthu wakwamba mu paradayisu wakutowa yo wadanikanga kuti munda wa Edeni. (Genezesi 2:15-17) Yehova wakhumbanga kuti munthu wakwamba wakondwengi pacharu chapasi ndi umoyu wambula kumala limoza ndi ŵana ŵaki wo watingi wabalengi.—Ŵerengani Masalimo 37:29; 115:16.
Pakwamba, munda wa Edeni pe ndiwu wenga paradayisu. Chiuta wakhumbanga kuti banja lakwamba libali ŵana kuti ayandani pacharu chapasi. Mukuluta kwa nyengu, yiwu akhumbikanga kuti azazi charu chosi ndi kuchipanga paradayisu. (Genezesi 1:28) Charu chapasi chinangikengepu cha ndipu ŵanthu alutirizgengi kujamu chifukwa ndiwu muzi wawu.—Ŵerengani Masalimo 104:5.
Woneriyani vidiyo yakuti Ntchifukwa Wuli Chiuta Wakulenga Charu Chapasi?
2. Ntchifukwa wuli charu che paradayisu cha sonu?
Adamu ndi Heva angumuvwiya cha Yehova ndipu wanguŵatuzgamu mumunda. Paradayisu wangumaliya penipo ndipu palivi munthu yo wafiska kumuweziyapu. Bayibolu likamba kuti: “Charu chaperekeka ku ŵanthu aheni.”—Yobu 9:24.—Ŵerengani Genezesi 3:23, 24.
Kumbi Yehova wakuleka kuchitiya ŵanthu vo wakhumbanga pakwamba? Awa! Iyu ngwanthazizosi ndipu palivi cho chingamutonda. (Yesaya 45:18) Yehova wazamuwovya ŵanthu kuti azije ndi umoyu wambula kumala kweniso kuti azikondwengi nge po wakhumbiyanga pakwamba.—Ŵerengani Masalimo 37:11, 34.
3. Kumbi Paradayisu wawezekiyengepu wuli?
Paradayisu wazamuweriyapu so pacharu chapasi asani Yesu waziyamba kulamuliya nge Fumu yakuŵikika ndi Chiuta. Pa nkhondu ya Aramagedoni, Yesu wazamulongozga angelu kuti azibayi ŵanthu wosi wo asuska Chiuta. Pavuli paki, Yesu wazamumanga Satana kwa vyaka 1,000. Ŵanthu aheni achibayika, ŵanthu aku Chiuta azamupona pa nkhondu iyi chifukwa chakuti Yesu wazakuŵalongozga ndi kuŵavikiliya. Yiwu azamukondwa ndi umoyu mu Paradayisu pacharu chapasi.—Ŵerengani Chivumbuzi 20:1-3; 21:3, 4.
4. Kumbi masuzgu ngamalengi zukwanji?
Kumbi Chiuta watuzgengepu zukwanji masuzgu pacharu? Yesu wangupereka “chisimikizu” cho chilongo kuti charu chepafupi kumala. Vinthu vo vichitika pacharu mazuŵa nganu vakofya ukongwa ndipu viŵika umoyu wa ŵanthu pangozi. Kweniso venivi vilongo kuti te mu mazuŵa nga ‘umaliru wa mugonezi’ uwu.—Ŵerengani Mateyu 24:3, 7-14, 21, 22.
Pa nyengu yo Yesu wazamulamuliya charu chapasi kwa vyaka 1,000, wazamutuzgapu masuzgu ngosi. (Yesaya 9:6, 7; 11:9) Kusazgiyapu pa udindu waki nge fumu, Yesu wazamuja so Wasembi Mura ndipu wazamusisita maubudi ngosi nga ŵanthu wo atanja Chiuta. Ivi vilongo kuti Chiuta wazamutuzgapu matenda, ukoti ndi nyifwa kuporote mwaku Yesu.—Ŵerengani Yesaya 25:8; 33:24.
5. Mbayani wo azamuja mu Paradayisu yo watuza?
Ku Nyumba ya Ufumu, mwamukumana ndi ŵanthu wo atanja Chiuta kweniso wo akhumba kuziŵa mo angamukondweske
Ŵanthu wo avwiya Chiuta ndiwu azamuja mu Paradayisu. (1 Yohane 2:17) Yesu wangutuma akusambira ŵaki kuti akapenji ŵanthu akufwasa ndi kuŵasambiza vo angachita kuti Chiuta waŵayanji. Mazuŵa nganu, Yehova wasambiza ŵanthu mamiliyoni nganandi kuti azisere mu Paradayisu yo watuza. (Zefaniya 2:3) Ku Nyumba za Ufumu za Akaboni aku Yehova, ŵanthu asambira mo anthulumi angachitiya umampha vinthu ndi awolu ŵawu kweniso ŵana. Asambira so mo anthukazi nawu angachitiya umampha vinthu ndi alumu ŵawu kweniso ŵana. Apapi ndi ŵana asope pamoza ndi kusambira mo angayanduliya ndi uthenga wamampha.—Ŵerengani Mika 4:1-4.
