“BASI yingasoka kweni munthu uyu wa ku China wajengi!” Ivi ndivu Alexandra wanguvwa we mu basi. Pa nyengu iyi alindizanga kuti ajumphi boda yo ye pakati pa vyaru viŵi va ku South America. Iyu wangusika kuti wakawoni vo vachitikanga, ndipu wangusaniya munthu munyaki wa ku China yo watondekanga kulongoro Chisipanishi. Munthu yo wakonkhosiyanga mpolisi wa pa boda vo vingumuchitikiya. Chifukwa chakuti Alexandra wapempheranga mu mpingu wa Akaboni aku Yehova wa chineneru cha Chitchayina, iyu wangujipereka kuti wafwatuliyi vo munthu uyu wakambanga.

Munthu yo wangukamba kuti wenga wakuzomerezeka kuja mucharu cho kweni angumubiya ndalama ndipuso makalata. Pakwamba mpolisi yo wangukoliyana navu cha vo munthu uyu wakambanga ndipu wangukamba so kuti Alexandra we mugulu la wo agulisa ŵanthu. Pakumaliya, mpolisi yo wanguzomera vo munthu yo wakambanga kweni wangumukambiya kuti walipiri chifukwa chakuti wengavi makalata ngakwenere. Pakuti munthu yo wengavi ndalama, Alexandra wangumubwereka ndalama zakukwana madola 20 nga ku America. Munthu yo wangumuwonga ukongwa ndipu wangumukambiya kuti wazakumusaziyapu pakuweza. Alexandra wangumukonkhose kuti wapenja kuti wamulipiri cha chifukwa iyu wangumuwovya kutuliya pasi pa mtima. Pakumaliya, wangumupasa mabuku ngo ngakonkhosa fundu za m’Bayibolu ndipu wangumuchiska kuti wakasambirengi Bayibolu ndi Akaboni aku Yehova.

Vija vakukondwesa ukongwa kuvwa kuti ŵanthu anyaki atovya ŵanthu wo aleka kuŵaziŵa. Wo achita venivi mbanthu wo ŵe m’matchalitchi ngakupambanapambana kweniso wo apemphera cha. Kumbi namwi mwatingi mujengi ndi mtima wakuŵanaŵaniya ŵanthu anyaki nge po Alexandra wanguchitiya? Fumbu lenili ndakukhumbika ukongwa chifukwa Yesu wangukamba kuti: “Kupasa kuchitisa munthu kuja wakukondwa kuluska kulonde.” (Machitidu 20:35) Vakukondwesa so kuziŵa kuti asayansi akusaniya kuti kupasa nkhwakukhumbika ukongwa pa umoyu winu. Kumbi nkhwakukhumbika munthowa wuli? Tiyeni tiwoni.

Viwoneka kuti ŵanthu wo apasa anyawu aja mwakukondwa. Wakutumika Paulo wangukamba kuti “Chiuta watanja yo wapereka mwakukondwa.” Iyu wakambanga za Akhristu wo aperekanga mphasu zawu ndi mtima wosi kuti awovyi anyawu wo akumananga ndi masuzgu. (2 Ŵakorinte 8:4; 9:7) Vingawoneka nge kuti Paulo wakambanga kuti ŵanthu yaŵa apasanga anyawu chifukwa chakuti ŵenga akukondwa. Kweni ndivu iyu wakambanga cha. M’malu mwaki, iyu wanguti ŵanthu yaŵa akondwanga chifukwa chakuti apasanga vinthu anyawu.

Mwakukoliyana ndi vo akuchita kafukufuku anyaki angusaniya, kupasa “kuchitisa kuti munthu wakondwengi, wafwatukengi kucheza ndi anyaki kweniso ŵanthu amuthembengi ndipu ivi vichitisa kuti iyu ‘wavwengi umampha mu mtima.’” Pakafukufuku munyaki angusaniya kuti “kupasa munthu munyaki ndalama kunguchitisa kuti munthu yo wangupereka wakondwi ukongwa, kuphara mo watingi wakondwiyengi asani iyu ndiyu wangugwirisiya ntchitu ndalama zo.”

Kumbi imwi muwona kuti mungachita vinthu vinandi cha chifukwa cha mo vinthu viliri pa umoyu winu? Uneneska ngwakuti weyosi wangaja munthu “yo wapereka mwakukondwa” ndipu wangatumbikika. Kuti munthu wapasi anyaki ndi  mtima wosi, wakhumbika kupereka vinandi pe cha. Pakuwonga wo asindikiza magazini iyi, Kaboni waku Yehova munyaki wangukamba kuti: “Vyaka vosi kuvuli uku ndaperekanga ŵaka ndalama zimanavi ku Nyumba ya Ufumu. Kweni Yehova Chiuta wandipasa vinandi ukongwa kuphara vo ndaperekanga. . . . Ndiwonga ukongwa chifukwa wandiwovya kuti ndipereki mphasu yeniyi ndipu ndichiskika ukongwa.”

Ndi ndalama pe cha zo mungapasa anyinu. Pe so nthowa zinandi zo mungalongore kuti ndimwi akupasa.

Bayibolu likamba kuti: “Munthu walisungu wapindulisa umoyu waki, kweni munthu wankhaza watijidaniya suzgu.” (Nthanthi 11:17) Ŵanthu alisungu aja ndi mtima wakupasa ndipu nyengu zosi aja akunozgeka kugwirisiya ntchitu nyengu yawu, nthazi zawu ndipuso vinthu vinyaki kuti awovyi ŵanthu. Kuchita venivi kutiŵawovya munthowa zakupambanapambana, ndipu kuluska vosi kutiŵawovya kuti ajengi ndi umoyu wamampha.

Kafukufuku walongo kuti ŵanthu wo atijipereka kuti awovyi anyawu, asanirika kuti atamatama cha ndipuso asuzgika ukongwa cha maŵanaŵanu. Yiwu akondwa chifukwa aja ndi umoyu wamampha. Kupasa mwakutuliya pasi pa mtima kutovya so ŵanthu anyaki wo atama matenda ngakulungakulu nge HIV kweniso matenda ngo ngananga misipi. Kafukufuku walongo so kuti kuja wakupasa kutovya ŵanthu wo akhumba kuleka kumwa ukongwa moŵa. Asani yiwu apasa vinthu anyawu, asuzgika maŵanaŵanu cha ndipu aŵanaŵanaku so cha kuti ayambi so kumwa ukongwa moŵa.

Ntchifukwa wuli ve viyo? Viwoneka kuti “asani munthu wachitiya anyaki lisungu, waŵanaŵana vinthu viheni cha.” Kupasa kutovya kuti munthu walekengi kusuzgika maŵanaŵanu kweniso kuti ndopa zaki ziyendengi umampha. Ŵanthu wo murumu wawu pamwenga muwolu wawu wakutayika, aleka liŵi kusuzgika maŵanaŵanu asani ŵe ndi mtima wakupasa.

Mwambula kukayika, kupasa kutovya kuti mujengi ndi umoyu wamampha.

Yesu wangukambiya akusambira ŵaki kuti: “Jani akupasa ndipu namwiso ŵanthu akupaseningi. Azamukhutuliya mumathumba nginu mwesu wamampha, wakusindilizika, wakuchinyinthika ndi wakuzaza mpaka kukhutukiya pasi. Chifukwa mwesu wo mupimiya anyinu, nawuso azakukupimiyani weniwo.” (Luka 6:38) Asani mupasa anyinu, yiwu angaja ndi mtima wakuwonga kweniso nawu angayamba kupasa anyawu. Mwaviyo, kupasa kutovya kuti ŵanthu akoliyanengi kweniso ajengi pa ubwezi.

Ŵanthu wo afufuza mo ŵanthu achitiya vinthu, akusaniya kuti “ŵanthu wo atovya kweniso afipiya mtima anyawu, achitisa kuti anyaki nawu asambireku jalidu lenili.” Viwoneka so kuti “ŵanthu anandi aja ndi mtima wakupasa chifukwa chakuŵerenga waka nkhani za ŵanthu anyaki wo atovya anyawu.” Kafukufuku walongo kuti “munthu yumoza yo we ndi mtima wakupasa, wangachitisa kuti ŵanthu anandi aje so ndi mtima wenuwu, kusazgapu wo waleka kuŵaziŵa.” Ivi vilongo kuti muchigaŵa chosi ŵanthu angaja ndi mtima wakupasa chifukwa chakusambira kutuliya ku munthu yumoza. Kumbi mungayanja kuja muchigaŵa  chaviyo? Kukamba uneneska, vinthu vingayenda umampha ukongwa pacharu asani ŵanthu anandi angaja ndi mtima wakupasa.

Vo vinguchitika ku Florida, ku U.S.A. visimikiziya fundu yeniyi. Akaboni aku Yehova angujipereka kuti awovyi kwati kwachitika chimphepu chikulu. Achilindiza vipangizu vakuti agwirisiyi ntchitu pakunozga nyumba ya Mkhristu munyawu, anguwona kuti mpanda wa nyumba yo yenga pafupi ungunangika. Mwaviyo, yiwu angujipereka kuti awunozgi. Pati pajumpha nyengu, mweneku wa mpanda wo wangulembe kalata ku likulu la Akaboni aku Yehova kuti: “Ndilekengi cha kukuwongani. Ndawona kuti palivi so ŵanthu amampha ukongwa kuluska imwi.” Iyu wangupereka ndalama kuti walongo kuwonga ndipu wanguti yiwovyi pa ntchitu yamampha yo Akaboni agwira.

Pakafukufuku munyaki, asayansi akusaniya kuti “pe chinthu chinyaki cho chichitisa kuti ŵanthu awovyengi anyawu.” Yiwu akusaniya so kuti ŵana “atamba kulongo mtima wakuŵanaŵaniya anyawu wechendayambi kulongoro.” Ntchifukwa wuli ve viyo? Bayibolu likamba kuti ŵanthu akulengeka “mu chikozgu chaku Chiuta.” Venivi ving’anamuwa kuti ŵanthu akutole mijalidu yo Chiuta wenayu.—Chiyambo 1:27.

Kupasa ndi jalidu limoza mwa mijalidu yamampha ukongwa yo Mulengi widu, Yehova Chiuta wenayu. Iyu wakutipasa umoyu kweniso chechosi cho tikhumbikiya kuti tikondwengi. (Machitidu 14:17; 17:26-28) Asani tiŵerenga Bayibolu, titiŵaziŵa umampha Ada ŵidu akuchanya kweniso tiziŵa vinthu vamampha vo azakutichitiya. Bayibolu lilongo so kuti Chiuta wanozga vinthu vamampha vo wazakutipasa vo tazamukondwa navu mucharu chifya. * (1 Yohane 4:9, 10) Chifukwa chakuti kupasa ndi jalidu lo Yehova Chiuta wenalu ndipuso pakuti mukulengeka mu chikozgu chaki, tikayika cha kuti namwi mungaja ndi jalidu lenili. Venivi vikuchitiseningi kuti mukondwengi ndipu iyu wakuyanjeningi.—Ŵahebere 13:16.

Kumbi mwamukumbuka Alexandra, yo wazumbulika kukwamba kwa nkhani iyi? Kumbi nkhani yaki yingumala wuli? Munthu munyaki yo wangukwera nayu basi wangukambiya Alexandra kuti ndalama zaki zo wabwerekesa munthu wa ku China wataya waka mumaji. Kweni munthu wa ku China wangumbiya foni anyaki wo ajanga ko kwakanga basi, ndipu wanguweze Alexandra ndalama zaki zosi. Munthu uyu wangwamba so kusambira Bayibolu mwakukoliyana ndi vo Alexandra wangumukambiya. Pati pajumpha myezi yitatu, Alexandra wangukondwa ukongwa kukumana so ndi munthu uyu pa unganu wa Chitchayinizi wa Akaboni aku Yehova ku Peru. Kuti walongo kuwonga, iyu wangudaniya Alexandra ndipuso ŵanthu wosi wo wanguza nawu ku unganu uwu kuti aluti ku lesitilanti yaki.

Kupasa kweniso kovya ŵanthu anyaki kuzisa likondwa likulu ukongwa. Mukondwengi so ukongwa asani mutovya ŵanthu anyaki kuti amuziŵi umampha Yehova Chiuta, yo watitipasa mphasu zosi zamampha. (Yakobe 1:17) Kumbi namwi mupasaku anyinu munthowa yeniyi?