KATHERINE wakukuliya ku United States ndipu wati wakwaniska vyaka 16, wangubatizika kuja Kaboni waku Yehova. Iyu wapharazganga mwaphamphu m’chigaŵa cho wenga kweni ŵanthu amanavi ndiwu avwisiyanga. Katherine wakukamba kuti: “Ndinguŵerengapu nkhani za ŵanthu wo arombanga kuti asaniyi munthu wakuti waŵawovyi kuziŵa Chiuta. Kanandi ndakhumbanga kusaniya munthu waviyo kweni ndamusaniyanga cha.”

Katherine wati wapharazga m’chigaŵa chenichi kwa vyaka vinandi, wanguŵanaŵana kuti wasamiyi kuchigaŵa chinyaki, ko wangachisaniya ŵanthu wo angavwisiya. Iyu wafipanga mtima kuti panyaki wamutondeka kufiska uteŵeti waki. Iyu wakujapu kutali ndi banja laki kamoza pe kwa masabata ngaŵi kweni zuŵa lelosi wachitanga phukwa. Chinanga kuti venga viyo, wakhumbisiskanga kovya ŵanthu wo apenja Yehova ndipu wangufiska vo wakhumbanga. Katherine wati waŵanaŵaniya vigaŵa vakupambanapambana vo wangalutaku, wangulembe nthambi ya ku Guam ndipu angumukambiya vo wakhumbikanga kuchita. Mu July 2007, we ndi vyaka 26, wanguluta ku Saipan, chirwa cha mu Nyanja Yikulu ya Pacific. Chirwa chenichi che pa mtunda wa makilomita pafupifupi 10,000 kutuliya kumuzi kwaki. Kumbi ndi vinthu wuli vo vingumuchitikiya wati waluta?

Pati pajumpha nyengu yimanavi kutuliya po Katherine wangufikiya mu mpingu wasonu, wangukumana ndi Doris, wa vyaka va m’ma 40 yo wanguzomera kusambira Bayibolo. Pavuli pakusambira mitu yitatu yakwamba ya m’buku la Bayibolo Lisambizanji, Katherine wangwamba kufipa mtima. Iyu wanguti: “Doris wavwisiyanga umampha ukongwa ndipu ndakhumbanga kuti wasambiziki ndi munthu walusu. Ndenga ndechendasambizepu munthu Bayibolo mwakujalikiskika. Mwaviyo, ndakhumbanga kusaniya muzichi walusu kweniso nthanga yaki kuti wasambirengi nayu.” Katherine wanguromba kwaku Yehova kuti wamuwovyi kusaniya muzichi waviyo kuti walutirizgi kusambira ndi Doris. Iyu wakhumbanga kumukambiya kuti wamupenjiyengi muzichi wakuti wasambirengi nayu.

Katherine wanguti: “Ndechendamukonkhoske, Doris wangukamba kuti we ndi suzgu. Wati wandikonkhoske suzgu lo, ndingumukambiya mo Yehova wangundiwovye ndati ndakumana ndi suzgu lange laki ndipu wangundiwonga.” Doris wangukambiya Katherine kuti: “Yehova wagwiriskiya nchitu yiwi kuti wandiwovyi. Zuŵa lakwamba lo unguza kunyumba kwangu ndipu ndaja ndichiŵerenga Bayibolo kwa maora nganandi.  Ndaliyanga uku ndipempha Chiuta kuti wanditumiyi munthu wazindiwovyi kuvwisa Bayibolo. Pavuli paki, ungugong’oska pachisasa changu. Yehova wangumuka rombu langu!” Pa nyengu yo Katherine wakonkhoskanga nkhani yeniyi, masozi ngangulenga m’masu. Iyu wangukamba kuti: “Mazu ngo Doris wangukamba ngenga kwamuka kwa rombu langu. Mwaviyo, Yehova wangulongo kuti ndatingi ndifiskengi kusambira nayu.”

Doris wangubatizika mu 2010, sonu wasambiza Bayibolo ŵanthu anandi. Katherine wanguti: “Nde wakukondwa kuti vo ndapenjanga kwa nyengu yitali kuti ndiwovyi munthu yo wakhumbisiska kuteŵete Yehova vafiskika!” Mazuŵa nganu, Katherine wachita upayiniya wapade ku Kosrae, chirwa cha mu Nyanja Yikulu ya Pacific.

Abali ndi azichi akujumpha 100, akutuliya ku vyaru vinyaki (a vyaka 19 mpaka 79) aja achiteŵete ku Micronesia ko kukhumbika ateŵeti anandi. Erica yo wangusamiya ku Guam mu 2006 we ndi vyaka 19, wakukonkhoska mo ateŵeti aphamphu ŵenaŵa avwiya. Iyu wanguti: “Kuchita upayiniya m’chigaŵa cho ŵanthu akhumbisiska kuziŵa uneneska, nkhwakukondwesa ukongwa. Ndiwonga kuti Yehova wandiwovya kuchita uteŵeti wenuwu. Yeniyi ndi nchitu yamampha ukongwa!” Sonu, Erica wachita upayiniya wapade ku Ebeye, ku Marshall Islands. Mbuneneska kuti wo ateŵete muvyaru vinyaki akumana ndi masuzgu. Tiyeni tikambiskani masuzgu ngatatu ngo akumana nangu kweniso vo abali ndi azichi wo ateŵete ku Micronesia achita kuti amalani nangu.

Umoyu wambula kukhumba vinandi. Simon wa vyaka 22, wati wafika ku chirwa cha Palau mu 2007, wanguwona kuti watingi waŵengi ndi ndalama zimanavi kuluska zo wasaniyanga kwawu ku England. Iyu wanguti: “Ndakhumbikanga kusambira kuleka kugula chechosi cho ndakhumba. Sonu ndisankha mwakuphwere asani ndigula chakurya ndipu ndifufuza dankha kuti ndisaniyi vakutchipa. Asani chinthu chinyaki chanangika, ndigula vipangizu vakugwiriskiyaku kali nchitu ndipu ndipenja munthu kuti wandiwovyi kuchinozga.” Kumbi kuja ndi umoyu wambula kukhumba vinandi kungumuwovya wuli? Simon wangukamba kuti: “Kungundiwovya kuziŵa chinthu chakukhumbika ukongwa pa umoyu kweniso mo ndingachitiya asani nde ndi ndalama ndipuso vinthu vimanavi. Ndawona kuti Yehova wandiwovya pa vinthu vinandi. Kwa vyaka 7 vo ndaja kunu ndikusoŵapu chakurya cha ndipuso malu ngakugona.” Kukamba uneneska, Yehova watovya ŵanthu wo aja ndi vinthu vimanavi chifukwa akhumba kudanjizga Ufumu waku Chiuta.—Mat. 6:32, 33.

Phukwa. Erica wakukamba kuti: “Nditiŵayanja ukongwa ŵanthu a m’banja langu, mwaviyo ndafipanga mtima kuti phukwa lamutimbanyizga uteŵeti wangu.” Kumbi wangunozgeke wuli? Iyu wangukamba kuti: “Ndinguŵerenga nkhani za mu Chigongwi cha Alinda zo zakonkhoskanga phukwa. Venivi vingundiwovya kuziŵa mo ndingachichitiya ndi suzgu lenili. Mu nkhani yinyaki, ama anyaki angusimikizgiya mwana wawu kuti, ‘Yehova wangakuphwere umampha kuluska ini.’ Fundu  yeniyi yingundichiska limu.” Hannah ndi murumu waki Patrick, ateŵete ku Majuro, ku Marshall Islands. Hannah watanja kuchezga ndi abali kweniso azichi mu mpingu kuti wamalani ndi phukwa. Iyu wangukamba kuti: “Nyengu zosi ndiwonga Yehova chifukwa nde mu gulu la abali lapacharu chosi chapasi wo nditiŵawona kuti ndi banja langu. Asani yiwu alekanga kundiwovya, ndatingi ndifiskengi cha kuteŵete ko kukhumbika apharazgi anandi.”

Kusaniya mabwezi. Simon wangukamba kuti: “Asani wafika m’charu chinyaki vinthu vosi visintha. Nyengu zinyaki asani tichezga ndatondekanga kuchita myati chifukwa ndawopanga kuti angandivwisa cha.” Erica wangukamba kuti: “Pakwamba, ndawonanga nge kuti atindipatuwa kweni ndingwamba kuŵanaŵana chifukwa cho ndingulutiya. Ndinguziŵa kuti ndachiteŵetiyanga Yehova m’malu mwakuchita vakukhumba vangu.” Iyu wangukamba so kuti: “Pati pajumpha nyengu, ndingusaniya mabwezi ngamampha ngo nditingayanja.” Simon wanguchita phamphu kusambira chineneru cha ku Palau, vo vingumuwovya ‘kutandawuliya mtima’ abali ndi azichi a mu mpingu wo wawungananga. (2 Ŵakor. 6:13) Kusambira chineneru chenichi mwaphamphu, kunguchitiska kuti abali amuyanjengi. Kukamba uneneska, asani abali akutuliya ku vyaru vinyaki agwiriya nchitu limoza ndi abali a m’charu cho, wosi atanjana ukongwa. Kumbi ŵanthu wo atijipereka kuchiteŵete ko kukhumbika apharazgi anandi asaniya so vitumbiku wuli?

Wakutumika Paulo wangukamba kuti: “Yo wamija kwawanangwa, kwawanangwa so wamuvuna.” (2 Ŵakor. 9:6) Venivi ndivu vichitikiya wo asazgiyaku uteŵeti wawu. Kumbi ndi vitumbiku wuli vo abali ndi azichi avuna ‘mwawanangwa’ pamwenga kuti asaniya ku Micronesia?

Ku Micronesia, nkhwambula kusuzga kusambira Bayibolo ndi ŵanthu ndipu ukondwa kuwona kuti aluta panthazi chifukwa chakugwiriskiya nchitu vo asambira. Patrick ndi Hannah apharazganga so ku Angaur, kachirwa kamana ko ke ndi ŵanthu 320. Ŵati apharazga kwa myezi yiŵi, angukumana ndi munthukazi munyaki yo walera yija mwana ŵaki. Iyu wanguzomera kusambira Bayibolo ŵati amupharazgiya ŵaka, wangusambira uneneska ndipu wangusintha ukongwa. Hannah wanguti: “Pavuli pakuti tamala kusambira nayu ndipu tisoka ndi njinga zidu, talereskananga ndi kukamba kuti: ‘Yewu Yehova!’” Hannah wangukamba so kuti: “Ndiziŵa kuti Yehova watingi wamuguziyengi kwaku iyu m’nthowa yinyaki kweni chifukwa chakuti tinguchiteŵete kuchigaŵa ko kulivi apharazgi anandi, vinguchitiska kuti tisaniyi munthu wa mtima wamampha mwenuyu ndi kumuwovya kuziŵa Yehova. Nkhani yeniyi njakukondwesa ukongwa pa umoyu widu wosi!” Nge mo Erica wangukambiya, “asani wawovya munthu kuziŵa Yehova, ukondwa ukongwa!”

Muvyaru vinandi, mukhumbika apharazgi anandi a Ufumu. Kumbi namwi mungachiteŵete muvigaŵa vo vikhumbika apharazgi anandi? Rombani kwaku Yehova kuti wakuwovyeni kufiska khumbu linu lakusazgiyaku uteŵeti. Kambiskanani nkhani yeniyi ndi ŵara a mu mpingu winu, wakuwonere dera pamwenga wo aja achiteŵete ko kukhumbika apharazgi anandi. Asani mwayamba kunozgeke, lembiyani kalata ku ofesi ya nthambi yo yiphwere chigaŵa cho mukhumba kuchiteŵetiyaku ndipu fumbani vo mukhumbika kuchita. a Akhumba namwi mungateŵete limoza ndi masawuzandi nga abali ndi azichi, ŵara ndi amana, akutorana ndi ambula kutorana, wo ateŵete mwakukhumba ŵija ndipu saniyani likondwa lo lituza chifukwa chakuvuna ‘mwawanangwa.’