Bayibolo Lisintha Ŵanthu

“Ndingwamba kuŵanaŵaniya ukongwa mo umoyu wangu watingi uŵiyengi kunthazi”

YIKUKAMBIKA NDI ALLAN HANCOCK

NDIKUWA MU: 1941

CHARU CHO NDIKUWIYA: AUSTRALIA

MBIRI YANGU: NDAKWEŴANGA FOJA, NDAMWANGA UKONGWA MOŴA NDIPUSO NDATUKANGA

UMOYU WANGU WAKALI: Ndikukuliya ku Warialda, msumba umana wo we ku New South Wales. Ŵanthu a ku Warialda aŵeta mbereri, ng’ombi kweniso alima tirigu, mpunga ndipuso mphangwi. Msumba wenuwu atiwuphwere ndipu ŵanthu anandi avwiya marangu.

Nge mwana mura pa ŵana 10, ndati ndafika vyaka 13, ndingwamba kugwira nchitu kuti ndiwovyengi ŵanthu a m’banja langu. Ndagwiranga nchitu ku minda yikuluyikulu ya ŵanthu chifukwa chakuti ndingusambira ukongwa cha sukulu. Ndati ndafika vyaka 15, ndagwiranga nchitu yakuphwere viŵetu kweniso ndasambizanga mahachi.

Kugwira nchitu ku malu ngenanga kwenga ndi umampha kweniso uheni waki. Ndakondwanga ndi nchitu yeniyi ndipuso malu ngaki. Asani ndiwotha motu usiku ndayanjanga kuleresa mwezi ndi nyenyezi ndipu timphepu tamampha tazisanga fungu lakununkhira kwa vimiti vo venga mu dera lo. Ndikumbuka kuti ndingwamba kuŵanaŵana kuti pe Munyaki yo watenere kuti wakulenga vinthu vakutowa nge venivi. Chinanga kuti venga viyo, ndachitanga vinthu viheni vo ŵanthu wo ndagwiranga nawu nchitu achitanga. Kanandi ndavwanga ŵanthu achituka ndipuso kwenga kwambula kusuzga kwamba kukweŵa foja. Pambula kuswera ndingwamba kutuka kweniso kukweŵa ukongwa foja.

Ndati ndafika vyaka 18, ndingusamukiya ku Sydney. Nde kweniko ndingwesa kuti ndisere nchitu ya usilikali kweni angundikana chifukwa ndingusambira ukongwa cha sukulu. Pavuli paki ndingusaniya nchitu ndipu ndinguja ku Sydney kwa chaka chimoza. Pa nyengu yeniyo ndipu ndingukumana ndi Akaboni aku Yehova. Ŵati andidana kuti nkhawungani nawu zuŵa linyaki, ndinguzomera ndipu ndinguziŵa kuti vo asambizanga wenga uneneska.

Pati pajumpha nyengu yimanavi ndinguŵanaŵana kuwere so ko ndagwiranga nchitu pakwamba. Pa nyengu iyi ndinguchija ku Goondiwindi, Queensland. Ndingusaniya nchitu ndipu pavuli paki ndinguto munthukazi kweniso ndingwamba kumwa moŵa.

 Tenga ndi ŵana ŵaŵi anthurumi. Ŵana ŵenaŵa ŵati awaku, ndingwamba kuŵanaŵaniya ukongwa mo umoyu wangu watingi uŵiyengi kunthazi. Pavuli paki ndingukumbuka vo ndinguvwa pa unganu wa Akaboni aku Yehova ku Sydney ndipu ndinguŵanaŵana kuchitapu kanthu.

Ndingusaniya Chigongwi cha Alinda chakali cho mwenga adiresi ya ofesi ya nthambi ya Akaboni aku Yehova, ya ku Australia. Ndingulemba kalata yakuŵapempha kuti andiwovyi. Angunditumiya Kaboni kuti wazikambiskani nani. Iyu wenga walisungu ndipuso wachanju. Pambula kuswera, wangwamba kusambira nani Bayibolo.

MO BAYIBOLO LIKUNDISINTHIYA: Po ndasambiranga Bayibolo, ndinguwona kuti ndakhumbikanga kusintha vinthu vinyaki pa umoyu wangu. Vesi limoza lo lingundichontha ukongwa lenga la 2 Ŵakorinte 7:1. Ilu lititichiska kuti “tijitozgi ku ukazuzi wosi wa liŵavu.”

Ndinguŵanaŵana kuti ndileki kukweŵa foja ndi kumwa ukongwa moŵa. Kweni kwenga kwakusuzga kuti ndileki chifukwa chakuti ndinguziŵiriya ndipu ndinguja ndichikweŵa foja kweniso kumwa ukongwa moŵa kwa vyaka vinandi. Ndakhumbisiskanga kuti ndichitengi vinthu vo vikondwesa Chiuta. Kugwiriskiya nchitu fundu yo yisanirika pa Ŵaroma 12:2, kungundiwovya ukongwa. Fundu yo yikamba kuti: ‘Mungajilinganizganga ndi mgonezi unu cha, kweni mujisanduski mwakuchitiska [kuti vije] vifya vinjeru vinu.’ Ndinguziŵa kuti ndakhumbikanga kusintha kaŵanaŵaniru kangu kuti ndisinthi mijalidu yangu ndipuso kuwona mijalidu yangu kuti njiheni nge mo Chiuta watiyiwone. Yehova wangundiwovya ndipu ndinguleka kukweŵa foja ndipuso kumwa ukongwa moŵa.

Ndingusuzgika so ukongwa kuti ndileki kutuka. Ndawuziŵanga ulongozgi wa m’Bayibolo wa pa Ŵaefesu 4:29, wo ukamba kuti: “Mazu ngawiyu [nga wuyu] ngangatuwanga kosi mu mulomu winu cha.” Kweni pa nyengu yo, ndatondekanga kuti ndileke limu kutuka. Cho chingundiwovya ukongwa nkhulunguruka mazu ngo ngasanirika pa Yesaya 40:26. Pakukamba za nyenyezi, vesi lenili likamba kuti: “Yunuskiyani masu nginu kuchanya mulereski: Njani wangulenga ivi? Mweniyo watuzga liŵanja lawu ndi kuliŵerenga, watividana vosi mazina; ndi ukuru wa kulimba kwaki; ndipu chifukwa ngwakulimba mu nthazi palivi cho chisoŵapu.” Ndinguŵanaŵana kuti asani Chiuta we ndi nthazi zakulenga vinthu vosi va m’charu vo nditanja kuviwona ndikuti wakhoza kundipaska nthazi zakuti ndisinthi jalidu langu kuti ndimukondwesi. Ndinguyesesa kuromba ndipu kamana ndi kamana ndinguleka kutuka.

MO NDAYANDULIYA: Nge wakuphwere viŵetu, ndengavi nyengu yakukambiskana ndi ŵanthu chifukwa ku minda yo ndagwiranga nchitu kwenga ŵanthu amanavi. Chinanga kuti venga viyo, vo ndasambiranga pa maunganu nga Akaboni aku Yehova, vingundiwovya kuti ndikambiskanengi umampha ndi ŵanthu. Vinyaki vo ndasambiranga vingundiwovya so kuti ndipharazgiyengi ŵanthu uthenga wamampha wa Ufumu waku Chiuta.—Mateyu 6:9, 10; 24:14.

Kwa vyaka vinandi vajumpha, ndaja ndichiteŵete nge mura mu mpingu. Ndiwona kuti ndi mwaŵi ukuru ukongwa kuchita chechosi cho ndingafiska kuti ndiwovyi Akhristu anyangu. Kuteŵete Yehova limoza ndi muwolu wangu wakugomezgeka ndipuso wachanju kweniso ŵana ŵidu akutowa, nchitumbiku chikulu ukongwa.

Ndiwonga Yehova pakundisambiza chinanga kuti ndikusambira ukongwa cha sukulu. (Yesaya 54:13) Ndikoliyanaku ndi mazu nga pa Nthanthi 10:22, ngakuti: “Chitumbiku cha Ambuya chisakatiska.” Ini ndi banja langu tilindizga kusambira fundu zinandi zaku Yehova ndipuso kumuteŵete mpaka muyaya.

[Chithuzi papeji 28]

[Chithuzi papeji 28]

[Fundo yo yakonkhoskeka papeji 29]

“Ndinguziŵa kuti ndakhumbikanga kusintha kaŵanaŵaniru kangu kuti ndisinthi mijalidu yangu”

[Chithuzi papeji 29]