Chiuta wangulayizga munthu wakugomezgeka Abrahamu kuti “mphapu” yo yingukambikiya limu, yazamutuliya mu mphapu yaki. Kuporote mu mphapu yeniyo, ŵanthu a “mitundu yosi” atingi atumbikikengi. (Chiyambo 22:18) Yakobe mzuku waku Abrahamu wati wasamiya ku Egipiti, banja laki lingubalana ndipu linguja mtundu wa Ayisraele.

Ŵe ku Egipiti, fumu yankhaza Farao yinguŵasanduska aŵanda mpaka po Chiuta wanguŵatumizgiya mchimi Mosese. Iyu wangulongozga mtundu wa Yisraele kutuwa m’charu cho ndipu anguyambuka Nyanja Yiyera, yo Chiuta wanguchitiska kuti maji ngagaŵikani mwakuziziswa. Pavuli paki, Chiuta wangupaska Ayisraele marangu, kusazgapu Marangu 10, kuti ngaŵalongozgengi ndi kuŵavikiliya. Marangu ngenanga, ngakambanga kuti aperekengi sembi kuti agowokerekengi maubudi ngawu. Mwakukambirika ndi Chiuta, Mosese wangukambiya Ayisraele kuti Chiuta waŵatumiyengi mchimi munyaki. Mchimi mwenuyu ndiyu watingi wajengi “mphapu” yakulayizgika.

Vyaka kujumpha 400 vati vakapu, Chiuta wangulayizga Karonga Davidi kuti yo watingi wazengi, pamwenga kuti “mphapu” yo yingukambikiya limu mu Edene, yazamuwusa ufumu wo wazamumala cha. Mphapu yeniyi yinguzija Mesiya, Mtaski wakusankhika ndi Chiuta kuti waziwombo ŵanthu ndipuso kuziwezgiyapu charu cha Paradayisu.

Chiuta wangulutirizga kuvumbuwa vinthu vinandi vakukwaskana ndi Mesiya, kuporote mwaku Davidi ndi achimi anyaki. Achimi wo angukamba kuti Mesiya wazamuja wakujiyuyuwa ndi walisungu ndipu mu muwusu waki kwazamuŵavi nja, vinthu vambula urunji kweniso nkhondu. Ŵanthu wosi azamuja mwachimangu ndi ŵanthu anyawu ndipuso nyama. Kutama, kusuzgika ndipuso nyifwa, vo venga khumbu laku Chiuta cha, vazamumala kweniso ŵanthu wo akufwa azamuyuskika ndi kuja so ndi umoyu pacharu chapasi.

Chiuta wangukambiya limu kuporote mwaku Mika, kuti Mesiya wazamuwiya ku Betelehemu ndipuso wangukamba kuporote mwaku Danyele kuti Mesiya wazamubayika. Kweni Chiuta wazamuyuska Mesiya ndi kumusankha kuja Fumu kuchanya. Danyele wangukambiya so limu kuti pakumaliya, Ufumu waku Mesiya wazamubwanganduwa maboma ngosi ndipu wazamusere m’malu mwa maboma ngenanga. Kumbi Mesiya wanguza nadi nge mo achimi ŵenaŵa angukambiya?

—Nkhani iyi yatuliya pa Chiyambo chaputala 22-50, kweniso Chituwa, Marangu, 2 Samuele, Sumu, Yesaya, Danyele, Mika, Zekariya 9:9.