ŴANTHU wo ŵe muvisopa vo vichitiya limoza vinthu, awona viyo cha. Eboo Patel, yo wangwambisa wupu unyaki wa achinyamata (Interfaith Youth Core) wangukamba kuti: “Palivi chisopa cho chileka kuvwiya lisungu ŵanthu . . . , cho chileka kuphwere chilengedu . . . , cho chileka kuphwere ŵanthu.”

Nyengu zinyaki, Abuda, Akatolika, Apurotesitanti, Ahindu, Asilamu ndipuso ŵanthu amuvisopa vinyaki akumana kuti awoni mo angamaliskiya ukavu, angawovye ŵanthu kuti aje ndi wanangwa, angalekeske migodi kweniso mo angachitiya pa nkhani yakuphwere chilengedu. Ŵanthu amuvisopa vakupambanapambana akumana kuti achiskani ndipuso kukambiskana mo angachitiyanga limoza vinthu. Yiwu akozga makandulu, aturya vakurya, atumba sumu, aromba kweniso achita vinthu vinyaki.

Kumbi kuchitiya limoza vinthu, kungawovya visopa kuti vigomezgengi vinthu vakuyanana? Kumbi Chiuta wakhumba kuti visopa vichitiyengi limoza vinthu kuti pacharu paje chimangu?

Wupu unyaki ukulu wo uchitiya limoza vinthu ungukamba mwakujikuzga kuti we ndi visopa vakujumpha 200 ndipu ugwira nchitu muvyaru 76. Wupu uwu ukhumba kuti, “uchiskengi ŵanthu kuti akunthiyengepu ndipuso achitiyengi limoza vinthu.” Kweni utondeka kuchita venivi. Mwakuyeruzgiyapu, wo angwambisa wupu wenuwu angukamba kuti, marangu ngawu ngakhumbikanga kulembeka so umampha kuti ngaleki kuguŵiska visopa vo vikulembesa mu wupu uwu. Chifukwa wuli? Yiwu awonanga kuti akhumbika cha kukambiskana nkhani zaku Chiuta asani akumana. Pavuli paki, yiwu anguleka nadi kukamba chechosi chakukwaskana ndi Chiuta.

Kumbi chisopa chingaŵa ndi phindu wuli asani chileka kukamba zaku Chiuta? Nanga asani chichita viyo, chingapambana wuli ndi mawupu nganyaki ngo ngatovya ŵaka ŵanthu akavu? Mwakuyeruzgiyapu, wupu wo wakambika pakwamba ungukamba kuti, “ndi wupu wachisopa cha kweni uchiska ŵaka visopa kuti vikoliyanengi.”

Dalai Lama yo we mu wupu unyaki wa visopa wangukamba kuti: “Visopa vosi vikuluvikulu vikhumba kuti ŵanthu ayanjanengi, achitiyanengi lisungu ndipuso agowokiyanengi.” Iyu wangukamba so kuti: “Yiwu akhumbika kulongo mijalidu yeniyi zuŵa lelosi.”

 Kukamba uneneska, tikhumbika kwanja ŵanthu, kuŵalenge lisungu ndipuso kuŵagowoke. Ndichu chifukwa chaki, Yesu wangukamba fundu yakukhumbika ukongwa yakuti: “Viyo vosi vo mungakhumba kuti ŵanthu ŵachitiyi imwi, namwi so muchitiyi iwu kwakulingana.” (Mateyu 7:12) Kumbi chisopa chauneneska chikhumbika ŵaka kusambiza ŵanthu kuti ajengi ndi mijalidu yamampha?

Pakukamba za ŵanthu a mu nyengu yaki wo ajikambanga kuti ateŵete Chiuta, wakutumika Paulo wangukamba kuti: “Nditiŵasimikizgiya kuti phamphu la kuchiri kwaku Chiuta ŵe nalu, kweni [atimuziŵa mwauneneska cha].” Kumbi suzgu lenga lakuti wuli? Paulo wangukamba so za ŵanthu ŵenaŵa kuti, “Pakuleka kuwamu mu urunji waku Chiuta,” atijikhumbiya “urunji waku ŵija.” (Ŵaroma 10:2, 3) Chifukwa chakuti aziŵanga cha vo Chiuta wakhumbanga kuti achitengi, ndikuti amusopanga kwaŵaka.​—Mateyu 7:21-23.

Yesu wangukamba kuti: “Mbakutumbikika ŵakutata chimangu.” (Mateyu 5:9) Iyu wachitanga vo wasambizanga m’malu mwakuchita vinthu vo vatingi viyambisengi ndewu ndipuso wapharazganga uthenga wachimangu ku ŵanthu a visopa vakupambanapambana. (Mateyu 26:52) Wo anguvwiya angwamba kwanja ukongwa anyawu. (Ŵakolose 3:14) Kumbi Yesu ŵang’anamuwanga ŵaka kuti ŵanthu akoliyanengi? Kumbi wachitanga vinthu limoza ndi ŵanthu a visopa?

Afarisi ndi Asaduki wo ŵenga alongozgi a visopa, amususkanga ukongwa Yesu ndipu akhumbanga kumubaya. Kumbi iyu wanguchita wuli? Yesu wangukambiya akusambira ŵaki kuti: “Ŵarekeni: mbachirongozgi ŵachiburumutiya.” (Mateyu 15:14) Yesu wangukana kuchitiya nawu limoza vinthu.

Pati pajumpha nyengu, mpingu wachikhristu ungwamba mumsumba wa Korinte, ku Girisi. Msumba wenuwu, watchukanga ukongwa chifukwa chakuti visopa vinandi vachitiyanga limoza vinthu. Kumbi Akhristu atingi achitengi wuli m’charu chaviyo? Wakutumika Paulo wanguŵalembe kuti: “Mungaŵanga ŵakumangirizgana ndi ŵambura chivwanu cha.” Nchifukwa wuli wangukamba viyo? Iyu wangulutiriza kuti: “Ŵayana uli Khristu ndi Beliale [pamwenga kuti Satana]? Pamwenga ngane masanga nga ŵachivwanu ndi ŵambura chivwanu?” Pavuli paki, wangukamba so kuti: “Chifukwa chenichi tuwanimu mukati mwawu, ndi mupatukemu.”—2 Ŵakorinte 6:14, 15, 17.

Nge mo tawone, Bayibolo likanizga kusope pamoza. Kweni nyengu zinyaki mungajifumba kuti, ‘Sonu ŵanthu angachita wuli kuti akoliyanengi?’

Kanandi makampani ngo ngapanga vinthu ngaja ndi anchitu anandi. Kweni, kumbi nchitu yawu yingayenda umampha asani aleka kukoliyana?

Ndimu so viliri ndi visopa vo vichitiya limoza vinthu. Chinanga kuti akamba kuti akhumbika kukoliyana, kweni atondeka kuchita venivi. Ivi vichitiska kuti chisopa chechosi chichitengi vinthu vakupambana pa nkhani ya mijalidu ndipuso visambizu.

Bayibolo le ndi fundu zaku Chiuta zo weyosi wakhumbika kuzilondo. Nyengu zosi tikhumbika kuchita vinthu mwakukoliyana ndi vo Bayibolo likamba. Wo achita venivi, aŵavi sankhu ndipu achitiya limoza vinthu mwachimangu. Pa nkhani yeniyi, Chiuta wangukambiya limu kuti: “Nding’anamuwengi karongororedu ka ŵanthu kuŵa kamampha, mwakuti wosi ŵadanengi pa zina la Ambuya ndi kumuteŵete iyu ndi mtima umoza.” Ŵanthu angakoliyana asani ‘karongororedu kawu nkhamampha,’ mwakukoliyana ndi marangu ngaku Chiuta.​—Zefaniya 3:9; Yesaya 2:2-4.

Akaboni aku Yehova atikupemphani kuti mukawungani nawu ku Nyumba ya Ufumu yo mwenayu kufupi, kuti mukawoni mwija mo achitiya vinthu mwakukoliyana ndipuso mwachimangu.​—Sumu 133:1.