“CHIUTA ndi Mzimu,” ndichu chifukwa chaki ŵanthu angamuwona cha. (Yohane 4:24) Kweni Bayibolo likamba kuti mu nthowa yinyaki, ŵanthu anyaki akumuwonapu Chiuta. (Ŵahebere 11:27) Kumbi venivi vingachitika wuli? Kumbi mungamuwona “Chiuta wambula kuwoneka”?​—Ŵakolose 1:15.

Taŵanthu tiyanana ŵaka ndi munthu yo wakuwa wachibulumutiya. Kumbi iyu wangatondeka kuziŵa vinthu vo we navu pafupi chifukwa chakuti ngwachibulumutiya? Awa. Pe nthowa zakupambanapambana zo zitimuwovya kuziŵa ŵanthu, vinthu ndipuso vo vichitika po wali. Munthu munyaki wachibulumutiya wanguti: “Chinanga kuti masu ngangu ngawona cha kweni maŵanaŵanu ndingu ngatindiwovya kuwona.”

Mwakuyanana ŵaka, chinanga kuti mungamuwona cha Chiuta ndi masu nginu, mungagwiriskiya nchitu “masu nga mtima winu.” (Ŵaefesu 1:18) Tiyeni tiwoni nthowa zitatu zo mungachitiya venivi.

Munthu wachibulumutiya kanandi wagwiriskiya nchitu ukongwa makutu ndi manja kuti waziŵi vinthu vo watondeka kuviwona. Mwakuyanana ŵaka, tingagwiriskiya nchitu masu, makutu, mphunu, manja ndi lilimi kuti tiziŵi vinthu vakupambanapambana ndipuso kuziŵa Chiuta wambula kuwoneka yo wakuvilenga. Bayibolo likamba kuti: ‘Kutuwa ku ulengi wa charu [mijalidu yaku Chiuta] yambula kuwoneka . . . yiwoneke limu, pakuteskeka mu machitidu ngaki.’​—Ŵaroma 1:20.

Mwakuyeruzgiyapu, ŵanaŵaniyani charu chidu chapasi. Ichu chikupangika kuti ŵanthu ajengemu ŵaka cha kweni kuti akondwengi ndi umoyu. Tikondwa ukongwa ndi kamphepu kakuzizira, kachifundizi ka lumwi, kurya chipasu chakunowa pamwenga kuvwisiya sumu zakukondwesa zo viyuni vitumba. Kumbi vawanangwa vosi ivi vilongo cha kuti Mulengi widu ngwazeru, ngwachanju ndipuso ngwakupaska?

Kumbi mungasambiranji zaku Chiuta asani muwona chilengedu chaki? Chakwamba, kuchanya kulongo nthazi zaku Chiuta. Vo asayansi asaniya pambula kuswera yapa vilongo kuti chilengedu chidandasuka ndipu venivi vichitika mwaliŵi ukongwa! Asani mulereska kuchanya usiku, jifumbeni kuti: Kumbi nthazi yo yichitiska kuti chilengedu chidandasukengi ndipuso venivi vichitikengi mwaliŵi yituliya pani? Bayibolo lititikambiya kuti Mulengi widu “ngwakulimba mu nthazi.” (Yesaya 40:26) Chilengedu chititilongo kuti Chiuta ‘ngwanthazizosi’ ndipu ndi “mukulu mu nthazi.”​—Jobu 37:23.

Ama anyaki wo ŵe ndi ŵana ŵaŵi anthurumi achibulumutiya akukamba kuti: “Kukambiskana nawu ndi nthowa yimoza yakukhumbika ukongwa yo yitiŵawovya kuziŵa vinthu. Akhumba kuŵakambiya chechosi cho muwona pamwenga mutuvwa ndipuso asani mwaluta nawu kuchiyenda mukhumbika kuŵakonkhoskiyanga vosi vo muwona. Imwi ndimwi mwe masu ngawu.” Mwakuyanana ŵaka, chinanga kuti ‘palivi yumoza yo kali kosi wakumuwona Chiuta,’ kweni Yesu, Mwana waku Chiuta, “yo ngwamu chipakatu cha Ada, ndiyu wamuvumbuwa.” (Yohane 1:18) Chifukwa chakuti Yesu ndiyu wangwamba kulengeka ndipuso ndi Mwana wapade waku Chiuta, iyu waŵa “masu” ngidu ngakuwone kuchanya. Ndipu ndiyu wangatikambiya vakukwaskana ndi Chiuta wambula kuwoneka.

Wonani fundu zimanavi zo Yesu, yo wanguja ndi Awiski kwa vyaka vinandi ukongwa, wangukonkhoska zakukwaskana ndi Chiuta:

• Chiuta wagwira nchitu nyengu zosi. “Mpaka sonu Ada achita nchitu.”​—Yohane 5:17.

•  Chiuta waziŵa vo tikhumbika. “Awiskemwi aziŵa vo mukavuka, mweche mundaŵapemphi.”—Mateyu 6:8.

• Chiuta watitipaska mwamasangu vinthu vo tikhumbika. “Awiskemwi akuchanya . . . atuzgiya [“lumwi,” NW] lawu pa aheni ndi amampha, ndipu anyiskiya vuwa pa arunji ndi pa aziraurunji.”—Mateyu 5:45.

• Chiuta wawona kuti weyosi pakuyija ngwakukhumbika. ‘Asi aphwitu ankhondi asaskika timatambala tiŵi? Ndipu kuti waruwika yumoza waku wo cha pa masu ngaku Chiuta. Kweni sisi nalu la mumutu winu lipendeka losi. Mungopanga cha; muruska aphwitu anandi.’​—Luka 12:6, 7.

Munthu wachibulumutiya kanandi waziŵa vinthu mwakupambana ndi munthu yo wawona. Iyu waziŵa kuti we pa muduzi chifukwa chakuti wawona mdima cha kweni chifukwa chakuti po waja, watufya ndi lumwi cha. Nge mo wachitiya munthu wachibulumutiya kuti watiwuwona cha muduzi pamwenga kuŵala kwa lumwi, nasi tingamuziŵa cha Yehova pakutija. Mwaviyo, Yehova wangutumiza munthu yo wangulongo mijalidu Yaki kweniso mo waliri.

Munthu mwenuyu wenga Yesu. (Ŵafilipi 2:7) Yesu wangukamba za Awiski kweniso wangutilongo mo yiwu aliri. Wakusambira waki, Filipu, wangumufumba kuti: “Ambuya, tirongoni Ada.” Yesu wangumuka kuti: “Yo wawona ini, wawona Ada.” (Yohane 14:8, 9) Kumbi ndi vinthu nivi vakukwaskana ndi Ada vo ‘mungawona’ kuporote mu vo Yesu wachitanga?

Yesu wenga wachanju, wakujiyuyuwa ndipuso wakufwatuka. (Mateyu 11:28-30) Ŵanthu amuyanjanga chifukwa waŵachiskanga. Iyu wachitiyanga chitima ŵanthu wo asuzgikanga kweniso wakondwanga nawu asani akondwa. (Luka 10:17, 21; Yohane 11:32-35) Po muŵerenga pamwenga muvwisiya nkhani za m’Bayibolo zakukwaskana ndi Yesu, jiyeruzgiyeni kuti mwe penipo ndipu muwona vo vichitika. Asani mulunguruka mo Yesu wachitiyanga vinthu ndi ŵanthu, muyiziŵengi ukongwa mijalidu yamampha yaku Chiuta ndipu mujengi nayu pa ubwezi.

Pakukamba za mo munthu wachibulumutiya waziŵiya vinthu vo we navu pafupi, munthu munyaki wakulemba mabuku wangukamba kuti: “Iyu waziŵa vinthu kamanakamana mu nthowa zakupambanapambana (kuko vinthu, kunuska, kuvwa ndi nthowa zinyaki), ndipu nthowa zenizi zitimuwovya kuziŵa vinthu umampha.” Mwakuyanana ŵaka, asani muwona vo Chiuta wakulenga, muŵerenga vo Yesu wangukamba vakukwaskana ndi Awiski ndipuso muŵanaŵaniya mo Yesu wangulongole mijalidu yaku Chiuta, mumuziŵengi umampha Yehova. Muvwanengi kuti waliku nadi.

Venivi ndivu vinguchitikiya Jobu, wa mu nyengu yakali. Pakwamba wakambanga vinthu vo walekanga “kuviziŵa umampha.” (Jobu 42:3) Kweni wati waŵanaŵaniya vinthu vakuziziswa vo Chiuta wakulenga, Jobu wangukamba kuti: “Ndingumuvwani ndi makutu pe, ndipu sonu masu ngangu ngamuwonani.”​—Jobu 42:5.

Namwiso vingakuchitikiyani. Bayibolo likamba kuti: ‘Asani mutimupenja [Yehova] mumusaniyengi.’ (1 Mikoka 28:9) Akaboni aku Yehova angakondwa kukuwovyani kupenja Chiuta wambula kuwoneka kuti mumusaniyi.