Paul yo wenga ndi ŵana ŵaŵi wangukamba kuti: “Ndalama yati yasika nthazi m’charu chidu, vakurya vingwamba kusoŵa ndipuso vadulanga ukongwa. Kanandi ndajanga pa mzeri kwa maola nganandi kuti ndiguli vakurya kweni vamalanga ndechendaguli. Ŵanthu anguwonda ukongwa ndipu anandi awanga m’msewu chifukwa cha nja. Mitengu ya vinthu vinandi yingukwera ukongwa ndipu munthu wakhumbikanga kuja ndi ndalama mamiliyoni nganandi kuti waguli kanthu. Pakumaliya ndalama zinguleka kugwira ntchitu. Ndalama zangu zosi za kubanki, za inshulansi ndi za peshoni zingumala ntchitu.”

Paul wanguziŵa kuti wakhumbika kuchita vinthu mwazeru kuti banja laki lileki kusuzgika pa nyengu iyi. (Nthanthi 3:21) Iyu wangukamba kuti: “Ndaziŵanga ntchitu ya magesi kweni panyengu iyi ndagwiranga ntchitu yeyosi yo ndasaniya chinanga yingaja ya malipiru ngamana. Anyaki andilipiranga vakurya pamwenga katundu wa panyumba. Asani ndapasika mabala nganayi nga sopu ndagwiriskiyanga ntchitu ngaŵi pe ndipu nganyaki ndagulisanga. Ndingugula tana ta nyoli 40. Tati takuwa ndinguguliska ndipu ndingugula tinyaki 300. Pavuli paki, ndingusinthisa nyoli 50 ndi mathumba ngaŵi nga ufwa wa vingoma nga 50kg. Ufwa uwu unguwovya banja langu ndi mabanja nganyaki kwa nyengu yitali.”

Paul wanguziŵa so kuti chinthu chazeru ukongwa cho weyosi watenere kuchita nkhugomezga Chiuta. Chiuta watitiwovya asani tichita vo wakhumba. Pa nkhani ya kusaniya vinthu vakukhumbika pa umoyu, Yesu wangukamba kuti: “Lekani kufipa ukongwa mtima chifukwa . . . Awuskemwi aziŵa kuti mukhumbika vinthu venivi.”​—Luka 12:29-31.

Murwani mura waku Chiuta wachitiska ŵanthu kuti aŵikengi mtima wawu wosi pa vinthu vakuliŵavu. Ŵanthu akhumbisiska kuti asaniyi vinthu vakukhumbika kweniso vinthu vinyaki vo akhumbira kuja navu. Asuzgika maŵanaŵanu ukongwa kuti asaniyi vinthu vambula kukhumbika ukongwa pa umoyu. Anandi akongola  ndalama, ndipu ivi vichitiska kuti aje kapolu ku munthu yo wakuŵabwerekesa.​—Nthanthi 22:7.

Ŵanthu anyaki asankha kuchita vinthu vo vingaŵaŵika mumasuzgu. Paul wangukamba kuti: “Anandi angusiya mabanja ndi mabwezi ngawu ndipu anguluta kuvyaru vinyaki kuti akasaniyi vo akhumba. Anyaki anguluta kuvyaru vinyaki kwambula makalata ngakwenere ngakwende ndipu asuzgikanga kusaniya ntchitu. Kanandi abisamanga apolisi ndipu agonanga mumisewu. Yiwu amupemphanga cha Chiuta kuti waŵawovyi. Kweni banja lidu lingusimikiza mtima kuti Yehova watiwoyvengi kumalana ndi masuzgu ngo tingukumana nangu.”

Paul wangulutirizga kukamba kuti: “Yesu wangukamba kuti: ‘Mungafipanga mtima cha ndi vamawa, chifukwa zuŵa lamawa lazamuja so ndi vinthu vaki. Zuŵa lelosi le ndi masuzu ngaki.’ Mwaviyo, zuŵa lelosi ndarombanga kuti Chiuta wandipasi chakurya cha zuŵa lo. Nge mo Yesu wangulayizgiya, Chiuta watiwovyanga ukongwa. Ndi nyengu zosi cha po tasaniyanga vakurya vo titanja. Zuŵa linyaki ndinguma pamuzeri kuti ndiguli chakurya kweni ndaziŵanga cha kuti aguliska chakurya wuli. Ndati ndafika kunthazi kwa muzeri ndingusaniya kuti aguliska yogati. Yogati nditimuyanja cha kweni ndichu chakurya cho chengapu. Mwaviyo, tingurya yogati mazulu ngeningo. Ndiwonga Yehova chifukwa banja langu lingugonapu ndi nja cha pa nyengu yosi yakusuzga iyi.” a

“Panyengu yasonu tisuzgika ndalama cha. Kweni tasambira kuti kugomezga Chiuta kutovya kuti uleki kusuzgika maŵanaŵanu. Yehova b walutirizgengi kutiwovya asani tilutirizga kuchita khumbu laki. Tawona kufiskika kwa lemba la Sumu 34:8 lo likamba kuti: ‘Laŵani ndipu muwonengi kuti Yehova ngwamampha; ngwamwaŵi munthu yo wathaŵiya kwaku iyu.’ Ndichu chifukwa chaki tichita mantha cha kukumana so ndi suzgu la kusoŵa ndalama.”

“Sonu taziŵa kuti ntchitu pamwenga ndalama ndivu vingawovya munthu kuti waje ndi umoyu cha kweni chakurya. Tilindizga ndi mtima wosi nyengu yo layizgu laku Chiuta lazamufiskikiya lakuti: ‘Pacharu chapasi pazamuja tirigu munandi.’ Panyengu yasonu tikhorwa ndi vakurya, ndipuso vakuvwara vo tenavu. Tichiskika ukongwa ndi mazu nga m’Bayibolu ngakuti: ‘Umoyu winu ungayanjanga ndalama cha kweni mukhorwengi ndi vinthu vo mwenavu. Pakuti iyu watiti: “Ndikulekengi cha ndipuso ndikutayengi cha chinanga nkhamanavi.” Mwaviyo tije ndi chiganga ndi kukamba kuti: “Yehova ndiyu watindiwovya, ndiwopengi cha.”’” c

Kuti munthu ‘wayendi ndi Chiuta’ nge mo wachitiya Paul ndi banja laki, wakhumbika kuja ndi chivwanu chakukho. (Chiyambo 6:9) Kaya tikumana ndi masuzgu nga ndalama pamwenga tingazikumana nangu munthazi, tisambira vinandi pa chivwanu chakukho chaku Paul ndipuso mo wachitiyanga vinthu mwazeru.

Kweni tingachita wuli asani tisuzgika maŵanaŵanu ndi masuzgu nga m’banja?