Mwezi wewosi tikhumbisiska kuti tiwoneriyengi nkhani zakuchiska kweniso mavidiyo ngo ngatuwa mu pulogilamu ya JW Broadcasting. Kweni anandi mwa abali ndi azichi ŵidu ku Africa angafiska cha kuwonere vinthu ivi pa intaneti. Chifukwa wuli?

 Mu vyaru vinandi ku Africa intaneti njakusuzga. Ndipu ku malu ngo kufika intaneti, yiswera pamwenga njakudula ukongwa. Mwakuyeruzgiyapu, wakuwonere dera munyaki ku Madagascar wangupanga dawunilodi pulogilamu yimoza ya JW Broadcasting pa malu nganyaki ngo apangiyapu va Intaneti. Kweni wangudumulika ndalama zakukwana madola 16 ngaku America, yo ndi ndalama yikulu ukongwa kuphara yo ŵanthu agwiriskiya ntchitu pa sabata! a

 Chinanga kuti pe masuzgu yanga, ŵanthu mamiliyoni nganandi ku Africa angakondwa kuwonere pulogilamu ya JW Broadcasting kwambula kugwiriskiya ntchitu Intaneti. Angachita wuli venivi?

 Kwambiya mu 2017, ŵanthu wo aja ku sub-Sahara ku Africa aja achiwonere pulogilamu ya JW Broadcasting kuziya pa tchanelu ya satellite. Tchanelu yeniyi njawezi ndipu yiwoneseka maora 24 zuŵa lelosi, mu vineneru 16.

 Kuti venivi vichitiki, Akaboni aku Yehova alipira ndalama ku television broadcast service kuti aŵawonesiyengi mapulogilamu ngawu kuziya pa satellite. Satellite yo yigwiriskiya ntchitu yiko mu vyaru pafufupi 35 va ku sub-Sahara ku Africa. Akaboni aku Yehova alipira ndalama zakujumpha madola 12,000 nga ku America mwezi wewosi. Ndipu kuti awonesi mapulogilamu ngawu pa tchanelu yinyaki kanandi pasazgikiyaku so ndalama zinyaki zinandi. Venivi vitovya kuti abali ndi azichi anandi akondwengi ndi maunganu ngachigaŵa pamwenga mapulogilamu nganyaki ngapade.

 Ŵanthu anandi kusazgiyapu wo mbakaboni aku Yehova cha, awonere tchanelu ya JW satellite pa ma TV ngawu. Chinanga kuti veviyo, anandi mwa abali ndi azichi ŵidu angafiska cha kugula vipangizu vo vikhumbika kuti awonere tchanelu ya JW satellite. Mwaviyo, mu Nyumba za Ufumu zakujumpha 3,670 mukuŵikika ma satellite ngenanga ndi chilatu chakuti abali ndi azichi ŵenaŵa awoneriyengi pulogilamu JW Broadcasting. Vipangizu vosi vo vikhumbika kuti abali awoneriyengi pulogilamu iyi vingakhumbika ndalama pafufupi madola 70 nga ku America, ukongwa asani mu Nyumba ya Ufumu yo TV yilimu kali pamwenga pulojekita, kweni asani vosi vakukhumbika kugula nyengu yeniyo pangakhumbika ndalama pafufupi madola 530 nga ku America.

 Abali ndi azichi ŵidu akondwa ukongwa kuwonere tchanelu iyi. Mura munyaki ku Cameroon wangukamba kuti: “Tchanelu ya JW Satellite yenge mana muchipululu mu banja lidu.” Mubali munyaki ku Nigeria zina laki Odebode wangukamba kuti: “Nge banja titanja kuwonere tchanelu iyi katatu pa sabata. Ŵana ŵangu alindiza waka kuti mazuŵa ngo tiwonere mapulogilamu pa tchaneli yeniyi yifikengi liŵi. Akhumba kuti nyengu zosi awoneriyengi tchanelu ya JW.” Mzichi munyaki zina laki Rose yo nayu waja ku Nigeria wangukamba kuti: “Ndikondwa ukongwa kuwonere tchanelu ya JW satellite mumalu mwakuwoneriyanga waka matchanelu nganyaki. Asani ndiwonere nkhani pa ma tchanelu nganyaki ndasweranga cha kutimbanyizgika maŵanaŵanu ndi vo ndawona ndipu BP yasweranga cha kukwera. Kweni pulogilamu ya JW Broadcasting yitindichiska ukongwa! Nditiyiyanja ukongwa. Ndipu ndi thumbiku likulu ukongwa lakutuliya kwaku Yehova.”

 Wakuwonere dera munyaki ku Mozambique wangukamba kuti mu dera laki, Nyumba za Ufumu zinandi ze ndi satellite ya JW. Abali ndi azichi mu mipingu yo ye ndi ma satellite yanga atuza mwaliŵi ukongwa ku maunganu, kwaja pafufupi ora limoza pamwenga ngaŵi ndi chilatu chakuti awonere dankha pulogilamu ya JW Broadcasting pa satellite.

 Pa unganu wa vyaru wa mu 2019 wo unguchitikiya mutawuni ya Johannesburg, ku South Africa, malu pafufupi 9 mu charu ichi anguwonere nkhani kusazgapu zo zingukambika ndi Mubali wa mu Wupu Wakulongozga kuziya pa tchanelu ya JW pa satellite. Mubali Sphumelele, yo wateŵete mu Dipatimenti ya LBD ku ofesi ya nthambi ku South Africa wangukamba kuti: “Pakwamba takhumbanga kuti abali awonere nkhani za pa unganu uwu kuziya pa Intaneti. Kweni kuti venivi vichitiki pakhumbikanga kuti abali aje pamalu ngo pe intaneti yanthazi kweniso aje ndi madata nganandi. Kweni tchanelu ya JW satellite yinguwovya ukongwa chifukwa yenga yawezi kweniso yakugomezgeka.”

 Tiwonga ukongwa ndalama zo mupereka kuti ziwoyi pa ntchitu yapacharu chosi, chifukwa zitovya kuti abali ndi azichi ŵidu ku afiskengi kuwonere pulogilamu ya JW Broadcasting kuziya pa satellite. Titikuwongani ukongwa chifukwa cha vakupereka vinu vo mupereka kuziya pa nthowa zo zisanirika donate.pr2711.com.