Kafukufuku munyaki yo wanguchitika ku America, wangulongo kuti pa achinyamata 100, 80 atanja kupemphera, kweni pa 80 ŵenaŵa, 40 pe ndiwu apemphera nyengu zosi. Panyaki anyaki atijifumba kuti: ‘Kumbi pempheru litovya ŵaka kuti mtima uje mumalu pamwenga litovya so mu nthowa zinyaki?’

•  Kumbi pempheru ndi vinthu wuli?

•  Kumbi Chiuta watuvwa mapempheru?

•  Kumbi ndingamupemphanji?

•  Vo achinyamata anyinu akamba

 Pempheru ndi nthowa yo tikambiskiyana ndi Mlengi wa vinthu vosi. Aŵanaŵaniyani fundu iyi! Yehova ngwapachanya ukongwa kuphara munthu weyosi, kweni “we kutali cha ndi weyosi waku isi.” (Machitidu 17:27) Ndichu chifukwa chaki Bayibolu lititikambiya kuti: “Ndereni kufupi ndi Chiuta, ndipu nayu wanderengi kufupi ndi yimwi.”—Yakobe 4:8.

 Kumbi mungandere wuli kufupi ndi Chiuta?

•   Nthowa yakwamba nkhuziya mu pempheru. Yeniyi ndiyu nthowa yo mungakambiskiyana ndi Chiuta.

•   Nthowa yachiŵi nkhusambira Bayibolu. Yeniyi ndiyu nthowa yo Chiuta “wakambiskiyana” namwi.

 Kukambiskana ndi Chiuta kuziya mu pempheru kweniso kusambira Bayibolu kungakuwovyani kuti muje nayu pa ubwezi wakukho.

 “Ndi mwaŵi ukulu ukongwa kukambiskana ndi Yehova yo Ngwapachanya Ukongwa muchilengedu chosi.”—Jeremy.

 “Kumukambiya Yehova vo ve mumtima mwangu kuziya mu pempheru, kutindiwovya kujivwa kuti nde nayu pafupi.”—Miranda.

 Chinanga kuti mugomezga Chiuta ndipuso mupemphera kwaku iyu, kweni nyengu zinyaki kungaŵa kwakusuzga kugomezga kuti watuvwa mapempheru. Kweni Bayibolu likamba kuti Yehova ‘Ngwakuvwa pempheru.’ (Salimo 65:2) Kweniso litikuchiskani kuti ‘mumuponyiyengi vosi vo vitikufipiskani mtima.’ Chifukwa wuli? “Chifukwa iyu watikuŵanaŵaniyani.”—1 Peturo 5:7.

 Ŵanaŵaniyani fundu iyi: Kumbi nyengu zosi mutanja kukambiskana ndi mubwezi winu? Asani ndi viyo, ndimu mutenere so kuchitiya ndi Chiuta. Mupempherengi kwaku iyu nyengu zosi ndipu muzumbuwengi zina laki lakuti Yehova. (Salimo 86:5-7; 88:9) Fundu yaki njakuti, Bayibolu litikuchiskani kuti “mupempherengi nyengu zosi.”—1 Atesalonika 5:17.

 “Asani ndipemphera ndija kuti ndikambiskana ndi Ada ŵangu akuchanya ndipu nditiŵakambiya chechosi cho che mumtima mwangu.”—Moises.

 “Yehova nditimukambiya chechosi cho che kukhosi kwangu nge mo ndingakambiya ama pamwenga mubwezi wangu wapamtima.”—Karen.

 Bayibolu likamba kuti: “Pa chinthu chechosi, mwa pempheru ndi kuŵeyere limoza ndi kuwonga, vo mupempha viziŵiki kwaku Chiuta.”—Afilipi 4:6.

 Kumbi fundu yeniyi ying’anamuwa kuti mungamupempha kuti wakuwovyeni pa masuzgu nginu? Hinya! Bayibolu likamba kuti: “Muponye Yehova mphingu yaku, ndipu iyu wakuwovyengi.”—Salimo 55:22.

 Kweni asani mupemphera kwaku Chiuta mumukambiyengi so vinthu vinyaki mumalu mwakumukambiya waka masuzgu nginu. Msungwana munyaki zina laki Chantelle wangukamba kuti: “Ungaŵa ubwezi wamampha cha asani nyengu zosi ndijaliya waka kumupempha Yehova kuti wandiwovyi pa masuzgu ngangu. Ndiwona kuti chakwamba ndikhumbika dankha kumuwonga pa vinthu vinandi vo watindichitiya, pavuli paki ndipu ndingamukambiya masuzgu ngangu ngosi.”

 Ŵanaŵaniyani fundu iyi: Ndi vinthu wuli vo Yehova wakuchitiyani pa umoyu winu vo mungamuwonga? Nanga ndi vinthu vitatu nivi vo mungawonga Yehova msanawale?

 “Tingamuwonga Yehova mupempheru chinanga mpha tinthu timanatimana, nge maluŵa ngakutowa ngo wakulenga.”—Anita.

 “Ŵanaŵaniyani chinthu chinyaki cho Yehova wakulenga cho yimwi chitikukondwesani pamwenga vesi linyaki la mu Bayibolu lo litikufikani pa mtima, pavuli paki muwongeni.”—Brian.