Ubudi nkhuchita pamwenga kuŵanaŵana chinthu chechosi cho Chiuta watinkhana nachu. Venivi visazgapu kuswa dangu laku Chiuta mwakuchita cho ntchiheni, pamwenga chambula urunji pamasu paku Chiuta. (1 Yohane 3:4; 5:17) Bayibolu likamba so kuti kuchita ubudi kung’anamuwa kuchita cho ntchambula kwenere.—Yakobe 4:17.

 Mu vineneru vakwambiriya vo angugwiriskiya ntchitu pakulemba Bayibolu, mazu ngakuti ubudi ngang’anamuwa “kumbwita.” Mwakuyeruzgiyapu, ku Isirayeli kwenga gulu la asilikali anyaki wo asani aponya mwa mwakugwiriskiya ntchitu chakuponye, ‘ambwitanga cha.’ Asani mazu yanga ngangafwatulikiya nge mo ngenge mu chineneru chakwambiriya, ndikuti ngangalembeka kuti “abudanga cha.” (Ŵeruzgi 20:16) Mwaviyo, kubuda kung’anamuwa kumbwita pamwenga kutondeka kuchita vinthu mwakukoliyana ndi vo Chiuta wakhumba.

 Pakuŵa Mlengi widu, Chiuta ndiyu ngwakwenere kutikambiya fundu zo tikhumbika kwende pa umoyu widu. (Chivumbuzi 4:11) Mwaviyo tazamumuka mulandu kwaku Chiuta asani tichita vinthu viheni.—Aroma 14:12.

Kumbi vingachitika kuleke limu kubuda?

 Awa. Bayibolu likamba kuti ŵanthu “wosi mbakubuda ndipu mbakupeleŵere pa unkhankhu waku Chiuta.” (Aroma 3:23; 1 Mafumu 8:46; Wakutawula 7:20; 1 Yohane 1:8) Ntchifukwa wuli ve viyo?

 Pakwamba, Adamu ndi Heva ŵengavi ubudi. Venga viyo chifukwa angulengeka mu chikozgu chaku Chiuta. (Genezesi 1:27) Kweni pavuli paki angubuda chifukwa angumuvwiya cha Chiuta. (Genezesi 3:5, 6, 17-19) Ŵati ayamba kubala ŵana, anguŵayambuzgiyaku ubudi wawu. (Aroma 5:12) Ndichu chifukwa chaki Fumu Davidi yaku Isirayeli yingukamba kuti, “Ndikubalika ndi mphulupulu.”—Salimo 51:5.

Kumbi maubudi nganyaki ngakulungakulu kuphara nganyaki?

 Hinya. Mwakuyeruzgiyapu, Bayibolu likamba kuti ŵanthu a ku Sodomu ŵenga “aheni, kweniso akubuda ukongwa” ndipu ubudi wawu wenga ‘ukulu ukongwa.’ (Genezesi 13:13; 18:20) Tiyeni tikambiskani fundu zitatu zo zingatiwovya kuziŵa asani ubudi wo munthu munyaki wachita ngukulu ukongwa pamwenga cha.

1.   Mtundu wa ubudi. Bayibolu litititcheŵeska kuti titenere cha kuchita maubudi ngakulungakulu nge ureŵi, kusopa angoza, kuba, kuloŵe, kuphanga, kubaya ndipuso kuchita vamizimu. (1 Akorinto 6:9-11; Chivumbuzi 21:8) Bayibolu lilongo kuti maubudi yanga ngapambana ndi maubudi ngo munthu waziŵa cha kuti wabuda, nge kulongoro pamwenga kuchita chinthu chinyaki cho chingaguŵiska anyaki. (Nthanthi 12:18; Aefeso 4:31, 32) Kweni mwemosi mo viliri, Bayibolu lititichiska kuti tikhumbika cha kuchita ubudi wa mtundu wewosi chifukwa vingatichitiska kuti tiswi marangu ngaku Chiuta.—Mateyu 5:27, 28.

2.   Chilatu cho munthu wachitiya ubudi. Ŵanthu anyaki achitiyamu waka maubudi kwambula kuziŵa vo Chiuta wakhumba. (Machitidu 17:30; 1 Timote 1:13) Chinanga kuti Bayibolu lizomereza cha maubudi ngaviyo, kweni lilongo kuti ngapambana ndi maubudi ngakuchita kukhumbiya dala kuti uswi marangu ngaku Chiuta. (Numeri 15:30, 31) Venivi veviyo chifukwa munthu wachita maubudi ngenanga kutuliya mu “mtima waki uheni.”—Yeremiya 16:12.

3.   Kuchita ubudi mwakuwerezawereza. Bayibolu lilongo so kuti pe mphambanu pakati pa ubudi wo wachitika kamoza pe ndi wo munthu wachita mwakuwerezawereza. (1 Yohane 3:4-8) Ŵanthu wo ‘achitiya dala ubudi’ pavuli pakuti aziŵa umampha cho ntchakwenere, azamulonde cheruzgu chakofya chaku Chiuta.—Aheberi 10:26, 27.

 Ŵanthu wo akuchita maubudi ngakulungakulu, angajimba mulandu ukongwa chifukwa cha vinthu viheni vo akuchita. Mwakuyeruzgiyapu, Fumu Davidi yingulemba kuti: “Pakuti maubudi ngangu ngathopoka kuluska mutu wangu, ndipu ngajumpha msinkhu wangu nge katundu muzitu.” (Salimo 38:4) Chinanga kuti ve viyo, Bayibolu lititikambiya kuti: “Munthu muheni waleki nthowa yaki, ndipuso munthu muheni waleki kuŵanaŵana vinthu viheni. Iyu wawere kwaku Yehova, yo wamuchitiyengi lisungu, wawere kwaku Chiuta widu, pakuti wagowokengi ukongwa.”—Yesaya 55:7.