“Pakuti mazu ngaku Chiuta ngamoyu ndipuso nganthazi, ngakuthwa kuluska lipanga lelosi lawuyi kosikosi, ndipu ngahoma mpaka kupatuwa umoyu ndi mzimu, kweniso kupatuwa mafundu nga viwanga ku mafuta nga muviwanga, ndipuso ngaziŵa maŵanaŵanu ndi makhumbiru nga mtima.”—Aheberi 4:12, Bayibolu la Charu Chifya.

 “Chifukwa ngamoyu mazu ghaku Chiuta ndi ngakuchita, ndingakuthwa kwakuruska lipanga losi la uyi kosekose, ndipo ghaporota mpaka ku mugaŵiru wa umoyo ndi mzimu ndi marunga ndi mdinthi, ndi ngapusu kuteska maghanoghano ndi makhumbu gha mtima.”—Aheberi 4:12, Mazu Ghaku Chiuta.

 Uthenga waku Chiuta wo ukulembeka mu Bayibolu, we ndi nthazi zakuvumbuwa maŵanaŵanu kweniso vilatu vidu. Uthenga wenuwu ungawovya so ŵanthu kusintha nkharu yawu kuti aje ŵanthu amampha.

 “Mazu ngaku Chiuta ngamoyu.” Mazu ngakuti “mazu ngaku Chiuta” ngamiya malayizgu ngaku Chiuta, pamwenga khumbu laki nge mo vikulembeke mu Bayibolu. a Khumbu laki likulu ukongwa ndakuti ŵanthu wosi wo atimuvwiya azije ndi umoyu kwamuyaya pacharu chapasi mwachimangu kweniso mwakukoliyana.—Genezesi 1:28; Salimo 37:29; Chivumbuzi 21:3, 4.

 Kumbi mazu ngaku Chiuta, pamwenga khumbu laki ‘vamoyu’ munthowa wuli? Ngamoyu munthowa yakuti nge ndi nthazi yakusintha mtima waku wo angazomera ndipu ngatiŵawovya kuja ndi chilindizga kweniso chilatu pa umoyu wawu. (Dotoronome 30:14; 32:47) Kusazgiyapu yapa, malayizgu ngaku Chiuta “ngamoyu” so chifukwa Chiuta walutirizga kugwira ntchitu kuti wafiski khumbu laki lo wakulayizga. (Yohane 5:17) Mwakupambana ndi ŵanthu, Chiuta wapusika cha pamwenga kuluwa vo walayizga. (Numeri 23:19) Mazu ngaki “ngazamuwere cha kwaku [iyu] kwambula kuchita kanthu.”—Yesaya 55:10, 11.

 “Mazu ngaku Chiuta . . . nganthazi.” Mazu ngakuti “nganthazi” ngangafwatulikiya so kuti “ngakuchita,” pamwenga kuti “ngafiska cho ngakhumbikiyanga kuchita.” Mwaviyo, chechosi cho Yehova b Chiuta wakamba pamwenga walayizga chazamufiskika nadi. (Salimo 135:6; Yesaya 46:10) Kukamba uneneska, Chiuta wangafiska malayizgu ngaki munthowa yo isi talekanga kuyiŵanaŵaniya.—Aefeso 3:20. c

 Mazu ngaku Chiuta “nganthazi” so chifukwa ngatovya ŵanthu wo atingawona kuti ngakuzirwa kuti asinthi umoyu kweniso umunthu wawu. Ndipu maŵanaŵanu, vo atanja pa umoyu wawu kweniso vilatu vawu vilongozgeka ndi vo Chiuta wasambiza. (Aroma 12:2; Aefeso 4:24) Mwaviyo tingakamba kuti, “mazu ngaku Chiuta . . . ngagwira so ntchitu” mwaku wo angazomereza.—1 Atesalonika 2:13.

 “Mazu ngaku Chiuta . . . ngakuthwa kuluska lipanga lelosi lawuyi kosikosi.” Tingakamba kuti mazu ngaku Chiuta ngakuthwa kuluska lipanga lo munthu weyosi wangapanga chifukwa nge ndi nthazi ukongwa. Veviyo chifukwa uthenga waku Chiuta ungamufika pamtima munthu, mkati chayimu, kuluska chisambizu chinyaki chechosi cha ŵanthu. Venivi ndivu lemba la Aheberi 4:12 lilutirizga kukamba.

 “Mazu ngaku Chiuta . . . ngahoma mpaka kupatuwa umoyu ndi mzimu, kweniso kupatuwa mafundu nga viwanga ku mafuta nga muviwanga.” Mu Bayibolu mazu ngakuti, “umoyu” ngangang’anamuwa mo munthu wawoneke kubwalu penipo mazu ngakuti “mzimu” ngangang’anamuwa mo munthu waliri nadi mkati mumtima. (Agalatiya 6:18) Tingakamba kuti, “mazu ngaku Chiuta” ngafika mpaka mu “mafuta nga muviwanga,” kung’anamuwa mukati chayimu mwa maŵanaŵanu ngidu. Ndipu chifukwa chakuti vo Yehova wasambiza ve ndi nthazi yakuvumbuwa mo tiliri nadi mumtima, mo palivi munthu weyosi yo wangawonamu, vingatiwovya kuti tisinthi umoyu widu. Kuchita venivi kutimukondweska ukongwa Mlengi widu ndipuso nasi tikondwa.

 “Mazu ngaku Chiuta . . . ngaziŵa maŵanaŵanu ndi makhumbiru nga mtima.” Mo munthu wachitiya asani wavwa mazu ngaku Chiuta vingavumbuwa maŵanaŵanu kweniso makhumbiru ngaki chayingu pamwenga vilatu vaki, vo vichitiska kuti waje ndi jalidu linyaki. Mwakuyeruzgiyapu, asani munthu wasintha vinthu viheni vo wachitanga pa umoyu waki chifukwa cha kuŵerenga mazu ngaku Chiuta, vilongo kuti ngwakujiyuyuwa kweniso wachita vinthu mwauneneska. Venivi vilongo kuti wakhumba kukondwesa Mlengi waki. Kweni asani watingasaniriya vifukwa mazu ngaku Chiuta, vingalongo kuti we ndi mijalidu yiheni nge kunyada pamwenga kujikuzga. Panyaki wangachita venivi chifukwa watijiŵikiya kuvuli asani wachita chinthu chinyaki chiheni cho Chiuta watinkha.—Yeremiya 17:9; Aroma 1:24-27.

 Nge mo buku linyaki likambiya, mazu ngaku Chiuta “ngangamufika pamtima munthu, mkati chayimu.” Palivi chigaŵa cha umunthu widu cho Yehova wangaleka kuchiwona kweniso cho mazu ngaki ngangatondeka kuvumbuwa. Lemba la Aheberi 4:13 likamba kuti: “Vinthu vosi ve nkhuli ndipuso ve pakweru pa masu paku yo tazakumumuka.”

 Buku la Aheberi lingulembeka ndi Paulo cha m’ma 61 C.E., ndipu buku lenili ndi kalata yo wangukambirika kuti walembe Akhristu a Chiyuda wo ajanga ku Yerusalemu ndi ku Yudeya.

 Mu chaputala 3 ndi 4, Paulo wakonkhoska mo chakuwoniyapu cha Ayisirayeli a mu nyengu yakali chitcheŵeske Akhristu mazuŵa nganu. (Aheberi 3:8-12; 4:11) Yehova wangulayizga kuti wataskengi Ayisirayeli ku ukapolu ndipu walutengi nawu mucharu cho ‘amujanga mwakuvikilirika.’ (Dotoronome 12:9, 10) Kweni Ayisirayeli wo angutuwa ku Ijipiti, mwakuwerezawereza alongonga kuti angagomezganga cha malayizgu ngaku Chiuta ndipu kanandi avwiyanga cha marangu ngaki. Chifukwa cha venivi, yiwu ‘angusere cha mu chipumulu chaku Chiuta,’ kung’anamuwa kuja pa ubwezi wamampha ndi Chiuta. Mumalu mwaki, angufwiya muchipululu. Chinanga kuti ŵana ŵawu anguchisere Mucharu Chakulayizgika, kweni nawu angwamba kuleka kuvwiya Yehova. Venivi vinguchitiska kuti mukuluta kwa nyengu, mtundu wosi ukumani ndi masuzgu ngakulu.—Nehemiya 9:29, 30; Salimo 95:9-11; Luka 13:34, 35.

 Paulo wakonkhoska kuti Akhristu atenere kusambirapu kanthu pa vo Ayisirayeli ambula kugomezgeka anguchita. Mwakupambana ndi yiwu, isi tingasere mu chipumulu chaku Chiuta asani tivwiya mazu ngaki kweniso asani titingagomezga ukongwa malayizgu ngaki.—Aheberi 4:1-3, 11.

 Woneriyani kavidiyo kafupi yaka kuti muvwi vo ve mubuku la Aheberi.