KUKONKHOSKA MAVESI NGA MU BAYIBOLU

Yohane 3:16—“Pakuti Chiuta Wakuchiyanja Ukongwa Charu”

JULANI

“Pakuti Chiuta wakuchiyanja ukongwa charu, mwakuti wakupereka Mwana waki wapade, kuti weyosi yo wavwana mwaku iyu waleki kunangika, kweni waje ndi umoyu wamuyaya.”—Yohane 3:16, Bayibolu la Charu Chifya.

Vo Lemba la Yohane 3:16 Ling’anamuwa

Chiuta watitiyanja ndipu wakhumba kuti tizije ndi umoyu wamuyaya. Ndichu chifukwa chaki wangutuma Mwana waki, Yesu Khristu, kuti wazi pa charu chapasi. We pacharu chapasi, Yesu wangugwira ntchitu yakukhumbika ukongwa. Yimoza mwa ntchitu zo wangugwira, nkhusambiza akusambira ŵaki vakukwaskana ndi Chiuta wo Mbawisi. (1 Peturo 1:3) Chinthu chinyaki cho wanguchita, nkhupereka umoyu waki kuti wataski ŵanthu. Mwaviyo, kuti tizisaniyi umoyu wamuyaya, tikhumbika kuja ndi chivwanu mwaku Yesu.

Tingakamba kuti Chiuta we ndi chanju chikulu chifukwa cha mazu yanga ngakuti, “wakupereka Mwana waki wapade.” a Yesu ndi Mwana wapade waku Chiuta. Ntchifukwa wuli tikamba viyo? Ntchifukwa chakuti iyu pe ndiyu Chiuta wakumulenga mwakudunjika. (Akolose 1:17) Yesu ndiyu “wakwamba kuwaku pa chilengedu chosi.” (Akolose 1:15) Vakulengeka vinyaki vosi, kusazgapu angelu, vikulengeka kuziya mwaku Yesu, pamwenga kuti chifukwa chaku iyu. Kweni, Yehova b Chiuta wenga wakukhumbisiska kutumiza mwana waki wakwanjiwa “kuziteŵete ndi kupereka umoyu waki sembi yakuwombole ŵanthu anandi.” (Mateyu 20:28) Yesu wangutombozgeka ndipuso kufwa kuti watiwombo ku ubudi ndi nyifwa vo tikuhara kutuliya kwaku Adamu.—Aroma 5:8, 12.

Nkhani ya pa Yohane 3:16

Yesu wangukamba mazu nga mu lemba ili, panyengu yo wakambiskananga ndi Nikodimu yo wenga mulongozgi mu chisopa cha Chiyuda. (Yohane 3:1, 2) Achikambiskana, Yesu wangukonkhoska vakukwaskana ndi Ufumu waku Chiuta c ndipuso nkhani yakukwaskana ndi ‘kubalika so.’ (Yohane 3:3) Kweniso wangukambiya limu mo wafwiyengi. Iyu wangukamba kuti: ‘Mwana wa munthu wasoskekengi [kukhomeka pa chimiti], kuti weyosi yo wavwana mwaku iyu waje ndi umoyu wamuyaya.’ (Yohane 3:14, 15) Iyu wangukamba kuti Chiuta wakutipaska mwaŵi wenuwu chifukwa chakuti watitiyanja ukongwa. Pavuli paki Yesu wangumaliza ndi fundu yakuti, kuti tizisaniyi umoyu wamuyaya, tikhumbika kuja ndi chivwanu kweniso kuchita vo vikondwesa Chiuta.—Yohane 3:17-21.

a Mazu nga Chigiriki ngakuti monogenes, ngo ngakufwatulika kuti “wapade” ngang’anamuwa “yumoza pe, . . . wambula kuyanana ndi munyaki pamwenga kuti chinthu chambula kuyanana ndi chinyaki.”—A Greek-English Lexicon of the New Testament and Other Early Christian Literature, peji 658.

b Yehova ndilu zina laku Chiuta.—Salimo 83:18.

Kuja ndi chivwanu mwaku Yesu kusazgapu vinandi kuphara waka kumugomezga pamwenga kuziŵa vo wakutichitiya. Mumalu mwaki, tingalongo kuti te ndi chivwanu mu Mwana waku Chiuta asani titimuvwiya kweniso kuchita vo iyu wachitanga. (Mateyu 7:24-27; 1 Peturo 2:21) Bayibolu likamba kuti: “Munthu yo wavwana mu Mwana, we ndi umoyu wamuyaya, ndipu munthu yo waleka kuvwiya Mwana, wazakuwuwona cha umoyu.”—Yohane 3:36.

c Ufumu waku Chiuta udanika so kuti “Ufumu wakuchanya,” ndipu Ufumu wenuwu ndi boma lakuchanya. (Mateyu 10:7; Chivumbuzi 11:15) Chiuta wakusankha Khristu kuja Fumu ya Ufumu wenuwu. Ndipu Ufumu waku Chiuta wenuwu wazamufiska khumbu laku Chiuta pa charu chapasi. (Daniyeli 2:44; Mateyu 6:10) Kuti muvwi vinandi, ŵerengani nkhani ya mutu wakuti “Kumbi Ufumu waku Chiuta Ntchinthu Wuli?”