Tutobela malayilile aamuBbayibbele chiindi nituchita “Mulalilo wa Mwami,” naa Chiyubulusyo chalufu lwaJesu. (1 Bakorinto 11:20) Kusiyana azeezi, zintu zisyomwa alubo zichitwa mulizimwi zikombelo atala aMulalilo waMwaami tazizwi muBbayibbele pe.

 Makanze aakuchita Mulalilo waMwaami ngakuyeeya Jesu, katutondeezya kuti tulalumba akaambo kakulipeda nkwaakachita akaambo kandiswe. (Matayo 20:28; 1 Bakorinto 11:24) Mabambe aaya teengakuchita pobwe pe naakuti nchilengwa chabukombi chichitwa kuti muntu alekelelwe zibi. a Bbayibbele liyiisya kuti zibi zyesu zilakonzya kulekelelwa, kutali kwiinda muzilengwa zyabukombi, pesi kwiinda mulusyomo muli Jesu.—Baroma 3:25; 1 Johane 2:1, 2.

 Jesu wakalayilila basikwiiya bakwe kuti kabachita Mulalilo waMwaami, pesi taakaamba pe kuti kwaziindi zingane. (Luka 22:19) Bamwi bayeeya kuti kulikabotu kuchita oobo mwezi amwezi, mviki amviki, buzuba abuzuba, kwaziindi zyiingi mubuzuba naakuti kufumbwa chiindi muntu naayeeya kuti achite oobo. b Nikuba boobo, kuli twaambo tumwi tweelede kulangwa-langwa.

 Jesu wakatalisya Mulalilo waMwaami mubuzuba nibakali kuchita Pobwe Lyakwiindilila maJuda alubo wakafwa mubuzuba mbuboobo. (Matayo 26:1, 2) Eezi teezyakalichitikila pe. Magwalo akozyanisya kulipeda kwaJesu achituuzyo chamwanaambelele waPobwe Lyakwiindilila. (1 Bakorinto 5:7, 8) Pobwe Lyakwiindilila lyakali kuchitwa chiindi chimwi amunyaka. (Kulonga 12:1-6; Levitiko 23:5) Munzila iikozyenie, maKristu bamumwaanda wakusaanguna bakali kuchita Chiyubulusyo chalufu lwaJesu chiindi chimwi luzutu mumunyaka, c ambabo Bakamboni baJehova batobelezya chilengwa eechi chizwa muBbayibbele.

 Mbwaakachichita Chiyubulusyo chakusaanguna Jesu kutugwasya kuti tuzibe kuti tweelede chichita tungane, buzuba nitweelede kuchichita achiindi. Wakachita Chiyubulusyo nilyakabbila zuba muNisani 14, 33 C.E., kweendelana akkalenda yamuBbayibbele. (Matayo 26:18-20, 26) Tulazumanana kuchita Chiyubulusyo mubuzuba oobu munyaka amunyaka, katutobelezya chilengwa chamaKristu bamumwaanda wakusaanguna. d

 Nikuba kuti Nisani 14, 33 C.E. yakali muli Bwasanu, buzuba oobo bulakonzya kuwida mubuzuba bumbi bwamviki munyaka amunyaka. Tulabuziba buzuba oobo bwaNisani 14 mpubuwida munyaka amunyaka kwiinda mukubelesya nzila njibakali kubelesya muchiindi chaJesu, kutali kubelesya nzila iibelesegwa muKkalenda yamazubaano yamaJuda.

 Kupobwe pya eeli, Jesu wakabelesya chinkwa chitakwe bumena awayini iisalala zyakasyaala kuPobwe Lyakwiindilila. (Matayo 26:26-28) Katutobela chikozyano chakwe, tubelesya chinkwa chitakwe bumena naakuti chitabikkidwe budodoodo awaini iisalala iitavweledwe.

 Zikombelo zimwi zibelesya chinkwa chilaabumena, pesi muBbayibbele chiindi chiingi bumena bwiiminina chibi akusofwaala. (Luka 12:1; 1 Bakorinto 5:6-8; Bagalatiya 5:7-9) Chinkwa chitakwe bumena abudodoodo nchicho chikonzya kweelela kwiiminina mubili waKristu uutakwe chibi. (1 Petro 2:22) Chilengwa chimbi chitazwi muBbayibbele nchakubelesya minsaansa kupanga wayini. Zikombelo zimwi zichita oobo akaambo katwaambo tutali twamumagwalo twakukasya bantu kuti kabanywa bukande.—1 Timoteyo 5:23.

 Chinkwa chitakwe bumena awayini iisalala zibelesegwa lyaChiyubulusyo nzitondeezyo zyamubili waKristu aganzi. Tazichinchwi munzila yachigambyo pe naakuti kuswaaanizigwa aamubili wachoonzyo waKristu naakuti ganzi, kweendelana ambubayeeya bamwi. Amulange-lange zyaambwa aaMagwalo atala amakani aaya.

•   Kuti Jesu wakalayilila basikwiiya bakwe kuti banywe ganzi lyakwe, nkukuti wakali kubabuzya kuti batyole mulawu waLeza ulaatala akulya ganzi. (Matalikilo 9:4; Milimo 15:28, 29) Taakwe nizyakachitika pe eezi, nkaambo Jesu takonzyi pe kubuzya bamwi kuti batyole mulawu waLeza ulaatala ambulisalala ganzi.—Johane 8:28, 29.

•   Kuti baapostolo bakali kunywa ganzi lyaJesu chachoonzyo, nkukuti Jesu taakalinoowamba pe kuti ganzi naakuti bulowa bwakwe “bweelede kutilwa ansi,” zitondeezya kuti chipayizyo chakali kuyooboola kunembo.—Matayo 26:28.

•   Chipayizyo chaJesu chakachitika “ciindi comwe buyo.” (Bahebrayo 9:25, 26) Nikuba boobo, kuti chinkwa awayini zyakachinchwa akuba mubili wachoonzyo waJesu ganzi kuMulalilo waMwaami, nkukuti aabo balya nibali kupa chipayizyo eecho kwaziindi zyiingi.

•   Jesu wakaamba kuti: “Kamucita oobu lyoonse kutegwa kamundiyeeya,” kutali “kundituula.”—1 Bakorinto 11:24.

 Aabo basyoma kuti chinkwa awayini zilachincha akuba mubili waJesu wachoonzyo aganzi, njiisyo yabo iyeeme amajwi aamwi aamutupango twamuBbayibbele. Muchikozyano, mumaBbayibbele miingu, Jesu waamba boobu kujatikizya wayini: ‘Oobu mbulowa bwangu.’ (Matayo 26:28) Nikuba boobo, majwi aaJesu alakonzya kusandululwa kuti: “Eeci ciiminina bulowa bwangu.” e Mbuli mbwaakali kuchita ziindi zyiingi, Jesu aawa wakali kuyiisya kwiinda mukubelesya maambilambali.—Matayo 13:34, 35.

 Chiindi Bakamboni baJehova nibachita Mulalilo waMwaami, mbache loko balya chinkwa akunywa wayini. Nkamboonzi?

 Ganzi ndyaakatila Jesu lyakatalisya “cizuminano cipya” chakanjila mubusena bwachizuminano chakali aakati kaJehova achisi chamaIsrayeli. (Bahebrayo 8:10-13) Aabo bali muchizuminano eecho chipya mbiibalya zitondeezyo lyaChiyubulusyo. Chizuminano eecho tachibikkilizyi maKristu boonse, pesi chiswaanizya “baabo bakaitwa” munzila iigamanide aLeza. (Bahebrayo 9:15; Luka 22:20) Aaba mbibayooyendelezya kujulu kabalaamwi aKristu alubo Bbayibbele lyaamba kuti aabo balaachilongezyo eechi bali 144 000 luzutu.—Luka 22:28-30; Ciyubunuzyo 5:9, 10; 14:1, 3.

 Kusiyana ‘akatanga kaniini’ kabaabo bayooyendelezya aKristu, bwiingi bwesu tuli aabulangilizi bwakuba chipanzi ‘cankamu mpati’ iiyootambula buumi butamani anyika. (Luka 12:32; Ciyubunuzyo 7:9, 10) Nkinkaako iswebo nituli aabulangilizi bwakuyoopona anyika tatunywi naakuti kulya zitondeezyo lyaChiyubulusyo, pesi tuchichitaamwi katutondeezya kuti tulalumba kukulipeda nkwaakachita Jesu akaambo kandiswe.—1 Johane 2:2.