1. Niinzi nzitukonzya kusala kuchita mumulimu waJehova?

 MBUKUNGA tuli maKristu bakasimpe, tulamuyanda Jehova amoyo woonse. Tuyanda kuchita zyoonse nzitukonzya mumulimu wakwe. Kuti tukonzye kuchita oobo, tweelede kubeleka changuzu kuti tube aabuntu bwachiKristu, twiiye kuchita iimwi milimu akuti tuyanduule nzila zyakugwasya bakombima.

2. Nkamboonzi nitweelede kuchita zyiingi mumulimu waJehova?

² Nkamboonzi nitweelede kuchita zyiingi mumulimu waJehova? Chakusaanguna, tuyanda kubotezya Taateesu wakujulu. Jehova ulabotelwa chiindi natubona katubelesya zipo zyesu mumulimu wakwe. Chachibili, tuyanda kuchita zyiingi kuchitila kuti tugwasye bakombima. (1 Tes. 4:9, 10) Nikuba kuti twaba aachiindi chilamfu biyeni katuli mukasimpe, toonse tulakonzya kuchita zyiingi mumulimu waJehova. Kwalino, atubone kuti ngatulazichita biyeni.

3. Kweendelana alugwalo lwa 1 Timoteyo 4:12-16, mwaapostolo Pawulu wakamusungwaazyaanzi Timotewo?

³ Timotewo wakali waba mwaalu uuli aaluzibo kale chiindi mwaapostolo Pawulu naakamulembela lugwalo lwakusaanguna. Nikuba boobo, Pawulu wakamusungwaazya kuti achite zintu zyakali kukonzya kupa kuti asime mubukombi. (Bala 1 Timoteyo 4:12-16.) Kuti wayeeyesesya atala amajwi aaPawulu, ulabona kuti Pawulu wakali kuyanda kuti Timotewo abeleke changuzu kuti abe aabuntu bwachiKristu mbuli kuba aaluyando, lusyomo akuti abe muntu uusalala muzintu zyoonse nzyaakali kuchita. Alubo wakali kuyanda kuti Timotewo ayungizye  luzibo lwakwe lwakubala kunembo lyabantu, kulaya akuyiisya. Nkinkaako, muchiiyo eechi tulabelesya chikozyano chaTimotewo kuti tubone mbutukonzya kusala zyakuchita mumulimu waJehova kuchitila kuti tuchite zintu zimubotezya. Alubo tulabona zimwi nzila zikonzya kutugwasya kuti tuchite zyiingi mumulimu wakukambawuka.

4. Kweendelana alugwalo lwa Bafilipi 2:19-22, niinzi zyakapa kuti Jehova amubelesye Timotewo?

⁴ Nkamboonzi Jehova naakamubelesya Timotewo? Nkaambo wakali aabuntu bubotu bwachiKristu. (Bala Bafilipi 2:19-22.) Kuzwa kuzintu zyakaambwa aaPawulu atala aTimotewo, tulakonzya kubona kuti Timotewo wakali muntu uulibombya, uusyomeka, uubeleka changuzu alubo uuchita zintu zyoonse nzyaabuzigwa kuti achite. Timotewo wakali kubayanda bakombinyina alubo wakali aandaba ambabo. Eezi zyakapa kuti Pawulu amuyande loko Timotewo akuti amupe imwi milimu miyumu. (1 Kor. 4:17) Munzila iikozyenie, Jehova ulatuyanda alubo ulatubelesya mumbungano kuti twabeleka changuzu kuti tube aabuntu mbwayanda.—Int. 25:9; 138:6.

5. (a) Nga ulachita biyeni kuti ubambulule bumwi buntu mbulaabo? (b) Mbuli mbukutondeezedwe muchifanikisyo, niinzi nzyalikuchita muchizi wachiniini zitondeezya kuti ulikubelekela kuba muntu uuli aaluzyalo?

⁵ Sala buntu mbuyanda kubelekela. Komba kuli Jehova alubo uyeeyesesye atala abuntu mbuyanda kubelekela. Kuzwa waawo, usale buntu bumwi biyo. Muchikozyano, amwi ulakonzya kuyanda kubelekela kuba muntu uuli aaluzyalo, uuli aachiyandisyo chakugwasya bakombinyokwe naakuti kuba muntu uuli aaluumuno aabamwi akuba muntu uulekelela. Ulakonzya kugwasigwa kuti wakumbila mweenzinyokwe ngusyoma kuti akugwasye kubona mbukonzya kuzichita.—Tus. 27:6.

6. Niinzi nzukonzya kuchita kuti ubambulule bumwi buntu mbulaabo?

⁶ Beleka changuzu kuti uzuzikizye zintu nzwaasala. Nga ulazichita biyeni? Imwi nzila nkwiiya atala abuntu mbuyanda kubelekela. Atuteedi uyanda kuba muntu uulekelela, ulakonzya kubala akuyeeyesesya atala alwaano lwamuBbayibbele lwabantu bakali kulekelela abantu bakatali kulekelela. Muchikozyano, ulakonzya kuyeeya atala achikozyano chaJesu. Jesu wakali kulekelela bamwi kazizwa  aansi aamoyo. (Lk. 7:47, 48) Wakali kubikkila maanu kuzintu zibotu nzibakali kuchita bamwi kutali kuzintu nzibakali kulubizya. Pesi baFarisi bamuchiindi chaJesu bakali kubona “bamwi kuti mbabuyo.” (Lk. 18:9) Nwaamana kuyeeyesesya atala azikozyano eezi, libuzye kuti: ‘Niinzi nzindibona muli bamwi? Mbuubuli buntu bubotu mbubalaabo mbundiyanda kubikkila maanu?’ Kuti kakukuyumina kulekelela umwi muntu, yezya kulemba aansi buntu boonse bubotu mbwalaabo mpawo ulibuzye kuti: ‘Jesu umubona biyeni muntu ooyu? Wali kunoomulekelela na?’ Kuchita oobo kulatugwasya kuti tubambulule buntu bwesu. Kumasaangunino, ngakuyanda kuti tubeleke changuzu kuti tukonzye kulekelela muntu watubisizya. Kuti twazumanana kuchita oobo, mukuya kwachiindi kuzootubila kulekelela bamwi amoyo woonse.

7. Lugwalo lwa Tusimpi 22:29, lutondeezya biyeni kuti Jehova ulikubelesya bakwesu abachizi bali aaluzibo lwakuchita iimwi milimu?

⁷ Zimwi nzukonzya kusala kuchita nkwiiya kuchita iimwi milimu. Yeeya atala abantu biingi bayandikana kuti bayake mawofesi aaMutabi, Maanda Aachitilwa Miswaangano Mipati aMaanda aaBwaami. Biingi bakayiya kuchita milimu eeyi kuzwa kubakwesu abachizi bali aaluzibo lwakuchita milimu. Mbuli mbukutondeezedwe muchifanikisyo, bakwesu abachizi balikwiiya kuchita imwi milimu kuchitila kuti bakakonzye kubambulula Maanda Aachitilwa Miswaangano Mipati aMaanda aaBwaami. Jehova Leza, “Mwami walyoonse alyoonse,” aKristu Jesu, ‘Mwami . . . wabami,’ bali kuchita milimu iigambya loko kababelesya bantu aaba bali aaluzibo. (1 Tim. 1:17; 6:15; bala Tusimpi 22:29.) Tuyanda kubeleka changuzu akubelesya luzibo lwesu muzintu zyoonse nzituchita kuchitila kuti Jehova alemekwe kutali kuti tulemekwe.—Joh. 8:54.

8. Niinzi nzukonzya kuchita kuti uyiile kuba aaluzibo lwakuchita imwi milimu?

⁸ Sala mulimu nguyanda kuyiila. Nguuli mulimu ngukonzya kuyiila? Ulakonzya kwaambuula aabaalu bambungano yanu naakuti mulangizi wabbazu wanu kuti bakugwasye kuziba zintu nzukonzya kusala kuchita. Muchikozyano, kuti bakubuzya kuti ubelekele kwaambuula akuyiisya munzila iinywisya maanzi, ulakonzya kubakumbila kuti bakubuzye buntu mbweelede kubaabo kuchitila kuti ukonzye kuchita nzibakubuzya mpawo ubeleke changuzu kuti ukonzye kuba aabuntu oobo. Pesi nga ulazichita biyeni eezi?

9. Niinzi nzukonzya kuchita kuti uzuzikizye zintu nzwaasala kuchita?

⁹ Beleka changuzu kuti uzuzikizye zintu nzwaasala. Atuteedi uli kubelekela kuyiisya munzila iinywisya maanzi, ulakonzya kubala kabbuku kategwa Sungwaala Kukubala Akukuyiisya. Kuti wapegwa chipanzi chakuchita kumiswaangano yaakati kamviki, ulakonzya kukumbila umwi mukwesu kuti aswiilile chiindi nwanoopulakitizya chipanzi chako mpawo akubuzye mpuyelede kubambulula. Libambile zipanzi zyoonse nzulaazyo kakuchili chiindi kuchitila kuti bantu babone kuti ubeleka changuzu akuti ulayichita milimu yoonse njupegwa.—Tus. 21:5; 2 Kor. 8:22.

10. Amba chikozyano chikonzya kutugwasya kuti tuzumanane kuyiila chimwi chintu nchituyanda.

¹⁰ Atuteedi wasala kuchita chimwi chintu pesi ulikukachilwa kuti uchichite. Utamani manguzu pe. Mukwesu uutegwa Garry kwakali kumuyumina kubala kabotu. Uchiyeeyede limwi zuba mbaakaba aabweeme chiindi naakali kweezya kubalila aajulu kumiswaangano yambungano. Pesi wakazumanana kubeleka changuzu. Garry wakaamba kuti, lino  waabukonzya kupa nkani kuNg’anda yaBwaami, kumiswaangano yabbazu akumiswaangano yabbooma.

11. Niinzi nzitukonzya kuchita kuti tukonzye kuchita zyiingi mumulimu waJehova mbuli Timotewo?

¹¹ Timotewo wakazookonzya na kwaambuula akuyiisya munzila iinywisya maanzi? Bbayibbele talyaambi pe. Pesi zilaantanganana kuti Timotewo wakabeleka changuzu kumilimu yoonse njaakali kuchita mbuli mbaakalayililwa aPawulu. (2 Tim. 3:10) Munzila iikozyenie, kuti twabeleka changuzu mumilimu yoonse njituli kuyiila, tulakonzya kuchita zyiingi mumulimu waJehova.

12. Wakagwasigwa biyeni abakombinyokwe?

¹² Toonse tulagwasigwa azintu zichitwa aabamwi. Muchikozyano, chiindi nituli muchibbadela, tulabotelwa kuti baalu bali muKkomiti Yakwaambuuzyania Abasilisi naakuti bali muTubunga Tuswaya Bachiswa batuswaya. Chiindi nituswaanana aabuyumu-yumu mubuumi bwesu, tulabotelwa chiindi baalu nibatuswiilizya nitwaamba mbutulimvwa anibatuumbulizya. Alubo kuti katuyanda kugwasigwa chiindi nitwiiya aawumwi muntu Bbayibbele, tulabotelwa chiindi payona uuli aaluzibo natusindikila kuchiiyo chesu anatupa malayilile aakonzya kutugwasya. Bakwesu abachizi aaba balabotelwa chiindi nibatugwasya. Andiswe tulakonzya kubotelwa kuti twagwasya bakombima. Jesu wakaamba kuti: “Kupa kulakkomanisya kapati kwiinda kupegwa.” (Mil. 20:35) Kuti kuyanda kuchita zyiingi mumilimu eeyi naakuti muliimwi, niinzi zikonzya kukugwasya kuti uchite oobo?

13. Tweelede kuchitaanzi kuti katuyanda kuchita chimwi chintu?

¹³ Sala chimwi chintu nchuyanda kuchita mpawo ubeleke changuzu kuti uchichite kutali kwaamba kuti ndiyanda kuchita zyiingi luzutu. Muchikozyano, ulakonzya kulibuzya kuti, ‘Ndiyanda kuchita zyiingi mumbungano.’ Pesi nkuyumu kuziba mbukonzya kuzuzikizya zintu nzutasalide alubo nkuyumu kuti uzibe kuti wazizuzikizya na. Nkinkaako, sala chintu nchuyanda kuchita. Ulakonzya kuchilembaansi chintu eecho mpawo upulane kuti nga ulachizuzikizya biyeni.

14. Nkamboonzi nitweelede kulipeda kuchincha chiindi nitusala kuchita zimwi zintu?

¹⁴ Tweelede kulibambila kuchincha chiindi nitusala kuchita zimwi zintu. Nkamboonzi?  Nkaambo zyiimo zyesu zilakonzya kuchincha kufumbwa chiindi. Muchikozyano, Pawulu wakagwasya kujula mbungano kuTesalonikka. Kulakonzeka kuti Pawulu wakali aamakanze aakuti akkale nkukooko kuchitila kuti agwasye maKristu bakachili bapya. Pesi basikukazya bakazoopa kuti Pawulu azwe kuTesalonikka. (Mil. 17:1-5, 10) Kaansinga Pawulu wakakkala muTesalonikka nikuli wakanjizya bakombinyina mumapenzi. Pesi Pawulu taakaleka pe kubagwasya. Wakayanduula zimwi nzila zyakuti abagwasye kweendelana achiimo chakwe. Mukuya kwachiindi, wakazootuma Timotewo kuti akagwasye maKristu bakuTesalonikka muzintu zyabukombi. (1 Tes. 3:1-3) Kweelede kuti maKristu aaba bakabotelwa loko chiindi nibakabona Timotewo mbaakalipeda kugwasya kufumbwa kwakali kuyandikana lugwasyo.

15. Amba chikozyano chitondeezya zilongezyo nzitulaazyo mbuzikonzya kuchincha akaambo kazyiimo.

¹⁵ Tulakonzya kujana zyiiyo kuzwa kuli zyakachitikila Pawulu chiindi naakali kuTesalonikka. Tulakonzya kubeleka changuzu kuti tujane chimwi chilongezyo mumbungano pesi zyiimo zyesu zilakonzya kuchincha mpawo zitukachizye kujana chilongezyo eecho. (Muk. 9:11) Kuti kakuli eezi nzizyo zyakakuchitikila, lipede kuchita zimwi zintu zyeendelana aachiimo chako. Eezi nzizyo zyakachitwa aaMukwesu Ted amwanakazi wakwe Hiedi. Bakayimikila kubelekela kuBbeteli akaambo kakuchiswa-chiswa. Pesi akaambo kakuti balamuyanda Jehova, bakayanduula zimwi nzila zyakuti bachite zyiingi mumulimu wakukambawuka. Kumasaangunino, bakabweza bupayona bwachiindi choonse mpawo mukuya kwachiindi bakazoosalwa kuba mapayona aayandikana alubo Ted wakazooyiisigwa kuba sikujatila wamulangizi wabbazu. Minyaka yabakwesu babeleka kabali balangizi bamabazu niyakachincha, Ted aHiedi bakabona kuti tabachikonzyi pe kubeleka mumulimu ooyu. Nikuba kuti kumasaangunino bakamana manguzu pesi bakazoobona kuti balakonzya kubelekela Jehova munzila zisiyene-siyene. Ted wakaamba kuti: “Twakayiya kuti tatweelede kusala nzila iimwi yakubelekela Jehova pesi tweelede kumubelekela munzila zisiyene-siyene.”

16. Twiiyaanzi kuzwa mulugwalo lwa Bagalatiya 6:4?

¹⁶ Tatukwe manguzu pe aakupa kuti zintu zyeende mbuli mbutuyanda mubuumi bwesu. Nkinkaako, kulayandikana kuti tutaliboni katuyandikana akaambo kazilongezyo nzitulaazyo naakuti kweezyanisya zilongezyo nzitulaazyo anzibalaazyo bamwi. Hiedi wakaamba kuti: “Kuti weezyanisya zintu zichitika mubuumi bwako azichitika mubuumi bwabamwi, tubotelwi pe.” (Bala Bagalatiya 6:4.) Kulayandikana  kuti tuyanduule nzila zyakugwasya bamwi akuti tubelekele Jehova. *

17. Niinzi nzukonzya kuchita kuti uzookonzye kujana zimwi zilongezyo?

¹⁷ Ulakonzya kuchita zyiingi mumulimu waJehova kuti wapona buumi buuba akutaba muntu uukweleta-kweleta. Saanguna kuchita zintu ziniini kuchitila kuti uzookonzye kuchita zintu zipati. Muchikozyano, kuti kuyanda kuzooba payona wachiindi choonse, ulakonzya kubweza bupayona bwakugwasilizya kwamyeezi myiingi. Kuti kuyanda kuzooba mubelesi uubelekela, ulakonzya kumaninsya chiindi chiingi kuli mumulimu wakukambawuka akuswaya bachiswa kuswaanizya abakwesu abachizi bachembeede bamumbungano yanu. Luzibo ndujana lino lulakonzya kukugwasya kuti uzoojane zilongezyo zyiingi muchiindi chili kunembo. Beleka amanguzu aako woonse kumilimu yoonse njupegwa lino.—Rom. 12:11.

18. Mbuli mbukutondeezedwe muchifanikisyo, wayiyaanzi kuzwa kuchikozyano chaMuchizi Beverley?

¹⁸ Nikuba kuti twakomena pesi tulakonzya kuchita zyiingi mumulimu waJehova. Atubone chikozyano chaMuchizi Beverley uuli aaminyaka iili 75. Wakachiswa loko zyakuti taakachili kukonzya pe kweenda kabotu. Pesi Muchizi Berverly wakali kuyanda kutola lubazu mubbelekelaamwi lyakutamba bantu kuChiyubulusyo. Wakasala kuchita zintu nzyaakali kukonzya mubbelekelaamwi. Beverley naakazuzikizya zintu nzyaakasala, wakabotelwa loko. Nzyaakachita zyakapa kuti bamwi bakwesu abachizi babeleke changuzu mumulimu wakukambawuka. Jehova uzibona kaziyandikana zintu nzibachita bakwesu abachizi bachembeede nikuba kuti zyiimo ngazyabakachizya kuchita zyiingi.—Int. 71:17, 18.

19. Nziizili zimwi nzitukonzya kusala kuchita?

¹⁹ Sala kuchita zintu nzukonzya kuzuzikizya. Beleka changuzu kuti ube aabuntu bubotezya Jehova. Yiya kuchita milimu iipa kuti uchite zyiingi mumbunga yaLeza. Yanduula nzila zyakugwasya bakombinyokwe. * Mbuli Timotewo, Jehova ulapa kuti “kuyaambele kwako kubonwe abantu boonse.”—1 Tim. 4:15.