Ba Virginia, umwi wa Bakamboni ba Jehova, balilebukide akaambo kakuciswa bulwazi bwakapa kuti milambi yoonse yamumubili ileke kubeleka, ccita buyo yeeyo iipa kuti kabalanga akulaba (locked-in syndrome). Balacikonzya kubona akumvwa, kujalula akujala meso, alimwi akunyanyaasya mutwe asyoonto. Pele tabacikonzyi kwaambaula naa kulya. Aciindi cimwi bakali buyo kabotu. Pele bumwi buzuba mafwumofwumo mu 1997, bakamvwa mutwe wacisa alimwi tiiwakaleka ino pe. Balumi babo bakabatola kucibbadela mpoonya kumangolezya mubuzuba mbweena oobo bakatalika kufwumba bulamfwu. Bakabuka nokwakainda nsondo zyobilo akulijana muwaadi mobalanganya bantu baciswa kapati (ICU), kabalebukide mubili alimwi akubikkwa kumuncini uugwasyilizya kuyoya. Kwamazuba masyoonto, tiibakali kuyeeya cili coonse kujatikizya zyakacitikide musyule alimwi tiibakazyi naa bakali bani.

 Ba Virginia bakapandulula icakatobela. Bakaamba kuti: “Mizeezo yangu yakatalika kupiluka asyoonto-syoonto. Ndakapaila cakutaleka. Tiindakali kuyanda kufwa akusiya mwanaangu alikke, aciindi eeco iwakajisi buyo myaka iili 9. Kutegwa ndibe abusicamba, ndakatalika kuyeeya tupango twamu Bbaibbele.

 “Mukuya kwaciindi, bamadokota bakandigusya muwaadi mobalanganya bantu baciswa kapati. Mpoonya mumyezi iili 6 yakatobela, ndakaunka muzibbadela zisiyene-siyene alimwi akubusena nkobagwasyilizya bantu kupona kabotu abamwi, kumane kumamanino ndakapilusyigwa kuŋanda. Ndakalilebukide mubili woonse alimwi tiindakali kucikonzya kucita cili coonse. Eeci cakandipa kutyompwa kapati! Ndakalimvwa kubula mulimo kuli bamwi akuli Jehova. Acimbi cakali kundipa kulibiIika, nkutacikonzya kumulanganya mwanaangu.

 “Ndakatalika kubala zyakuluula zya Bakamboni bamwi ibakali kuciswa kapati mbuli ndime. Ndakagambwa kapati kubona milimo njobakali kumubelekela Jehova. Eeci cakandikulwaizya kubulanga munzila iili kabotu bukkale bwangu kwiinda mukubikkila buyo maano kuzintu nzyondakali kukonzya kucita. Nondakali kabotu, tiindakajisi ciindi cinji cakucita zintu zyakumuuya. Pele lino, ndilijisi ciindi cinji kapati nkaambo taaku cimbi ncondicita. Aboobo muciindi cakulilekelezya, ndibikkila maano kukubelekela Jehova.

 “Ndakaiya kubelesya kkompyuta. Inga ndilalemba alinjiyo kubelesya software iibona mbondinyanyaasya mutwe wangu. Cilalemya kulemba munzila eeyi, pele ilandigwasya kwiiya Bbaibbele akwaambila bamwi kujatikizya bulangizi mbondijisi kwiinda mukubelesya magwalo alimwi ama e-mail. Kuyungizya waawo, ndilijisi kabboodi kalembedwe mabala aa alufabbeti kandigwasya kubandika abantu bamwi. Muntu ngotubandika limwi ulatondeka bbala limwi alimwi. Ikuti naa watondeka iitali njiyo, ndilaakwaajalula kapati meso; mpoonya ikuti naa watondeka iiluzi, ndilaakufwunya. Inga tulacita mbubonya oobu cakwiinduluka-induluka kutegwa tupange mabala aajisi muzeezo. Bacizyi bamwi ibavwula kujanika andime tacibakatazyi kuzyiba ncondiyanda kwaamba. Nokuba boobo, zimwi ziindi inga tulaseka kapati ikuti naa batondeka bbala iitali njiyo.

 “Ndilakkomana kapati kutola lubazu muzintu nzyoicita mbungano. Kwiinda mukubelesya videoconferencing, ndilajanika kumiswaangano lyoonse. Ndilaakulembela limwi bwiinguzi bwangu, mpoonya catalika cibeela cakubuzya akwiingula, umwi ulandibalila. Kuyungizya waawo, ndilaakusangana kabunga kesu kutegwa tweebelele pulogilamu ya JW Broadcasting yamwezi amwezi. a

 “Ndali kuciswa bulwazi oobu kwamyaka iili 23. Zimwi ziindi ndilaakuusa. Pele cindigwasya nkupaila, kuyanzana abakwesu abacizyi alimwi akuzumanana kujata bubi azintu zyakumuuya. Alimwi buya, kwiinda mukugwasyigwa abasimbungano, ndacikonzya kucita bupainiya bwakugwasyilizya kwamyaka iinda ku 6. Ndilasolekesya kuba cikozyanyo cibotu kumwanaangu Alessandro, lino uukwete alimwi uubeleka kali mwaalu. Kuyungizya waawo, walo antoomwe abakaintu bakwe mbapainiya baciindi coonse.

 “Bunji bwaziindi inga ndileezyeezya zintu nzyondinoolicitila ndelikke muparadaiso. Cakusaanguna ncondiyanda kuyoocita, nkwaambila bamwi kujatikizya Jehova amulomo wangu. Alimwi ndilombozya kuya kweendeenda mumbali aakalonga akukkomana kweebelela busena bulibonya kabotu. Kunze lyaboobo, mbwaanga kwamyaka iili 20 yainda ndilida mukapila, ndilangila ciindi nondiyoolityolela apele akwiilya. Kumane, akaambo kakuti ndakazyalilwa mu Italy, ndilangila ciindi nondinoojika akulya zyakulya nzyondikkomanina zyamucisi cesu, kubikkilizya apiza!

 “‘Bulangizi bwalufwutuko’ bwandigwasya kukwabilila mizeezo yangu. (1 Batesalonika 5:8) Nokuba kuti kwalino ndili mulema, kweezyeezya kuti ndili munyika mpya kundiletela lukkomano alimwi ndilisinizyide kuti ino-ino ndiyoopona. Masimpe, ndilangila ciindi notuyoopona ‘buumi bwini-bwini’ bwalo Jehova mbwaakasyomezya kutupa kwiinda mu Bwami bwakwe.”—1 Timoteyo 6:19; Matayo 6:9, 10.