1 Johane 4:1-21
4 Nobayandwa, mutasyomi majwi* oonse aasololelwa amuuya,+ pele amwaasole majwi* aayo kutegwa mubone naa ncobeni azwa kuli Leza,+ nkaambo basinsimi bakubeja banji balimwaikide munyika.+
2 Lino majwi aasololelwa amuuya wa Leza inga mwaazyiba munzila eeyi: Kufwumbwa majwi aasololelwa amuuya aazumina kuti Jesu Kristo wakaboola mumubili wanyama, azwa kuli Leza.+
3 Pele kufwumbwa majwi aasololelwa amuuya aatamuzumini Jesu taazwi kuli Leza pe.+ Kunze lyaboobo, aaya ngamajwi aasololelwa amuuya aasikulwana Kristo ngomwakamvwa kuti ayooboola,+ alimwi lino mwaali kale munyika.+
4 Nobana bangu bayandwa, nywebo muzwa kuli Leza alimwi mwabazunda kale bantu aabo,+ nkaambo ooyo uukamantene andinywe+ mupati kwiinda yooyo uukamantene anyika.+
5 Balo bazwa munyika;+ nkakaambo kaako ncobaambaula izizwa munyika alimwi nyika ilabaswiilila.+
6 Swebo tuzwa kuli Leza. Kufwumbwa ooyo uuba aluzyibo lwa Leza ulatuswiilila;+ kufwumbwa ooyo uutazwi kuli Leza tatuswiilili pe.+ Oobu mbotuzyiba majwi aasololelwa amuuya aakasimpe alimwi amajwi aasololelwa amuuya aakubeja.+
7 Nobayandwa, atuzumanane kuyandana,+ nkaambo luyando luzwa kuli Leza, alimwi muntu woonse uutondezya luyando uzyedwe kuli Leza alimwi ulimuzyi Leza.+
8 Kufwumbwa muntu uutatondezyi luyando tanamuzyiba Leza pe, nkaambo Leza nduyando.+
9 Lino oobu mbolwakayubununwa luyando lwa Leza kulindiswe, Leza wakatuma Mwanaakwe simuzyalwaalikke+ munyika ikutegwa tukonzye kuba abuumi kwiinda mulinguwe.+
10 Iluyando lwaambwa waawa taluli akaambo kakuti swebo twali kumuyanda Leza pe, pele walo nguwakatuyanda akutuma Mwanaakwe kuti abe cipaizyo cakumanya zibi zyesu akutuyanzanya a Leza.+
11 Nobayandwa, ikuti naa oobu mbwaakatuyanda Leza, nkokuti andiswe tweelede kuyandana.+
12 Kunyina muntu wakamubona kale Leza.+ Ikuti naa twazumanana kuyandana, Leza ulazumanana mulindiswe alimwi luyando lwakwe lulalondolwa mulindiswe.+
13 Aboobo tulizyi kuti tulikamantene anguwe lyoonse alimwi walo ulikamantene andiswe, nkaambo watupa muuya wakwe.
14 Kuyungizya waawo, swebo lwesu twalibonena alimwi tupa bumboni kuti Taata watuma Mwanaakwe kuti abe Mufwutuli wanyika.+
15 Muntu woonse uuzumina kuti Jesu Mwana wa Leza,+ Leza ulazumanana kukamantana amuntu ooyo alimwi walo ulakamantana a Leza.+
16 Alimwi swebo lino twaluzyiba alimwi twalusyoma luyando ndwajisi Leza kulindiswe.+
Leza nduyando,+ alimwi ooyo uuzumanana muluyando ulazumanana kukamantana a Leza alimwi Leza ulazumanana kukamantana anguwe.+
17 Oobu mbolwalondolwa luyando mulindiswe, kutegwa tukacikonzye kwaamba cakutayoowa*+ mubuzuba bwalubeta, nkaambo mbubonya mbwabede ooyo, mbotubede andiswe munyika eeyi.
18 Kunyina kuyoowa muluyando,+ pele luyando lulondokede lukusowela anze kuyoowa, nkaambo kuyoowa kulatusinkilila. Ncobeni, ooyo uuyoowa tanalondolwa pe muluyando.+
19 Swebo tulatondezya luyando, nkaambo walo nguwakasaanguna kutuyanda.+
20 Ikuti umwi waamba kuti, “Ndilamuyanda Leza,” kwamana boobo kasulaika munyina, muntu ooyo mubeji.+ Nkaambo ooyo uutayandi munyina+ ngwabwene, takonzyi pe kuyanda Leza ngwatanabona.+
21 Alimwi tulijisi mulawo ooyu kuzwa kulinguwe, kuti kufwumbwa ooyo uuyanda Leza weelede kumuyanda awalo munyina.+
Bupanduluzi buyungizyidwe
^ Mu Chigiriki, “amwiisole myuuya.”
^ Mu Chigiriki, “myuuya.”
^ Naa “cabusicamba.”
