1 Petro 2:1-25
2 Aboobo amuleke bubi boonse,+ lweeno, kuupaupa ameso, munyono akuvwiya koonse.
2 Mbuli bavwanda bazyalwa lino-lino,+ amuyandisye mukupa uutavweledwe* cintu uuli mujwi lya Leza, kutegwa kwiinda mulinguwo mukomene mane kulufwutuko,+
3 kufwumbwa kuti mwalabila akujana kuti Mwami ngusiluzyalo.
4 Nomuboola kulinguwe, ibbwe lipona ilyakakakwa abantu,+ pele ilyakasalwa alimwi iliyandisi kuli Leza,+
5 nywebo mbomuli mabwe aapona mulayakwa kuba ŋanda yakumuuya+ kutegwa mube bapaizi basalala, ikuti kamutuula zipaizyo zyakumuuya+ zizuminwa kuli Leza kwiinda muli Jesu Kristo.+
6 Nkaambo mu Magwalo kwaambwa kuti: “Amubone! Ndibikka bbwe lisalidwe mu Ziyoni, ibbwe lyantalisyo lyakukkona liyandisi, alimwi kunyina muntu uusyoma ndilyo uuyootyompwa pe.”*+
7 Aboobo, nkuuli ndinywe nkwali muntu uuyandika kapati, nkaambo muli basyomi; pele kulibaabo batasyomi, “ibbwe ndibakakaka bayaki+ lyaba bbwe liyandika kapati lyakukkona”*+
8 alimwi lyaba “bbwe lilebya alimwi amwala uupa kuwa.”+ Balalebwa akaambo kakuti tabaswiilili jwi. Aaya ngamamanino aabalindila bantu bali boobu.
9 Pele nywebo muli “musyobo uusalidwe, ibapaizi bami, cisi cisalala,+ iciinga ca Leza cilibedelede,+ kutegwa mwaambilizye koonse-koonse bulemu”*+ bwayooyo wakamwiita kuzwa mumudima akumunjizya mumumuni wakwe uutaliboteli.+
10 Nkaambo kuli nomwatakali ciinga, pele lino muli ciinga ca Leza;+ kuli nomwatakali kufwidwa luse, pele lino mwafwidwa luse.+
11 Nobayandwa, mbomuli bamuzwakule abeenzu batakkalilili,+ ndimukulwaizya kuti muzumanane kulilesya kuzisusi zyanyama+ eezyo zimulwana.*+
12 Amuzumanane kulilemeka kabotu akati kabantu bamasi,+ ikutegwa nobamutamikizya kuti muli basizibi, balibonene milimo yanu mibotu+ eelyo akaambo kaceeco, bakamulemeke Leza mubuzuba bwakwe bwakulingula.
13 Akaambo ka Mwami amulibombye kububambe boonse bwabantu,+ kufwumbwa naa nkuumwami+ mbwali mupati
14 naa nkuubeendelezi mbobali baabo bakatumwa anguwe kuti basubule basizibi akulumbaizya baabo bacita zibotu.+
15 Nkaambo kuyanda kwa Leza nkwakuti kwiinda mukucita zibotu, mukaumuzye bantu bafwubafwuba baambaula makani aabufwubafwuba.+
16 Amube mbuli bantu baangulukide,+ pele lwaanguluko lwanu mutaluciti kuba civwumbyo cabubi pe,+ pele mbuli bazike ba Leza.+
17 Amubalemeke bantu bamisyobo yoonse,+ amube aluyando kuciinga coonse cabakwesu,+ amuyoowe Leza,+ amumulemeke mwami.+
18 Babelesi abalibombye kuli basimalelaabo akubapa bulemu boonse buyandika,+ ikutali buyo kuli baabo babotu alimwi balomene pe, pele alimwi akuli baabo ibakatazya kukkomanisya.
19 Nkaambo ncibotu ikuti umwi waliyumya mumakatazyo* akupenga kakunyina kaambo akaambo kamanjezyeezya aakwe kuli Leza.+
20 Nkaambo ino nimpindu nzi njomujana ikuti mwaliyumya nomuumwa akaambo kakubisya?+ Pele ikuti mwaliyumya nomupenga akaambo kakucita zibotu, eeci ncintu cibotu kuli Leza.+
21 Mubwini mwakaitilwa bukkale oobu, nkaambo naba Kristo lwakwe wakapenga akaambo kandinywe,+ akumusiila citondezyo kutegwa mwiitobelesye mikondo yakwe.+
22 Tanaakacita cibi,+ alimwi kunyina lweeno lwakajanwa mukanwa lyakwe.+
23 Naakali kutukilwa,*+ kunyina naakatalika kutukila awalo.+ Naakali kupenga,+ kunyina naakatalika kukonga bantu pe, pele wakalyaaba mumaanza aayooyo uubeteka+ cabululami.
24 Walo mwini wakabweza zibi zyesu+ mumubili wakwe aacisamu,+ kutegwa tufwe* kuzibi akupona kubululami. Alimwi “kwiinda muzilonda zyakwe mwakaponesyegwa.”+
25 Nkaambo mwakali mbuli mbelele ziyaabusweeka,+ pele lino mwapilukila kumweembezi+ amulangizi wabuumi bwanu.
Bupanduluzi buyungizyidwe
^ Naa “wini-wini.”
^ Mu Chigiriki, “uyakuusyigwa nsoni.”
^ Mu Chigiriki, “lyaba mutwe wakukkona.”
^ Nkokuti, ibube alimwi amilimo yakwe iitembaulika.
^ Naa “zilwana buumi bwanu.”
^ Naa “mumause.”
^ Naa “kusampaulwa.”
^ Naa “twaangununwe.”
