1 Samuele 2:1-36
2 Mpoonya Hana wakapaila kuti:
“Moyo wangu ulakondwa muli Jehova;+Lwija* lwangu lwasumpulwa a Jehova.
Ndaasamuna mulomo wangu kuti ndivwiile basinkondoma,Nkaambo ndilasekelela mumilimo yako yalufwutuko.
2 Kunyina muntu uusalala uuli mbuli Jehova,Kunyina uumbi uuli mbuli nduwe,+Alimwi kunyina mwala uuli mbuli Leza wesu.+
3 Nywebo nobantu mutanikwaambi cakulisumpula;Mutazwi majwi aakulisumpula mukanwa lyanu pe,Nkaambo Jehova ngu Leza siluzyibo,+Ngonguwe weeleka milimo mubululami.
4 Mata aabaalumi basinguzu alanyonyoonwa,Pele aabo batajisi nguzu balapegwa nguzu zinji.+
5 Aabo bakali kulya kabotu beelede kulisambala kutegwa bajane cakulya,Pele basinzala balaleka kufwa nzala.+
Watakali kuzyala, wazyala bana bali ciloba,+Pele ooyo wakajisi bana banji wasyaala alikke.*
6 Jehova ulajaya akukwabilila buumi;*Ulanjizya mu Cuumbwe* akubusya.+
7 Jehova ulacetaazya alimwi ulavwubya;+Ulabombya alimwi ulasumpula.+
8 Ulabusya bapengede kuzwa mulusuko;Ulabusya bacete kuzwa abusena aasowelwa mulota,*+Akubakkazika antoomwe abantu balemekwa,Akubapa cuuno cabulemu.
Misemu yanyika njiya Jehova,+Alimwi ulabapa nyika.
9 Ulakwabilila ntaamu zyabantu bakwe basyomeka,+Pele basizibi bayakuumuzyigwa mumudima,+Nkaambo muntu takonzyi kuzunda munguzu zyakwe mwini.+
10 Jehova uyoobanyonyoona aabo bamulwana;*+Uyoozuma alimbabo kuzwa kujulu.+
Jehova uyoobeteka nyika yoonse,+Uyoopa nguzu kumwami wakwe+Alimwi akusumpula lwija* lwamunanike wakwe.”+
11 Mpoonya Elikana wakapiluka kuŋanda yakwe ku Rama, pele mulombe wakaba mubelesi wa* Jehova+ mubweendelezi bwa Eli mupaizi.
12 Lino bana ba Eli bakali baalumi babi;+ tiibakali kumulemeka Jehova pe.
13 Mboobu mbobakali kucita kujatikizya caabilo ncobakeelede kubweza bapaizi kuzwa kubantu:+ Kufwumbwa muntu naakali kutuula cipaizyo, imugwasyi wamupaizi wakali kuboola amfwoloko mujanza lyakwe ciindi nyama noyakali kubila,
14 mpoonya wakali kuyasa mucibiya naa mumupika naa mumpoto. Kufwumbwa nyama njaayasa amfwoloko yakwe, mupaizi wakali kwiibweza. Oobu mbombubo mbobakali kucita ku Silo kubana Israyeli boonse ibakali kuunka nkuko.
15 Alimwi sikutuula katanakuumpa mafwuta,+ mugwasyi wamupaizi wakali kuboola akwaambila sikutuula kuti: “Komupa nyama mupaizi kutegwa ayoke. Takoobweza nyama iijikidwe kuzwa kulinduwe, ccita buyo iitajikidwe.”
16 Lino naa sikutuula wamwaambila kuti: “Abasaangune kuumpa mafwuta,+ mpoonya inga wabweza kufwumbwa ncoyanda,”* walo wakali kwaamba kuti: “Peepe, kondipa lino; buyo-buyo ndilakunyanga!”
17 Aboobo zibi zyabagwasyi aabo zyakavwula kubusyu bwa Jehova,+ nkaambo baalumi aaba tiibakali kuzilemeka zituuzyo zya Jehova.
18 Lino Samuele wakali kumubelekela+ Jehova kasamide* kabaki kabupaizi+ nokuba kuti wakali mulombe buyo.
19 Alimwi banyina bakali kumusumina kajansi akumutolela mwaka amwaka baunka amulumaabo kuyootuula zipaizyo zyamwaka amwaka.+
20 Eelyo Eli wakamulongezya Elikana amukaintu wakwe kati: “Jehova akupe mwana uumbi kwiinda mumukaintu ooyu mucibaka cayooyu iwakapegwa kuli Jehova.”+ Mpoonya bakapiluka kuŋanda.
21 Jehova wakamuyeeya Hana, aboobo wakamita;+ eelyo wakazyala bana bambi basankwa botatwe abasimbi bobilo. Lino Samuele wakazumanana kukomena mumeso aa Jehova.+
22 Lino Eli wakalicembeede kapati, pele wakalimvwide zintu zyoonse bana bakwe nzyobakali kucita+ kubana Israyeli boonse alimwi ambobakali koonana abamakaintu ibakali kubelekela kumulyango watente lyakuswaanganina.+
23 Wakali kubaambila kuti: “Ino nkaambo nzi ncomucita zintu zili boobu? Nkaambo makani ngondimvwide kujatikizya ndinywe kuzwa kubantu boonse mabi.
24 Peepe nobana bangu, makani ngondimvwide aamwaikide akati kabantu ba Jehova taali mabotu pe.
25 Ikuti muntu wabisizya muntunyina, muntu uumbi ulakonzya kumukombelezyela kuli Jehova;* pele ikuti naa muntu wabisizya Jehova,+ ino nguni uukonzya kumupailila?” Pele bakakaka kubaswiilila bausyi, nkaambo Jehova wakakanzide kubajaya.+
26 Lino mwana ooyu Samuele wakali kuyaabukomena akuyandwa kapati a Jehova alimwi abantu.+
27 Muntu wa Leza wakaboola kuli Eli akumwaambila kuti: “Mboobu mbwaamba Jehova, ‘Sena tiindakaliyubununa caantangalala kuŋanda yauso eelyo nobakali mu Egepita kabali bazike muŋanda ya Farao?+
28 Alimwi wakasalwa kuzwa akati kamisyobo yoonse ya Israyeli+ kuti abeleke kali mupaizi wangu alimwi kanakuunka kucipaililo cangu+ kuyootuula zipaizyo, kuumpa tununkilizyo* akusama kabaki kabupaizi kubusyu bwangu; alimwi ndakapa ŋanda yabasyaanyokokulu zituuzyo zyuumpwa zyoonse zyabana Israyeli.*+
29 Nkaambo nzi nywebo nobaalumi ncomuubaula* zipaizyo azituuzyo zyangu nzyondalailila muŋanda yangu?+ Ino nkaambo nzi ncomulemekela bana banu kwiinda ndime, ikwiinda mukulya zibeela zibotu zyazituuzyo zyoonse zyabantu bangu bana Israyeli?+
30 “‘Nkakaambo kaako Jehova Leza wa Israyeli waamba kuti: “Ncobeni ndakaamba kuti, bantu bamuŋanda yako abamuŋanda yauso bayakweenda lyoonse kubusyu bwangu.”+ Pele lino Jehova waamba kuti: “Peepe tacikonzyeki, nkaambo aabo bandilemeka ndiyoobalemeka,+ pele aabo bandisampaula ndiyoobasampaula.”
31 Bona! Mazuba alaboola ncobeni nendiyookunyanga nguzu* zyako anguzu zyaŋanda yauso, kuti kutakabi muntu utiikapone kusikila akacembaale.+
32 Uyoobona buyo sinkondo muŋanda yangu ciindi nokunooli zintu zibotu zyoonse zicitilwa bana Israyeli,+ alimwi takukabi limbi muntu uucembeede muŋanda yako.
33 Mwaalumi wamuŋanda yako ngonditakagwisyi kuti kabeleka acipaililo cangu, uyookoofwaazya meso akukuletela buumba,* pele bunji bwabamuŋanda yako bayoojaigwa amapanga aabantu.+
34 Alimwi iciyoocitikila bana bako basankwa bobilo, Hofeni a Finehasi, ciyooba citondezyo kulinduwe: Boonse bobilo bayoofwa buzuba bomwe.+
35 Mpoonya ndiyoolibusizya mupaizi uusyomeka.+ Uyoocita kweelana ancouyanda moyo wangu;* alimwi ndiyoomuyakila ŋanda iinooliko kukabe kutamani, alimwi uyakweenda kubusyu bwamunanike wangu lyoonse.
36 Kufwumbwa uuyoosyaala muŋanda yako uyooboola akumukotamina kulomba mulimo kuti avwole mali alimwi acinkwa, eelyo uyakwaamba kuti: “Kondipa mulimo umwi wabupaizi kutegwa kandijana kakulya.”’”+
Bupanduluzi buyungizyidwe
^ Naa “Nguzu.” Amubone Bupanduluzi Bwamabala.
^ Mu Chihebrayo, “waneta.”
^ Naa “akupa buumi.”
^ Naa “Cikkalilo Cabafwu.” Amubone Bupanduluzi Bwamabala.
^ Naa ambweni, “abusena aasowelwa tombe.”
^ Naa ambweni, “Aabo balwana Jehova bayakuyoowa.”
^ Naa “nguzu.” Amubone Bupanduluzi Bwamabala.
^ Naa “wakali kubelekela.”
^ Naa “ciyanda moyo wako.”
^ Mu Chihebrayo, “kalyaangide.”
^ Naa ambweni, “Leza ulamubetekela kaambo kakwe.”
^ Mu Chihebrayo, “bana ba Israyeli.”
^ Naa ambweni, “kuuntumuna busi bwazipaizyo.”
^ Mu Chihebrayo, “ncomubbakela.”
^ Mu Chihebrayo, “janza.”
^ Naa “uyoopa kuti moyo wako upenge kapati.”
^ Naa “acili mumoyo wangu.”
