2 Batesalonika 3:1-18
3 Lino kumamanino bakwesu, amuzumanane kutupailila,+ kutegwa ijwi lya Jehova* lizumanane kumwaigwa cakufwambaana+ akulemekwa, mbubonya mbocibede akati kanu,
2 akuti tuvwunwe kubantu basiluciso alimwi babi,+ nkaambo tabali bantu boonse ibajisi lusyomo pe.+
3 Pele Mwami ulasyomeka, eelyo uyoomuyumya akumukwabilila kumubi.
4 Kunze lyaboobo, tuli alusyomo mu Mwami kujatikizya ndinywe, kuti mulazicita alimwi muyoozumanana kuzicita zintu nzyotumulailila.
5 Lino Mwami aazumanane kweendelezya myoyo yanu munzila yeelede, kuti muyande Leza+ akuliyumya+ akaambo ka Kristo.
6 Lino tumupa malailile bakwesu, muzina lya Mwami Jesu Kristo, kuti mumutantamuke mukwesu uuli woonse weenda cakupilingana+ ikutali kweelana azilengwa* nzyomwakatambula kulindiswe.+
7 Nkaambo nywebo lwanu mulizyi mbomweelede kutwiiya,+ nkaambo tiitwakalilemeka munzila iipilingene akati kanu,
8 naa kulya cakulya camuntu uuli woonse kakunyina kucibbadelela.+ Pele, syikati amasiku twakoonda mulimo canguzu akuminwa kutegwa tutapi muntu naba omwe akati kanu mukuli uuminya.+
9 Takuli kuti tiitwakeelede kutambula zintu kulindinywe,+ pele twakacita boobo kutegwa tube cikozyanyo ncomweelede kutobela.+
10 Alimwi notwakali andinywe, twakali kumupa mulawo ooyu wakuti: “Ikuti naa umwi muntu katayandi kubeleka, akulya atalyi pe.”+
11 Nkaambo tumvwide kuti kuli bamwi beenda cakupilingana akati kanu,+ ibatayandi kubeleka abuniini pele ibaide kulinjizya mumakani aatabajatikizyi.+
12 Bantu aabo tubapa mulawo akubalailila mu Mwami Jesu Kristo kuti beelede kubeleka caluumuno akulya cakulya ncobalijanina lwabo beni.+
13 Pele nywebo bakwesu, mutalengaani pe kucita zibotu.
14 Pele ikuti naa umwi kataaswiilili majwi eesu aali mulugwalo oolu, amumucenjelele kapati ooyo* alimwi amuleke kuyanzana anguwe,+ kutegwa afwe nsoni.
15 Nokuba boobo, mutamuboni mbuli kuti ngusinkondonyoko, pele amuzumanane kumulaya+ mbuli munyoko.
16 Lino Mwami waluumuno mwini amupe luumuno lyoonse munzila zyoonse.+ Mwami abe andinywe nyoonse.
17 Mebo nde Paulo, ndamulembela kwaanzya kwangu ooku ajanza lyangu ndemwini,+ icili ncitondezyo mumagwalo aangu oonse; oobu mbondilemba.
18 Iluzyalo lwa Mwami wesu Jesu Kristo alube andinywe nyoonse.
Bupanduluzi buyungizyidwe
^ Amubone Makani Aayungizyidwe A5.
^ Naa “amalailile.” Mu Chigiriki, “tunsiyansiya.”
^ Mu Chigiriki, “amumubikke caando.”
