Ciyubunuzyo 6:1-17
-
Mwanaambelele wanamatula zinamatizyo zyakusaanguna zili cisambomwe (1-17)
6 Lino ndakabona eelyo Mwanaambelele+ naakanamatula cimwi cazinamatizyo,+ alimwi ndakamvwa cimwi cazilenge zyuumi zyone+ kacaamba ajwi pati lili mbuli muzumo, kuti: “Boola!”
2 Mpoonya ndakalanga akubona bbiza lituba,+ lino ooyo wakatantide alindilyo wakajisi buta; alimwi wakapegwa musini,+ eelyo wakaunka kayaabuzunda akuti amanizye kuzunda.+
3 Mpoonya naakanamatula cinamatizyo cabili, ndakamvwa cilenge cuumi cabili+ kacaamba kuti: “Boola!”
4 Eelyo kwakazwa limbi, ibbiza lisalala pyu mbuli mulilo, mpoonya ooyo wakatantide alindilyo wakazumizyigwa kugusya luumuno anyika ikutegwa bantu batalike kujayana, alimwi wakapegwa panga lipati.+
5 Mpoonya naakanamatula cinamatizyo catatu,+ ndakamvwa cilenge cuumi catatu+ kacaamba kuti: “Boola!” Eelyo ndakalanga akubona ibbiza lisiya, alimwi ooyo wakatantide alindilyo wakajisi cikkelo mujanza lyakwe.
6 Alimwi ndakamvwa icakali kulimvwisya mbuli kuti ndijwi lizwa akati kazilenge zyuumi zyone kaliti: “Kkilo lyomwe lyawiiti lilaulwa dinari* lyomwe,+ makkilo otatwe aabbaale alaulwa dinari lyomwe; alimwi mutaanyonyooni pe mafwuta aamaolifa alimwi awaini.”+
7 Mpoonya naakanamatula cinamatizyo cane, ndakamvwa jwi lyacilenge cuumi cane+ kalyaamba kuti: “Boola!”
8 Eelyo ndakalanga akubona bbiza lituba-tuba, alimwi ooyo wakatantide alindilyo wakajisi zina lyakuti Lufwu. Alimwi Cuumbwe* cakali kumutobela munsi-munsi. Eelyo eezyi zyakapegwa nguzu kucibeela cane canyika, zyakujaya apanga lilamfwu, anzala+ azilwazi zijaya alimwi abanyama bamusyokwe bamunyika.+
9 Mpoonya naakanamatula cinamatizyo casanu, kunsi aacipaililo+ ndakabona buumi*+ bwabaabo bakajaigwa akaambo kajwi lya Leza alimwi akaambo kabumboni mbobakapa.+
10 Bakoompolola ajwi pati, balaamba: “Ino nkusikila lili O Mwami Singuzuzyoonse, uusalala alimwi wamasimpe+ notiibaleke buyo kakunyina kubabeteka akubasubula akaambo kabulowa bwesu aabo bakkala anyika?”+
11 Mpoonya umwi aumwi wabo wakapegwa cisani cilamfwu cituba,+ alimwi bakaambilwa kuti balyookezye kwakaindi akamwi kaniini, kusikila mane uzulile mweelwe wabazikenyina alimwi abanabokwabo ibakali afwaafwi kujaigwa mbubonya mbobakajaigwa balo.+
12 Lino ndakabona eelyo naakanamatula cinamatizyo cacisambomwe, mpoonya kwakaba kuzungaana kupati kwanyika; alimwi zuba lyakasiya mbi mbuli cisani caboya* cisiya, imwezi woonse wakasalala mbuli bulowa,+
13 inyenyeezi zyakujulu zyakalokela anyika, mbubonya mukuyu wazungaanizyigwa aguwo pati mboumbulumusya nkuyu zyanguwo zikwange ansi.
14 Mpoonya ijulu lyakazwa mbuli bbuku lyakuvwunga ilivwungwa,+ alimwi zilundu zyoonse ansumbu zyoonse zyakagusyigwa mumasena aanzizyo.+
15 Mpoonya bami bamunyika, basizyuuno zyaatala, beendelezi babasikalumamba, ibavwubi, bantu bayumu, ibazike boonse alimwi abantu boonse baangulukide bakayuba mumampangala amumyala yamumalundu.+
16 Eelyo balazumanana kwaambila zilundu amyala kuti: “Amutulimbe+ akutusisa kubusyu bwayooyo uukkede acuuno cabwami+ akubukali bwa Mwanaambelele,+
17 nkaambo bwasika buzuba bupati bwabukali bwabo,+ eelyo ino nguni uukonzya kwiima?”+
Bupanduluzi buyungizyidwe
^ Mali aansiliva aaba Roma ngaakali kuvwola muntu abuzuba. Amubone Makani Aayungizyidwe B14.
^ Naa “Cikkalilo Cabafwu.” Amubone Bupanduluzi Bwamabala.
^ Kuboneka kuti caamba bulowa bwabo ibwakatilwa kucipaililo.
^ Ambweni boya bwampongo.
