Intembauzyo 78:1-72
Masikili.* Intembauzyo ya Asafu.+
78 Amuswiilile mulawo* wangu, nobantu bangu;Amucenjeke matwi aanu kumajwi aazwa kumulomo wangu.
2 Ndilajalula mulomo wangu akwaamba kasimpi.
Ndilalabika tulabi twakaindi.+
3 Zintu nzyotwakamvwa alimwi nzyotuzyi,Eezyo nzyobakatulwiida bamataateesu,+
4 Tatukoozisisa pe kubana babo;Tuyoolwiida zyalani liboola+Milimo iitembaulika ya Jehova anguzu zyakwe,+Izintu zigambya nzyaakacita.+
5 Wakapa ciyeekezyo kuli JakoboAkubikka mulawo mu Israyeli;Wakalailila bamataateesuKuti zintu eezyi bakazizyibye bana babo,+
6 Ikutegwa zyalani liboola,Nkokuti bana ibayoozyalwa, bakazizyibe.+
Mpoonya abalo bakazilwiide bana babo.+
7 Eelyo aaba bayoosyoma Leza.
Tabakailubi milimo ya Leza+Pele banootobela milawo yakwe.+
8 Aboobo tabakabi mbuli bamausyi,Izyalani lyabantu basicinguni alimwi ibazangi,+Izyalani lyabantu ibakajisi myoyo iitakkalikene*+Alimwi ibakajisi muuya wakutasyomeka kuli Leza.
9 Bana Efraimu bakajisi mata,Pele bakavwuuluka akutija mubuzuba bwankondo.
10 Tiibakabamba cizuminano ca Leza+Alimwi bakakaka kweenda mumulawo wakwe.+
11 Kunze lyaboobo, bakaluba zintu nzyaakacita,+Amilimo yakwe iigambya njaakabatondezya.+
12 Wakacita zintu zibotu kapati kabalangilila bamausyi,+Mucisi ca Egepita, mucooko ca Zoani.+
13 Wakaandula lwizi kutegwa abazabusye,Wakapa kuti maanzi aime mbuli bwaanda.+
14 Wakabasololela akkumbi isyikatiMpoonya busiku boonse amumuni wamulilo.+
15 Wakaandula mandomba munkanda,Wakabanywisya maanzi mane bakkuta mbuli kuti banywa kumaanzi malamfwu.+
16 Wakapa kuti tulonga tukunke kuzwa mumwalaAkupa kuti maanzi apoomoke kuyaansi mbuli milonga.+
17 Nokuba boobo bakazumanana kumubisyilaKwiinda mukuzangila Mupatikampatila mucimpayuma;+
18 Bakasunka Leza mumyoyo yabo+Kwiinda mukulilila cakulya ncobakali kulombozya.
19 Aboobo bakaamba zintu zibi kuli Leza,Bakati: “Sena Leza ulakonzya kutubambila tebulu lyazyakulya munkanda?”+
20 Amubone! Walo wakauma ndombaCakuti maanzi akapoomoka, atwalo tulonga twakapaya.+
Nokuba boobo bakati: “Sena alimwi ulakonzya kutupa cinkwa,Naa kupa bantu bakwe nyama?”+
21 Lino Jehova naakabamvwa, wakanyema kapati;+Aboobo mulilo+ wakavwutukila Jakobo,Abukali bwakwe bwakabukila Israyeli+
22 Akaambo kakuti tiibakamusyoma Leza;+Tiibakasyoma kuti ulakonzya kubafwutula.
23 Aboobo wakalailila julu lijisi makumbi aasiya mbi,Alimwi wakajalula milyango yakujulu.
24 Wakaluujisi kubalosyela mana kuti balye;Wakabapa maila aakujulu.+
25 Bantu bakalya cinkwa cabasinguzu;*+Wakabapa cakulya cinji kuti balye akukkuta.+
26 Wakapa kuti muwo wakujwe wuunge kujuluAkuti muwo wakumusanza ubbubbule munguzu zyakwe.+
27 Wakabalosyela nyama nji mbuli lusuko,Inzya, bayuni banji mbuli musenga wakulwizi.
28 Wakabalosyela mukati kankambi yakwe,Ikuzinguluka matente aakwe oonse.
29 Aboobo bakalya akumena cabulyato;Wakabapa ncobakali kuyandisya.+
30 Pele kabatanamana kulya cakulya ncobakali kulombozya,Ciindi zyakulya zyabo nozyakacili mukanwa lyabo,
31 Bukali bwa Leza bwakababukila.+Wakabajaya baalumi babo basinguzu kapati;+Wakanyonyoona balombwana bamu Israyeli.
32 Nokuba boobo bakazumanana kubisya+Alimwi tiibakasyoma milimo yakwe iigambya.+
33 Aboobo wakamanizya mazuba aabuumi bwabo mbuli kuti muya buyo,+Amyaka yabuumi bwabo kwiinda muzintu zitayeeyelwi iziyoosya.
34 Pele lyoonse naakali kubajaya, bakali kumuyandaula;+Bakali kujokela akuyandaula Leza,
35 Bakali kwiibaluka kuti Leza ngonguwe wakali Ndomba yabo+Akuti Leza Mupatikampatila nguwakali Munununi wabo.*+
36 Pele bakasola kumweena amilomo yaboAkuti bamucenge amilaka yabo.
37 Myoyo yabo tiiyakakakatila kulinguwe;+Alimwi tiibakasyomeka kucizuminano cakwe.+
38 Pele wakali kubafwida luse;+Wakali kubalekelela* milandu yabo akutabanyonyoona.+
Ziindi zinji wakali kulilesya kunyema+Muciindi cakubusya bukali bwakwe boonse.
39 Nkaambo wakali kwiibaluka kuti mbantu buyo banyama,+Muwo buyo wuunga alimwi uutapiluki kabili.*
40 Tazilivwulili kaka ziindi nzyobakali kumuzangila munkanda+Akumucisizya moyo mucimpayuma!+
41 Cakwiinduluka-induluka bakali kumusunka Leza,+Alimwi bakali kumupa kuusa* Uusalala wa Israyeli.
42 Tiibakayeeya nguzu zyakwe,*Ibuzuba obuya naakabavwuna* kuli sinkondonyina,+
43 Mbwaakacita zitondezyo zyakwe mu Egepita+Amaleele aakwe mucooko ca Zoani,
44 Alimwi ambwaakasandula tulonga twa Nile kuba bulowa+Cakuti tiibakacili kukonzya kunywa maanzi kuzwa mutulonga twabo.
45 Wakabatumina mazimbwa manji kapati kutegwa abalume citaambiki+Abacula kutegwa babanyonyoone.+
46 Zisyango zyabo wakazipa cikwikwi icilya kapati,Eezyo nzyobakali kupengela wakazipa cikwikwi.+
47 Misaansa yabo wakainyonyoona acivwulamabwe+Ayalo mikuyu yabo wakainyonyoona acivwulamabwe.
48 Banyama babo ibanyamuna ntundu wakabaaba kucivwulamabwe+Azyalo zivwubwa zyabo wakazyuumya tulabo.*
49 Wakabatondezya bukali bwakwe butaambiki,Kunyema, kukalala alimwi amapenzi,Nkamu zyabangelo zyakatumwa kuleta mapenzi.
50 Wakabambila bukali bwakwe nzila.
Taakwe naakabeengelela kuti batafwi;Alimwi wakabaaba* kucilwazi cijaya.
51 Mpoonya kumamanino wakajaya bana boonse bataanzi kuzyalwa bamu Egepita,+Imatalikilo aanguzu zyabo zyakuzyala mumatente aa Hamu.
52 Kumane wakagusya bantu bakwe mbuli butanga bwambelele+Alimwi wakabasololela mbuli butanga munkanda.
53 Wakabasololela kabaliibide,Alimwi tiibakayoowa pe;+Lwizi lwakavwumba basinkondonyina.+
54 Eelyo wakabaleta kucilawo cakwe cisalala,+Inyika eeyi yamalundu njaakalijanina ajanza lyakwe lyalulyo.+
55 Wakatanda masi aakali kumbele lyabo;+Wakabaabila lukono ndwaakabapimina acipimyo;+Wakapa kuti misyobo yabana Israyeli ikkale mumaanda aabo.+
56 Pele bakazumanana kumusunka akumuzangila Leza Mupatikampatila;+Tiibakazibikkila maano ziyeekezyo zyakwe.+
57 Kunze lyaboobo, bakamufwutatila akuba basilweeno mbubonya mbuli bamausyi.+
Tiibakali kusyomeka mbubonya mbuli buta butebede.+
58 Bakazumanana kumunyemya akaambo kamasena aabo aakukombela,+Alimwi bakamukalazya* akaambo kazikozyanyo zyabo zibezedwe.+
59 Leza wakamvwa eelyo wakanyema,+Aboobo wakamukakila limwi Israyeli.
60 Mpoonya kumamanino wakalilekelezya tente lyakukombela lyaku Silo,+Itente oomo mwaakali kukkala akati kabantu.+
61 Aboobo wakalekela citondezyo canguzu zyakwe kuti citolwe mubuzike;Abweebesi bwakwe wakabwaaba mumaanza aabasinkondonyina.+
62 Wakaaba bantu bakwe kupanga+Alimwi wakanyemena lukono lwakwe.
63 Mulilo wakabaumpa cakumaninina balombwana bakwe,Alimwi banakalindu bakwe tiibakaimbilwa nyimbo zyabwiinga.*
64 Bapaizi bakwe bakajaigwa apanga,+Eelyo bamukabafwu babo tiibakabalila pe.+
65 Kumane Jehova wakasinsimuka mbuli kuti uzwa muŋonzi,+Mbuli singuzu+ uukololokwa waini.
66 Mpoonya wakabatanda basinkondonyina;+Wakapa kuti babe amasampu aatamani.
67 Wakalikaka tente lya Josefa;Taakwe naakasala musyobo wa Efraimu.
68 Pele wakasala musyobo wa Juda,+Cilundu ca Ziyoni, eeco ncayandisya.+
69 Wakayaka cikombelo cakwe kuti cikkalilile mbubonya mbuli majulu,*+Mbuli nyika eeyo njaakabamba kuti kailiko lyoonse mane kukabe kutamani.+
70 Wakasala Davida+ mubelesi wakweAkumugusya muzyaanda zyambelele,+
71 Wakamulesya kweembela mbelele zinyonsya;Wakamubikka kuba mweembezi wabana ba Jakobo, ibantu bakwe,+Inzya, bana ba Israyeli, ilukono lwakwe.+
72 Wakabeembela amoyo uutakwe kampenda,+Alimwi wakabasololela caluzyibo amaanza aakwe.+
Bupanduluzi buyungizyidwe
^ Amubone Bupanduluzi Bwamabala.
^ Naa “malailile.”
^ Mu Chihebrayo, “iitalibambilide.”
^ Naa “cabangelo.”
^ Naa “Sikusubula basinkondonyina.”
^ Mu Chihebrayo, “kuvwumba.”
^ Naa ambweni, “Kuti muuya ulaunka alimwi taupiluki pe.”
^ Naa “kumucisizya moyo.”
^ Mu Chihebrayo, “janza lyakwe.”
^ Mu Chihebrayo, “naakabanununa.”
^ Naa ambweni, “cilwazi cakupya mubili.”
^ Mu Chihebrayo, “wakaaba buumi bwabo.”
^ Naa “bakamupa kuba abuzuba.”
^ Mu Chihebrayo, “Alimwi banakalindu bakwe tiibakatembaulwa.”
^ Mu Chihebrayo, “Wakayaka cikombelo cakwe mbuli majulu.”
