Isaya 34:1-17
34 Amuswene afwaafwi nywebo nobantu bamasi kuti muswiilile,Amubikkile maano nywebo nomisyobo yabantu.
Nyika azili mulinjiyo zyoonse aziswiilile,Nyika azintu zyoonse zizwa mulinjiyo.
2 Nkaambo Jehova ulinyemede akaambo kamasi oonse,+Alimwi ulikalede akaambo kamakamu aangawo oonse.+
Ulaazandula kuti anyonyoonwe;Ulaaba kuti ajaigwe.+
3 Bajaidwe bamumo bayoosoogwa buyo,Imitunta yabo iyoonunka nsu;+Malundu ayakuyaaya akaambo kabulowa bwabo.*+
4 Makamu oonse aakujulu ayoobola.Aalo majulu ayoovwungwa mbubonya mbuli bbuku lyakuvwunga.
Makamu aangawo oonse ayoonyana,Mbubonya tewo linyanide mboliloka kuzwa kumusaansaAmbuli nkuyu iinyanide mboiloka kuzwa kumukuyu.
5 “Nkaambo kuzwa kujulu panga lyangu liyoonywa bulowa akukkuta.+
Kuzwa kujulu liyoosikila Edomu mulubeta,+Liyoosikila bantu mbondikanzide kunyonyoona.
6 Jehova ulijisi panga; liyoobbila mubulowa.
Liyoonankana mafwuta,+Liyoobija bulowa bwabagutu bacili bana-bana abwabajembwe,Alimwi amafwuta aakunsa zyabagutu.
Nkaambo Jehova ulaacipaizyo ku Bozira,Ikujaya kupati mucisi ca Edomu.+
7 Bapoho bamusyokwe bayoojaigwa ambabo,Abalo bapoho bacili bana-bana antoomwe abapoho basinguzu.
Nyika yabo iyoonama bulowa,Alimwi bulongo bwabo buyakweemeema mafwuta.”
8 Nkaambo Jehova ubikkide buzuba bwacisubulo,+Mwaka wakupilusya cibi akaambo kamulandu wakacitwa kuli Ziyoni.+
9 Tulonga twanguwo* tuyoosanduka kuba taala,Alusuko lwanguwo luyooba sulufa,Alimwi nyika yanguwo iyooba mbuli taala uupya mulilo.
10 Masiku naa syikati taukazimwi pe;Busi bwanguwo bunakuuntumuka kuya mujulu mane kukabe kutamani.
Kuzwa kuzyalani limwi kusikila kuzyalani limbi unooli busena bunyonyookede;Kunyina muntu uunoodabula mulinguwo lyoonse alyoonse mane kukabe kutamani.+
11 Basifundwe anungu mbabanookkala mulinguwo,Abalo batumba balamfwu matwi abacikwangala banookkala mulinguwo.
Alinguwo Leza uyootandabula ntambo yakupimya busena butakwe cintuAlimwi akuweeleka acipimyo* cantambo calunyonyooko.
12 Kunyina nkumekume zyanguwo ziyakwiitwa kuti zibe bami,Alimwi basilutwe banguwo boonse bayoonyonyoonwa.
13 Mamvwa ayoomena mungazi zyanguwo zikwabilidwe,Zisonso ansaku zyamamvwa ziyoomena mumayake aanguwo aakwabilidwe,
Uyooba busena bukkala bamwaaba,+Ibusena mukkala mpowani.
14 Banyama bamucimpayuma bayooswaangana abanyama bawuula,Ayalo mpongo yamusyokwe* iyakwiita yeenzinyina.
Inzya, ooko lukumba uyookkala akujana busena bwakulyookezyela.
15 Ooko mulala nkwayooyaka citeente akutula mayi,Alimwi uyakwaakonkona akuyobolola twana mucimvwule cakwe.
Inzya, ooko babimbe bayoobungana, umwi aumwi unooli amweenzinyina.
16 Amuvwuntauzye mubbuku lya Jehova mubale cakupozya:
Kunyina akati kanzizyo ciyoosweeka;Kunyina akati kanzizyo ciyoobula mweenzinyina,Nkaambo mulawo ooyu wazwa kumulomo wa Jehova,Alimwi muuya wakwe nguwaziyobolola antoomwe.
17 Leza nguwazyuumina cisolo,Alimwi janza lyakwe lini ndilyazyaabila busena mozibede.*
Mozinookkala lyoonse;Mozinookkala mumazyalani oonse.
Bupanduluzi buyungizyidwe
^ Naa “ayoozula bulowa bwabo.”
^ Kuboneka kuti ooyu waambwa aawa munzi wa Bozira, imunzi mupati wacisi ca Edomu.
^ Mu Chihebrayo, “amabwe.”
^ Naa ambweni, “Alyalo daimona lilibonya mbuli mpongo.”
^ Mu Chihebrayo, “ndilyazyaabanya kwiinda mukubelesya ntambo yakupimya.”
