Isaya 6:1-13
6 Mumwaka Mwami Uziya naakafwa,+ ndakabona Jehova kakkede acuuno cabwami cilamfwu kapati+ alimwi cisumpukide, alimwi cisani cakwe cilamfwu cakazuzya tempele.
2 Atala lyakwe kwakaimvwi baserafi; umwi aumwi wabo wakajisi mababa aali cisambomwe. Umwi aumwi wabo wakalilivwumbide kumeso amababa obilo, aambi obilo wakalilivwumbide kumaulu, mpoonya aaya aambi obilo ngaakali kubelesya kuuluka.
3 Umwi aumwi wabo wakali koompolola kumweenzinyina kuti:“Ulasalala, ulasalala, ulasalala Jehova wamakamu.+Nyika yoonse izwide bulemu bwakwe.”
4 Mpoonya ntalisyo zyazijazyo zyakumanjililo zyakazungaana akaambo kakoompolola ooko,* ayalo ŋanda yakazula busi.+
5 Mpoonya ndakati: “Maawe mebo!Ndanyonyooka,*Nkaambo ndimuntu uusofweede kumilomo,Alimwi ndikkede akati kabantu basofweede kumilomo;+Nkaambo meso aangu abona Mwami, Jehova wamakamu lwakwe!”
6 Mpoonya umwi wabaserafi wakaulukila kulindime, alimwi mujanza lyakwe wakajisi kkala lyamulilo+ ndyaakabwezede alumano kuzwa kucipaililo.+
7 Mpoonya wakaampa mulomo wangu akwaamba kuti:“Bona! Eeci caguma mulomo yako.Aboobo mulandu wako wamana,Acalo cibi cako camanizyigwa.”
8 Kumane ndakamvwa jwi lya Jehova kalyaamba kuti: “Ino nguni ngonditiitume, alimwi ino nguni utiituunkile?”+ Eelyo ndakati: “Ndime aano! Kondituma!”+
9 Mpoonya wakandaambila kuti: “Koya, ukaambile bantu aaba kuti:
‘Kumvwa mulamvwa cakwiinduluka-induluka,Pele tamukoomvwisya pe;Kubona mulabona cakwiinduluka-induluka,Pele tamukooba aluzyibo luli loonse.’+
10 Kopa kuti myoyo yabantu aaba iyume,+Kopa kuti matwi aabo ataswiilili,+Alimwi kojala meso aabo,Kutegwa bataboni ameso aaboAlimwi batamvwi amatwi aabo,Kutegwa myoyo yabo itamvwisyiAkuti batasanduki akuponesyegwa.”
11 Eelyo mebo ndakati: “Kusikila lili, O Jehova?” Mpoonya walo wakati:
“Kusikila mane minzi ikanyonyooke akubula bantu bakkala mumoAalo maanda kaatacikwe bantuAlimwi cisi cikanyonyooke akuba matongo;+
12 Kusikila mane Jehova akabatandile kule kapati bantu+Aalo matongo akavwule kapati mucisi.
13 “Pele mulincico munoocili cibeela comwe cazibeela zili kkumi, eelyo alimwi ciyakuumpwa, mbuli mubanga alimwi ambuli muzwamalowa, zisamu eezyo zinga kuti naa zyagonkwa, kusyaala cisiko; ilunyungu lusalala ndoluyooba cisiko cancico.”
Bupanduluzi buyungizyidwe
^ Mu Chihebrayo, “kajwi lyayooyo wakali koompolola.”
^ Mu Chihebrayo, “Ndaumuzyigwa.”
