Isaya 61:1-11
61 Muuya wa Mwami Singuzuzyoonse Jehova ulaalindime,+Akaambo kakuti Jehova wakandinanika kuti ndaambile babombe myoyo makani mabotu.+
Wakandituma kuti ndaange zilonda zyabaabo batyompedwe mumoyo,Kuti ndaambilizye lwaanguluko kubazikeAkujalula meso aabaange,+
2 Kuti ndaambilizye mwaka wakukkomaninwa a JehovaAlimwi abuzuba bwa Leza wesu bwakupa cisubulo,+Kuti nduumbulizye boonse aabo balila,+
3 Kuti ndaabile baabo balila Ziyoni,Kuti ndibape citambala muciindi camulota,Mafwuta aalukkomano muciindi cakulila,Cisani cantembauzyo muciindi camoyo uutyompedwe.Aboobo bayakwiitwa kuti masamu mapati aabululami,Aakasyangwa a Jehova, kutegwa walo mwini alemekwe.*+
4 Bayooyakulula matongo aansiku;Bayakwiimika mayake aakanyonyoonwa aakaindi,+Alimwi bayooyakulula minzi yakanyonyoonwa,+Masena aakali matongo kuzyalani azyalani.+
5 “Beenzu bayakwiimikila akweembela matanga aanu,Abalo bamuzwamasi+ bayooba balimi banu alimwi abasikulanganya myuunda yanu yamisaansa.+
6 Pele nywebo, muyakwiitwa kuti bapaizi ba Jehova;+Bayoomwiita kuti basimilimo ba Leza wesu.
Muyoolya lubono lwazisi,+Alimwi muyoolidunda akaambo kabulemu* bwanzizyo.
7 Muciindi cakufwa nsoni muyooba acaabilo ciyungizyidwe ziindi zyobilo,Alimwi muciindi cakuusa bayakoongolola cakukondwa akaambo kacaabilo cabo.
Masimpe, munyika yabo bayookona caabilo ciyungizyidwe ziindi zyobilo.+
Lukkomano lutamani luyooba caabilo cabo.+
8 Nkaambo mebo, nde Jehova, ndilabuyanda bululami,+Ndilakusulaika kubba alimwi akutalulama.+
Ndiyoobapa zyakuvwola zyabo cakusyomeka,Alimwi ndiyoopangana ambabo cizuminano citamani.+
9 Bana* babo bayoozyibwa akati kamasi+Abalo baluzubo lwabo akati kamisyobo yabantu.
Boonse bababona bayoobazyiba,Kuti mbana* mbaaleleka Jehova.”+
10 Ndilasekelela kapati muli Jehova.
Moyo wangu woonse ulakondwa muli Leza wangu.+
Nkaambo wandisamika zisani zyalufwutuko;+Wandivwabika jansi* lyabululami,Mbubonya mbuli sibwiinga uusama citambala mbuli camupaizi,+Ambuli nabwiinga uulisakatizya zilisakatizyo zyakwe.
11 Nkaambo mbubonya nyika mboipa kuti zisyuukila zyanjiyo zisyuukeAlimwi amuunda mbuupa kuti zintu zisyangidwe mumo zimene,Mbombubo awalo Mwami Singuzuzyoonse JehovaMbwayoopa kuti bululami+ antembauzyo zimene+ kumbele aamasi oonse.
Bupanduluzi buyungizyidwe
^ Naa “abote.”
^ Naa “kabuvwubi.”
^ Mu Chihebrayo, “ndunyungu.”
^ Mu Chihebrayo, “Lunyungu.”
^ Naa “jansi linyina maanza.”
